Mak 11:1-33
11 Asaọkiephana rẹ ayen vwo siẹkẹrẹ Jerusalẹm, Bẹtfaji kugbe Bẹtani vwẹ Ugbenu rẹ Oliv, o de ji idibo rọyen ivẹ
2 ọ da ta kẹ ayen nẹ: “Ovwan kpo evunrẹ ọko ra kparo mrẹ na, ugege rẹ ovwan da ruọ, ovwan cha mrẹ ọmọ rẹ ekẹkẹtẹ ọvo re churu si asan, rẹ ohwo vuọvo ji rhi chidia enu rọyen rhi te ọke nana-a. Ovwan rhan rere ovwan reyọ rhe etinẹ.
3 Ọ da dianẹ ohwo nọ ovwan nẹ, ‘Diesorọ ovwan vwo ruẹ ọnana?’ ovwan tanẹ, ‘Ọrovwori na guọnerọ, ọ cha reyọ rhivwin rhe nananana.’”
4 Ọtiọyena ayen da yanran, ayen da mrẹ ọmọ rẹ ekẹkẹtẹ na re churu si asan ẹchẹ ọvo vwẹ otafe vwẹ urhuvwun ọvo, ayen da rhan.
5 Ẹkẹvuọvo evo vwẹ usun rẹ ihwo ri mudia etiyin da ta kẹ ayen nẹ: “Diesorọ ovwan vwọ rhan ọmọ rẹ ekẹkẹtẹ na?”
6 Ayen da ghwa vuẹ ayen oborẹ Jesu vuẹ ayen dẹn, ayen da rhọnvwe kẹ ayen nẹ ayen yanran.
7 Ayen da reyọ ọmọ rẹ ekẹkẹtẹ na bru Jesu rhe, ayen da vwẹ iwun rẹ obotafe rayen vwọ hwa enu rọyen, o de chidia enu rọyen.
8 Vwọba, ihwo buebun da vwẹ iwun rẹ obotafe rayen vwọ hwa idjerhe na, ẹkẹvuọvo efa nyavwe eghọn rẹ irhe vwo nẹ aghwa rhe.
9 Ihwo re kobaro kẹ kugbe ihwo re vwọ kpahọn ki kperẹ nẹ: “Sivwin, avwanre rẹre, ebruba kẹ ohwo rọ cha vwẹ odẹ ri Jihova!*
10 Ebruba kẹ Uvie rẹ ọsẹ rẹ avwanre Devid rọ cha na! Sivwin, avwanre rẹre, vwẹ asan ri kpenu vwẹ obenu na!”
11 Ọ da ro Jerusalẹm, o de kpo evunrẹ uwevwin rẹ ẹga na, o de ni erọnvwọn eje riariẹ, ẹkẹvuọvo rọ vwọ dianẹ ọke she re na, ọ vẹ Ihwivẹ na de kpo Bẹtani.
12 Vwẹ ẹdẹ rọ vwọ kpahọn rẹ ayen vwo vrẹn nẹ Bẹtani, owẹnvwe ko hwe.
13 Vwẹ ugboko ọ da kparo mrẹ urhe rẹ ifigi ọvo ro vwo ẹbe, ọ da yanran re no sẹ ọ cha mrẹ omamọ vwọ. Ẹkẹvuọvo ro vwo te asan rọ hepha, ọ mrẹ omamọ vuọvo vwọ-ọ jokparẹ ẹbe ọvo, kidie ọyena dia ọke rẹ ifigi vwọ mọ-ọ.
14 Ọtiọyena ọ da ta kẹ nẹ: “E rhe jẹ ohwo vuọvo mrẹ omamọ ria vwẹ enu wẹn ọfa-a.” Jẹ idibo rọyen kerhọ.
15 Asaọkiephana ayen de rhi te Jerusalẹm. Ọ da ro uwevwin rẹ ẹga na, kọ djẹ ihwo re shẹ kugbe ihwo re dẹ vwẹ uwevwin rẹ ẹga na rua otafe, ọ da bọvwọn imẹjẹ rẹ ihwo ri wene igho kugbe egbara rẹ ihwo re shẹ ilekuku rhuotọ,
16 ọ je rhọnvwe kẹ ohwo vuọvo nẹ o mu orọnvwọn vuọvo wan uwevwin rẹ ẹga na-a.
