Mak 2:1-28
2 Ẹkẹvuọvo ẹdẹ evo vwọ wan nu, ọ da rhoma ro Kepanọm, ota na da hra nene asan ejobi nẹ ọ hẹ uwevwin.
2 Ihwo buebun de rhi koko te ẹdia rẹ asan ejobi de rhi keke, tobọ te anurhoro na dede, ọ da ton ota ẹta phiyọ kẹ ayen.
3 Eshare ẹne de mu ọshare ọvo rọ sa kpara abọ vẹ awọ-ọ bro rhe.
4 Ẹkẹvuọvo fikirẹ otu na, ayen rhe se muo te asan ri Jesu hepha-a, ọtiọyena ayen da kpanre obenu rẹ uwevwin na no vwẹ asan ri Jesu hepha, ayen vwo rhie asan ọvo phiyọ nu, ayen da lọrọ ehwa rẹ ọshare rọ sa kpara abọ vẹ awọ-ọ sherhẹn na kpotọ.
5 Jesu vwọ mrẹ esegbuyota rayen, ọ da ta kẹ ọshare rọ sa kpara abọ vẹ awọ-ọ na nẹ: “Ọmọ, a vwẹ imwemwu wẹn vwo ghovwo uwe re.”
6 Asaọkiephana evo vwẹ usun rẹ isiẹbe na hẹ etiyin, ayen chidia jẹ ayen roro vwevunrẹ ubiudu rayen nẹ:
7 “Diesorọ ọshare nana vwọ ta ota vwẹ idjerhe ọtiọna? Ọ ta eta rẹ ẹgua. Ono yen sa vwẹ imwemwu vwo ghovwo ohwo, jokparẹ Ọghẹnẹ ọvo?”
8 Ugege yena Jesu da ghwa vwẹ ẹwẹn rọyen vwọ riẹn nẹ ọyena yen oborẹ ayen roro vwẹ ohri rayen, ọtiọyena ọ da ta kẹ ayen nẹ: “Diesorọ ovwan vwo roro erọnvwọn nana vwevunrẹ ubiudu rẹ ovwan?
9 Ọvọ yen ma lọhọ, ra vwọ ta kẹ ọshare rọ sa kpara abọ vẹ awọ-ọ na nẹ, ‘A vwẹ imwemwu wẹn vwo ghovwo uwe re,’ gbanẹ ra vwọ vuẹ nẹ, ‘Vrẹn, mu ehwa wẹn rere wọ yan’?
10 Ẹkẹvuọvo rere ovwan vwọ riẹn nẹ Ọmọ rẹ ohwo na vwo ogangan rọ sa vwọ reyọ imwemwu vwo ghovwo vwẹ otọrakpọ na—” ọ da ta kẹ ọshare rọ sa kpara abọ vẹ awọ-ọ na nẹ:
11 “Me ta kẹ wẹ nẹ, Vrẹn, mu ehwa wẹn rere wo kpo uwevwin wẹn.”
12 Ọtiọyena o de vrẹn, o de mu ehwa rọyen ugege yena, ọ da yanran vwẹ irharo rayen eje. Ọtiọyena o de gbe ayen ejobi unu, ayen da vwẹ urinrin kẹ Ọghẹnẹ rẹ ayen vwọ tanẹ: “Avwanre je rhe mrẹ orọnvwọn tiọna dẹvo-o.”
13 Ọ da rhoma kpo orhoma rẹ abadi na, otu na ejobi ki bro cha, ko yono ayen.
14 Ọke rọ vwọ wanvrẹ, ọ da mrẹ Livae ọmọ rẹ Alfiọs ro chidia ọfisi ra da hwosa uyovwin, ọ da ta kẹ nẹ: “Dia odibo mẹ.” Ọtiọyena o de vrẹn, o de nene.
15 Ọke vwọ yan obaro, rọ vwọ riemu* vwẹ uwevwin rọyen, ihwo buebun ri phi osa uyovwin kugbe irumwemwu ki nene Jesu vẹ idibo rọyen riemu kuẹgbe,* kidie buebun rayen nene.
