Mak 1:1-45
-
Jọn ro Brẹ Ihwo Phiyame ghwoghwori (1-8)
-
Omaebrophiyame ri Jesu (9-11)
-
Eshu davwen Jesu ni (12, 13)
-
Jesu ton aghwoghwo phiyọ vwẹ Galili (14, 15)
-
O se idibo rẹsosuọ (16-20)
-
Ọ djẹ ẹwẹn ro jẹfuọn phia (21-28)
-
Jesu sivwin ihwo buebun vwẹ Kepanọm (29-34)
-
Ọ nẹrhovwo vwẹ asan rẹ ohwo vuọvo hepha-a (35-39)
-
O sivwin ọhọnvwoti ọvo (40-45)
1 Ọtonphiyọ rẹ iyẹnrẹn esiri ro shekpahen Jesu Kristi, Ọmọ rẹ Ọghẹnẹ na:
2 Kirobo re siro vwẹ ọbe rẹ ọmraro Aizaya nẹ: “(Nighere! mi jẹ ikọn mẹ kobaro kẹ wẹ, ohwo rọ cha rhuẹrẹ idjerhe wẹn phiyọ.)
3 Urhuru rẹ ohwo ọvo ro kperẹ vwevunrẹ aton na nẹ: ‘Rhuẹrẹ idjerhe ri Jihova!* Ru idjerhe rọyen phiọn.’”
4 Jọn ro Brẹ Ihwo Phiyame hẹ evunrẹ aton na, o ghwoghwo omaebrophiyame kerẹ oka rẹ okurhẹriẹ vwọ kẹ evwoghovwo rẹ imwemwu.
5 Ihwo eje rehẹ ekogho ri Judia kugbe ihwo eje re dia Jerusalẹm ki bro ra, ko brẹ* ayen phiyame vwẹ Urhie ri Jọdan, jẹ ayen fan imwemwu rayen vwẹ azagba.
6 Asaọkiephana ewun ra vwẹ ẹton rẹ ikamẹl ru yen Jọn kuphiyọ, ọ vwẹ umuehun rẹ ophiẹn vwo mu ehun rọyen, ebaka* kugbe ame ọnyọn rẹ aghwa yen ọ rere.
7 Ko ghwoghwo nẹ: “Ohwo ọvo rọ gan nọ vwẹ cha vwẹ obuko mẹ, mi muwan mi vwo rhuẹn kpotọ rhan ifi rẹ isabato rọye-en.
8 Mi brẹ ovwan phiyame, ẹkẹvuọvo ẹwẹn ọfuanfon yen o che vwo bru ovwan phiyame.”
9 Vwẹ ọke yena, Jesu de nẹ Galili ri Nazarẹt rhe, Jọn de brophiyame vwẹ Jọdan.
10 Ugege ro vwo nẹ evunrẹ ame na cha, ọ da mrẹ idjuvwu na ri rhiephiyọ kugbe ẹwẹn na ro wontọ cha enu rọyen kerẹ ilekuku.
11 Urhuru ọvo de nẹ idjuvwu na rhe nẹ: “Wẹwẹ Ọmọ mẹ, ri mi vwo ẹguọnọ rọyen; mi rhiabọreyọ owẹ.”
12 Ugege yena ẹwẹn na de muo vwo kpo evunrẹ aton na.
13 Ọtiọyena ọ da dia evunrẹ aton na vwẹ ẹdẹ 40, jẹ Eshu davwọn nẹ. Ọ vẹ eranvwe rẹ aghwa yen gba herọ, jẹ emekashe na gbodibo kẹ.
14 Asaọkiephana re vwo mu Jọn nu, Jesu de kpo Galili, jẹ o ghwoghwo iyẹnrẹn esiri rẹ Ọghẹnẹ
15 rọ vwọ tanẹ: “Ọke re bruphiyọ na gba re, Uvie rẹ Ọghẹnẹ na sikẹre re. Ovwan kurhẹriẹ rere ovwan vwo esegbuyota kpahen iyẹnrẹn esiri na.”
16 Ọke rọ vwọ yan vwẹ orhoma rẹ Abadi ri Galili, ọ da mrẹ Saimọn kugbe oniọvo ri Saimọn re se Andru, ri do ariri phiyọ abadi na, kidie ayen ihwiyerin.
17 Ọtiọyena Jesu da ta kẹ ayen nẹ: “Ovwan nene uvwe, ki mi che ru ovwan phiyọ ihwiyerin rẹ ihworakpọ.”
18 Ugege yena, ayen da yanjẹ ariri rayen vwo, ayen de nene.
19 Rọ vwọ yan kpo obaro emerha, ọ da mrẹ Jems ọmọ ri Zẹbẹdi kugbe oniọvo rọyen Jọn, ọke rẹ ayen vwọ hẹ evunrẹ okọ rayen, rẹ ayen vwọ rhuẹrẹ ariri rayen,
20 o hwe ọke-e, o de se ayen. Ọtiọyena ayen da yanjẹ ọsẹ rayen Zẹbẹdi vwo vwevunrẹ okọ na vẹ eshare rẹ ayen reyọ phiyọ iruo, ayen de nene.
21 Ayen de kpo Kepanọm.
Ugege rẹ Ẹdẹ Urovwoma na ghwa vwọ tonphiyọ, ọ da ro evunrẹ sinagọg na, ọ da ton eyono phiyọ.
