Mak 13:1-37
13 Ro vwo vrẹn nẹ uwevwin rẹ ẹga na, ọvo vwẹ usun rẹ idibo rọyen da ta kẹ nẹ: “Oyono, nighere! oborẹ ikuta na vẹ iwevwin na yovwin te!”
2 Ẹkẹvuọvo Jesu da ta kẹ nẹ: “Wọ mrẹ iwevwin ride nana? O vwo ọke vuọvo ra cha vwọ yanjẹ ukuta ọvo vwo vwẹ enu rẹ ọfa vwẹ etinẹ na re de jẹ ayen ekporon she-e.”
3 Ọke ro vwo chidia enu rẹ Ugbenu rẹ Oliv vwẹ asan rọ da kparo mrẹ uwevwin rẹ ẹga na, Pita, Jems, Jọn, kugbe Andru da nọ vwẹ odjahọn nẹ:
4 “Vuẹ avwanre, ọke vọ yen erọnvwọn nana cha vwọ phia, die yen cha dia oka rẹ ọke rẹ erọnvwọn nana eje che vwo kuphiyọ?”
5 Ọtiọyena Jesu kọ vuẹ ayen nẹ: “Ovwan nomaso rere ohwo vuọvo vwo jẹ ovwan esuon ghwrẹ.
6 Ihwo buebun cha rhe vwẹ odẹ mẹ, kẹ ayen cha tanẹ, ‘Mẹvwẹ yen ọyen,’ kẹ ayen che sun ihwo buebun ghwru.
7 Vwọ vrẹ ọyena, ọke rẹ ovwan de nyo kpahen ifovwin kugbe iyẹnrẹn rẹ ifovwin, ovwan jẹ oshọ muẹ ovwa-an; erọnvwọn nana cha phia, jẹ oba na ji rhi te-e.
8 “Kidie ẹkuotọ cha vwọso ẹkuotọ, uvie cha vwọso uvie; etọ che kpogho nẹ asan ọvo vwo kpo ọfa; emu je cha kanre. Enana ọtonphiyọ rẹ ikpetu egangan.
9 “Vwọ kẹ ovwan, ovwan ni oma rẹ ovwan so. Ihwo che mu ovwan kpo aguare, ayen che hwe ovwan vwevunrẹ sinagọg, ayen cha vwẹ ovwan vwo mudia obaro rẹ isun kugbe ivie fiki mẹ, rọ vwọ dia oseri vwọ kẹ ayen.
10 Vwọba, e che ghwoghwo iyẹnrẹn esiri na vwẹ ẹgborho na eje tavwen.
11 Ọke rẹ ayen de mu ovwan rẹ ayen da cha vwẹ ovwan vwọ kpahotọ, ovwan rua ẹnwan phiyotọ kpahen oborẹ ovwan cha ta-a; ẹkẹvuọvo kemu kemu ra vwọ kẹ ovwan vwẹ unọke yena, ovwan ta, kidie ọ dia ovwan yen ta ota-a, ẹkẹvuọvo ẹwẹn ọfuanfon na.
12 Vwọba, oniọvo cha vwẹ oniọvo vwọ kpahotọ kẹ ughwu, ọsẹ che ru ọtiọyen kẹ ọmọ, emọ che vrẹn vwọso esẹ vẹ ini rayen, ayen me teyen ayen hwe.
13 Ihwo eje che vwo utuoma kpahen ovwan fikirẹ odẹ mẹ. Ẹkẹvuọvo ohwo ro chirakon toba yen che vwo usivwin.
14 “Ẹkẹvuọvo, ọke rẹ ovwan da mrẹ emu rẹ ẹgua rọ sua oghwọrọ ro mudia asan ro fori nẹ o mudia-a (e jẹ ohwo ro se na vwo oniso), e gbe jẹ ihwo rehẹ Judia ton onẹdjẹ phiyọ kpo enu rẹ igbenu na.
15 E jẹ ohwo rọhẹ enu rẹ uwevwin na wontọ cha yẹrẹ ro uwevwin rere ọ reyọ orọnvwọn vuọvo nẹ uwevwin rọye-en;
16 e jẹ ohwo rọhẹ evunrẹ udju rhivwin kpuko ra reyọ ewun rẹ obotafe rọye-en.
17 Okpetu rode vwọ kẹ eya re mrevun kugbe e re vwẹ evie kẹ emọ vwẹ ọke yena!
18 Ovwan rha nẹrhovwo nẹ ọ phia vwẹ ọke ekpahe-en;
19 kidie ọke yena cha dia ọke rẹ ukpokpogho ra je rhe mrẹ oka rọyen vwo nẹ ọtonphiyọ rẹ emama rẹ Ọghẹnẹ mare rhi te ọke yena-a, ọ je cha phia ọfa-a.