16 Ẹkẹvuọvo ọke rẹ isiẹbe rẹ ihwo ri Farisi na vwọ mrẹ nẹ o nene irumwemwu vẹ ihwo ri phi osa uyovwin riemu kuẹgbe, kẹ ayen ta kẹ idibo rọyen nẹ: “Ọ vẹ ihwo ri phi osa uyovwin kugbe irumwemwu riemu kuẹgbe?”
17 Ro vwo nyo ọnana, Jesu da ta kẹ ayen nẹ: “Ihwo rẹ oma rayen ganre guọnọ ọbo-o, ẹkẹvuọvo ihwo rẹ oma rayen jẹ gan yen guọnọ ọbo. Me rhere rhi se evwata-a, ẹkẹvuọvo irumwemwu.”
18 Asaọkiephana idibo ri Jọn kugbe ihwo ri Farisi na chiri owẹnvwe. Ọtiọyena ayen da rhe, ayen da ta kẹ nẹ: “Diesorọ idibo ri Jọn kugbe idibo rẹ ihwo ri Farisi na vwo chiri owẹnvwe, jẹ idibo wẹn chiri owẹnvwe-e?”
19 Ọtiọyena Jesu da ta kẹ ayen nẹ: “Ọshare ọpha na vẹ ayen vwọ herọ na, o vwo oboresorọ igbeyan rẹ ọshare ọpha na vwo chiri owẹnvwe-e, gbanẹ o vwo oboresorọ? Rọ vwọ dianẹ ọshare ọpha na vẹ ayen je herọ na, ayen che se chiri owẹnvwe-e.
20 Ẹkẹvuọvo ọke cha ra cha vwọ reyọ ọshare ọpha na jẹ ayen vwo, ọke yena kẹ ayen che chiri owẹnvwe.
21 O vwo ohwo vuọvo ro ko ẹbẹre amwa kpokpọ phiyọ ewun rẹ obotafe rẹ awanre-e. O de ru ọtiọyen, ẹbẹre amwa kpokpọ na cha fian nẹ ọ rẹ awanre na, ọ me rhe bẹre rhophiyọ.
22 Vwọba, o vwo ohwo vuọvo ro kuẹ iwaini kpokpọ phiyọ ekpu rẹ iwaini rẹ awanre-e. O de ru ọtiọyen, iwaini na cha bẹre ekpu na, iwaini na mi hwẹ kufia, ekpu na me je guọghọ. Ẹkẹvuọvo ekpu rẹ iwaini kpokpọ yen e kuẹ iwaini kpokpọ phiyọ.”
23 Asaọkiephana rọ vwọ wan idju ra kọn ekankọn phiyọ vwẹ Ẹdẹ Urovwoma na, idibo rọyen ke kọrọ ibi ekankọn rayen rẹ ayen vwọ wanvrẹ na.
24 Ọtiọyena ihwo ri Farisi na da ta kẹ nẹ: “Nighere! Diesorọ ayen vwo ruẹ obo re vwọso urhi vwẹ Ẹdẹ Urovwoma na?”
25 Ẹkẹvuọvo ọ da ta kẹ ayen nẹ: “Ovwan ji rhi se dẹvo-o, oborẹ Devid ruru ọke rọ vwọ hẹ ẹdia rẹ ọkanrovwẹ, rẹ owẹnvwe vwo hwe vẹ eshare re vẹ ọyen gba herọ?
26 Vwevunrẹ ikuegbe ro shekpahen Abiata orherẹn rode na, obo rọ ro uwevwin rẹ Ọghẹnẹ, rọ da re ibrẹdi re vwo dje na, orọnvwọn rẹ urhi rhọnvwe kẹ ohwo vuọvo nẹ ọ re-e, jokparẹ irherẹn na ọvo, ọ da je vwẹ evo kẹ eshare re vẹ ọyen gba herọ?”
27 Ọtiọyena ọ da ta kẹ ayen nẹ: “A ma Ẹdẹ Urovwoma na fikirẹ ohworakpọ, ọ dia a ma ohworakpọ fikirẹ Ẹdẹ Urovwoma na-a.
28 Ọtiọyena Ọmọ rẹ ohwo je tobọ Ọrovwori rẹ Ẹdẹ Urovwoma na.”