22 Obo ro yono ihwo wan de gbe ayen unu, kidie o yono ayen kerẹ ohwo ro vwo ogangan, ọ dia kerẹ isiẹbe na-a.
23 Vwẹ ọke yena, ọshare ọvo hẹ evunrẹ sinagọg rayen, rẹ ẹwẹn ro jẹfuọn kpokpo, o de kperi phia nẹ:
24 “Die yen avwanre vẹ owẹ vwo kugbe, Jesu ohwo ri Nazarẹt? Wọ rhere rhe ghwọrọ avwanre? Me riẹn ohwo ru wọ hepha dẹn, Ohwo Ọfuanfon rẹ Ọghẹnẹ na!”
25 Ẹkẹvuọvo Jesu da ghwọkuo, ọ da tanẹ: “Rhurhu unu wẹn, wo nẹ oma rọyen!”
26 Ọke rẹ ẹwẹn ro jẹfuọn na vwọ nẹrhẹ ọshare na she eshe rẹ ewẹnwẹn ji kperi gangan nu, o de nẹ oma rọyen.
27 Ọnana de gbe ihwo na eje unu te ẹdia rẹ ayen vwọ ta kẹ omoma rayen nẹ: “Ọnana die? Uyono kpokpọ! Ọ vwẹ ogangan rọyen vwo jurhi kẹ ẹwẹn ri jẹfuọn, ayen mi nyẹme rọyen.”
28 Ọtiọyena iyẹnrẹn rọyen da hrabọ kpakpata nene kasan kasan vwẹ ekogho ri Galili ejobi.
29 Ọtiọyena ayen de vrẹn nẹ evunrẹ sinagọg na, ayen de kpo uwevwin ri Saimọn kugbe Andru, Jems vẹ Jọn nene ayen.
30 Asaọkiephana ọga rẹ odo* mu oni aye ri Saimọn gbere otọ, ayen da vuẹ kpahọn ugege yena.
31 Ro vwo bro ra, ọ da yọnrọn obọ rọyen, ọ da kparọ vrẹn. Odo* na de no oma, ko gbodibo kẹ ayen.
32 Ọke rẹ ovwọnvwọn vwo te, rẹ ọnre na vwo she nu, ihwo na ki muẹ ihwo eje rẹ oma rayen ganre-e kugbe e rẹ ẹwẹn rẹ Idẹbono kpokpo bro cha;
33 orere na ejobi de siomakoko vwẹ asan ẹchẹ na.
34 Ọtiọyena o de sivwin ihwo rẹ ega sansan kpokpo, ọ da djẹ ẹwẹn rẹ Idẹbono buebun phia, ẹkẹvuọvo ọ rhọnvwa kẹ ayen nẹ ayen ta ota-a, kidie ayen riẹnrẹ phiyọ Kristi.*
35 Vwẹ edegburhiọke rẹ asan ejobi ji vwo muebri, o de vrẹn, o de kpo otafe, o de kpo asan rẹ ohwo vuọvo hepha-a, kọ nẹrhovwo vwẹ etiyin.
36 Ẹkẹvuọvo, Saimọn vẹ ihwo re vẹ ọyen gba herọ da guọnọ yanran
37 ayen da mrẹ, ayen da ta kẹ nẹ: “Ihwo eje guọnọ owẹ.”
38 Ẹkẹvuọvo ọ da ta kẹ ayen nẹ: “E jẹ avwanre kpo asan ọfa, kpo irere re kẹrẹ avwanre, rere mi ji ghwoghwo vwẹ oboyin, kidie fikirẹ ọnana yen me vwọ rhe.”
39 Ọ da yanran, jẹ o ghwoghwo vwẹ sinagọg rayen vwẹ Galili eje, je djẹ ẹwẹn rẹ Idẹbono phia.
40 Ọhọnvwoti ọvo de ji bro rhe, o shiguẹ totọ rọ vwọ rẹ, ọ da ta kẹ nẹ: “Wọ da guọnọ, wo se ru vwe fon.”
41 Ọtiọyena aro rọyen da dọn, ọ da rionbọ rọyen phia, o de djobọte, ọ da tanẹ: “Me guọnọre! Gba fon.”
42 Ugege yena oti na de no oma, ọ da fon.
43 Ọtiọyena ọ da vwẹ orhọesio ọgangan kẹ, ọ da vuẹ nẹ ọ yanran ugege yena,
44 ọ da ta kẹ nẹ: “Mrẹvughe nẹ wọ ta ota vuọvo kẹ ohwo vuọvo-o, ẹkẹvuọvo yanran re dje oma wẹn kẹ orherẹn na, rere wọ vwẹ erọnvwọn ri Mosis tare vwọ kpahotọ vwọ kẹ orufon rẹ oma wẹn, rọ vwọ dia oseri kẹ ayen.”
45 Ẹkẹvuọvo rọ vwọ yanran nu, ọshare na ko ghwoghwo nene asan eje ji gbikun rẹ obo re phiare na nene asan ejobi, te ẹdia ri Jesu rha sa rua orere rẹ ihwo de jẹriẹ-ẹn, ẹkẹvuọvo ọ da daji otafe vwẹ asan ri sherabọ kẹ ihwo. Dedena jẹ ayen ji nẹ asan ejobi bro cha.
Eta rehẹ obotọ na
^ Ni Eta re Vwomaphia.
^ Yẹrẹ “divwin; duvwun.”
^ Yẹrẹ “igurube.”
^ Yẹrẹ “ifiva.”
^ Yẹrẹ “ifiva.”
^ Yẹrẹ ọ sa dia, “kidie ayen riẹn ohwo rọ hepha.”