20 Vwọrẹ uyota, jokpanẹ kẹ Jihova* bru ẹdẹ na krẹ, o vwo ohwo* vuọvo ro che sivwin rhọ-ọ. Ẹkẹvuọvo fikirẹ ihwo rọ jẹreyọ na, o bru ẹdẹ na krẹ nure.
21 “Ọtiọyena, ohwo da ta kẹ ovwan nẹ, ‘Nighere! Kristi na hẹ etinẹ,’ yẹrẹ ‘Nighere! Ọ hẹ oboyin,’ ovwan se gbuyota-a.
22 Kidie Kristi rẹ efian kugbe emraro rẹ efian cha vwomaphia, ayen che ru eka kugbe emu rẹ igbevwunu rere ayen se vwo sun ihwo ra jẹreyọ na ghwru, ọ da dia oborẹ ayen se ru.
23 Ọtiọyena, ovwan nomaso. Me vuẹ ovwan erọnvwọn eje phiyotọ nure.
24 “Ẹkẹvuọvo vwẹ ọke yena, ukpokpogho yena da phia nu, ọnre na ko che muebri, emeranvwe na rha cha vwẹ elo rọyen phia-a,
25 isio na ki che rhe she nẹ odjuvwu cha, ẹgba rehẹ idjuvwu na ki che kpogho.
26 Ọke yena kẹ ayen cha mrẹ Ọmọ rẹ ohwo rọ cha vwevunrẹ evwru na vẹ ogangan rode kugbe urinrin.
27 Ko che ji emekashe na yanran, kẹ ayen che koko ihwo rọ jẹreyọ vwo nẹ odju ẹne na rhe, vwo nẹ oba rẹ akpọ na re te oba rẹ odjuvwu.
28 “Asaọkiephana ovwan yono udje nana vwo nẹ urhe rẹ ifigi na: Ugege rẹ oghọn boba rọyen da djẹ phia, rọ da je ghwẹbe phiyọ nu, kẹ ovwan riẹn nẹ ọke uvo sikẹre re.
29 Vwẹ idjerhe vuọvo na, ọke rẹ ovwan da mrẹ erọnvwọn nana re phia, ovwan gba riẹn nẹ o sikẹre ẹchẹ na re.
30 Uyota me ta kẹ ovwan nẹ, o vwo ọke vuọvo rẹ uvwiẹ nana cha vwọ wanvrẹ bẹsiẹ rẹ erọnvwọn nana eje vwọ phia-a.
31 Odjuvwu vẹ akpọ cha wanvrẹ, ẹkẹvuọvo o vwo ọke vuọvo rẹ eta mẹ cha vwọ wanvrẹ-ẹ.
32 “Vwọ kpahen ẹdẹ yena yẹrẹ unọke na, ohwo vuọvo riẹnrẹ-ẹ, emekashe rehẹ odjuvwu na riẹnrẹ-ẹ, Ọmọ na je riẹ-ẹn, jokparẹ Ọsẹ na.
33 Ovwan rhe nẹ, ovwan rha rhẹrẹ, kidie ovwan riẹn ọke re bruphiyọ na-a.
34 Ọ pha kerẹ ọshare rọ yanjẹ uwevwin rọyen vwo kpo isiorho, ọ da vwẹ ogangan vwọ kẹ idibo rọyen, ọ da vwẹ iruo vwọ kẹ ohwo ọvuọvo, o de jurhi kẹ ohwo rọ rhẹrẹ ẹchẹ na nẹ ọ rha rhẹrẹ.
35 Ọtiọyena ovwan rha rhẹrẹ, kidie ovwan riẹn ọke rẹ onini rẹ uwevwin na cha vwọ rhe-e, sẹ ovwọnvwọn yẹrẹ uherevie ason yẹrẹ tavwen ọke ki rhie* yẹrẹ edegburhiọke-e,
36 rere ọke rọ da rhe kpregede, o vwo jẹ mrẹ nẹ ovwan vwerhẹn.
37 Ẹkẹvuọvo oborẹ me ta kẹ ovwan yen me ta kẹ ihwo eje: Ovwan rha rhẹrẹ.”
Eta rehẹ obotọ na
^ Ni Eta re Vwomaphia.
^ Vwẹ Grik, “uvwo.”
^ Vwẹ Grik, “ọke rẹ ogborhuane vwo bo.”