Mak 16:1-8
-
A rhọvwọn Jesu (1-8)
16 Ọtiọyena Ẹdẹ Urovwoma na vwọ wanvrẹ nu, Meri Magdalini, Meri oni ri Jems, kugbe Salomi da dẹ erọnvwọn ri gbon phanphanphan* rere ayen reyọ ayen rhi vwo ghworo ugboma rọyen.
2 Vwẹ edegburhiọke rẹ ẹdẹ rẹsosuọ rẹ udughwrẹn na rẹ ọnre vwọ va rhe nu, ayen de kpo asan ushi* na.
3 Kẹ ayen ta kẹ ohwohwo nẹ: “Ono yen che ghorie ukuta na vwo nẹ unu rẹ ushi na kẹ avwanre?”
4 Ẹkẹvuọvo ọke rẹ ayen vwọ kpare opharo, ayen da mrẹ nẹ e ghorie ukuta na no re, dede nẹ ọ rhoro mamọ.
5 Ọke rẹ ayen vwọ ro evunrẹ ushi na, ayen da mrẹ eghene ọshare ọvo ro chidia ẹbẹre obọrhen na, o ku ewun ọfuanfon phiyọ, o de gbe ayen unu.
6 Ọ da ta kẹ ayen nẹ: “Ovwan jẹ o gbe ovwan unu-u, Jesu ohwo ri Nazarẹt re hwe mu urhe na yen ovwan guọnọ. A kparerọ vrẹn re. Ọ hẹ etinẹ-ẹ. Nighere, ọnana yen asan ra hwarọ phiyọ jovwo.
7 Ẹkẹvuọvo ovwan yanran, ovwan vuẹ idibo rọyen kugbe Pita nẹ, ‘Ọ kobaro kẹ ovwan kpo Galili re. Ovwan cha mrẹ vwẹ oboyin kirobo rọ vuẹ ovwan jovwo.’”
8 Ọtiọyena rẹ ayen vwọ ro otafe, ayen da djẹ nẹ asan ushi na, jẹ ayen phariẹ vẹ uguegue rọ ro ayen oma. Ayen ta ota vuọvo kẹ ohwo vuọvo-o, kidie oshọ muẹ ayen.*
Eta rehẹ obotọ na
^ Ipọda yẹrẹ ẹbe kugbe iri re vwo muegbe rẹ ugboma vwọ kẹ esho.
^ Yẹrẹ “ushi rẹ ẹkarophiyọ.”
^ Kirobo rẹ imanuskripti rẹ awanre evo ra sa vwẹroso tare, Ikuegbe ri Jesu ri Mak siri kuphiyọ vẹ eta ra mrẹre vwẹ owọ 8.