17 Ko yono je ta kẹ ayen nẹ: “E rhe sio phiyotọ nẹ, ‘E che se uwevwin mẹ uwevwin rẹ ẹrhovwo vwọ kẹ ẹgborho na eje’? Ẹkẹvuọvo ovwan reyerọ vwo ru unu rẹ iji.”
18 Irherẹn ride na vẹ isiẹbe na de nyo kpahọn, kẹ ayen guọnọ oborẹ ayen se vwo hwe; ẹkẹvuọvo oshọ rọyen muẹ ayen, kidie uyono rọyen gbe otu na eje unu.
19 Vwẹ ovwọnvwọn rẹ ẹdẹ yena, ayen de nẹ orere na.
20 Ẹkẹvuọvo ọke rẹ ayen vwọ wanvrẹ vwẹ edegburhiọke, ayen da mrẹ nẹ urhe rẹ ifigi na ghwuru vwo nẹ awọ rọyen re duvwun obenu.
21 Pita vwọ karophiyọ, ọ da ta kẹ nẹ: “Rabbi, nighere! urhe rẹ ifigi na ru wọ hanrhere na ghwu re.”
22 Jesu da kpahen kẹ ayen nẹ: “Ovwan vwo esegbuyota kpahen Ọghẹnẹ.
23 Uyota me ta kẹ ovwan nẹ, kohwo kohwo rọ ta kẹ ugbenu nana nẹ, ‘Ghwie nẹ etinẹ wọ ro evunrẹ abadi na,’ o rhe vwo ẹwẹn ivivẹ vwevunrẹ ubiudu rọye-en, ẹkẹvuọvo o de vwo esegbuyota nẹ obo rọ tare na cha phia, kọ phia kẹ ọtiọyen.
24 Ọnana yen sorọ me vwọ vuẹ ovwan nẹ, erọnvwọn eje rẹ ovwan nẹrhovwo kpahen je nokpẹn rọyen, ovwan vwo esegbuyota nẹ i che te ovwan obọ, kẹ ovwan che vwo ayen.
25 Ọke rẹ ovwan de mudia rẹ ovwan da nẹrhovwo, ovwan reyọ kemu kemu rẹ ohwo ru vwọso ovwan vwo ghovwo, rere Ọsẹ rẹ ovwan rọhẹ evunrẹ idjuvwu na sa vwọ reyọ oruchọ rẹ ovwan ji vwo ghovwo ovwan.”
26 *——
27 Ayen da rhoma rhe Jerusalẹm. Rọ vwọ yan vwevunrẹ uwevwin rẹ ẹga na, irherẹn ride na kugbe isiẹbe na kugbe ekpako na da rhe
28 ayen da ta kẹ nẹ: “Ogangan vọ yen wo vwo ruẹ erọnvwọn nana? Yẹrẹ ono yen kẹ wẹ ogangan nana ru wo vwo ruẹ erọnvwọn nana?”
29 Jesu da ta kẹ ayen nẹ: “Me cha nọ ovwan onọ ọvo. Ovwan kpahen kẹ vwẹ, ke me cha vuẹ ovwan ogangan ri mi vwo ruẹ erọnvwọn nana.
30 Omaebrophiyame ri Jọn ruru, obodjuvwu yen o nurhe gbanẹ obọ rẹ ihworakpọ? Ovwan kpahen kẹ vwẹ.”
31 Ọtiọyena kẹ ayen ta kẹ omoma rayen nẹ: “Avwanre da tanẹ, ‘Obodjuvwu,’ kọ cha tanẹ, ‘Kẹ diesorọ ovwan rhe se gbuyota-a?’
32 Ẹkẹvuọvo kẹ avwanre yivwin tanẹ, ‘Obọ rẹ ihworakpọ’?” Ayen djoshọ rẹ otu na, kidie enana eje niro nẹ Jọn ghini ọmraro.
33 Ọtiọyena ayen da kpahen kẹ Jesu nẹ: “Avwanre riẹnre-e.” Jesu da ta kẹ ayen nẹ: “Me je cha vuẹ ovwan ogangan ri mi vwo ruẹ erọnvwọn nana-a.”
Eta rehẹ obotọ na
^ Ni Eta re Vwomaphia.
^ Owọrota nana hẹ imanuskripti rẹ awanre evo-o, imuẹro je herọ nẹ ọ dia ẹbẹre ọvo rẹ Isiesi Ọfuanfon na-a.