Mak 3:1-35
3 Obọfa, ọ da ro evunrẹ sinagọg ọvo, ọshare ọvo rẹ obọ rọyen sida* hẹ etiyin.
2 Ọtiọyena ayen da tẹnrovio rẹ ayen vwo no sẹ o che sivwin ọshare na vwẹ Ẹdẹ Urovwoma na, rere ayen sa vwọ tanẹ o ru chọ.
3 Ọ da ta kẹ ọshare rẹ obọ rọyen sida* na nẹ: “Vrẹn, wọ yanrhe uherevie na.”
4 Ọ da rha ta kẹ ayen nẹ: “Urhi rhọnvwere nẹ e ru obo ri yovwirin yẹrẹ so omaẹwan, nẹ e sivwin arhọ* yẹrẹ hwe vwẹ Ẹdẹ Urovwoma na?” Ẹkẹvuọvo ayen kpahen ota vuọvo-o.
5 Ọke ro vwo ni ayen riariẹ vẹ ophu ọgangan, ji muomaphiyọ gangan fikirẹ udu ọgangan rayen ro jẹ erorokẹ evwo na nu, ọ da ta kẹ ọshare na nẹ: “Rionbọ wẹn phia.” Ọ da riẹn phia, obọ rọyen de shephiyọ.
6 Ọtiọyena ihwo ri Farisi na da ro otafe, ugege yena ayen vẹ otu ri nene Hẹrọd da ra jiroro rere ayen vwo hwe.
7 Ẹkẹvuọvo Jesu de vrẹn nẹ etiyin, ọ vẹ idibo rọyen de kpo obo abadi na, otu buebun ri nẹ Galili kugbe Judia rhe de nene.
8 Ihwo buebun tobọ nẹ Jerusalẹm kugbe Idumia kugbe obovrẹ ri Jọdan kugbe ekogho re riariẹ Taya vẹ Saidọn phiyọ bro rhe, ọke rẹ ayen vwo nyo kpahen erọnvwọn buebun ro ruẹ.
9 Ọ da vuẹ idibo rọyen nẹ ayen muegbe rẹ okọ otete ọvo kẹ ọyen rere otu na vwo jẹ ọyen ekeke.
10 Kidie nẹ o sivwin ihwo buebun, ihwo eje ri vwo emiavwe egangan ki kron rere ayen se vwo djobọte.
11 Kọke kọke rẹ ẹwẹn ri jẹfuọn na da mrẹ dede, ayen mi she teyen otọ vwẹ obaro rọyen, ayen mi kperi phia nẹ: “Wẹwẹ yen Ọmọ rẹ Ọghẹnẹ na.”
12 Ẹkẹvuọvo ọke buebun, o si ayen orhọ gangan nẹ ayen dje ọyen kẹ ihwo-o.
13 O de yerin ugbenu ọvo, o de se ihwo rọ guọnọre, ayen de bro rhe.
14 O de koko ihwo 12 phiyọ ẹko ọvo,* o de ji se ayen iyinkọn, ihwo ri che nene, ro che ji yanran re ghwoghwo
15 ri ji che vwo ogangan rẹ ayen vwọ djẹ ẹwẹn rẹ Idẹbono phia.
16 Ihwo 12 ro koko phiyọ ẹko na yen* Saimọn, ohwo ro ji se Pita,
17 Jems ọmọ ri Zẹbẹdi kugbe Jọn oniọvo ri Jems (o ji se ayen odẹ na, Boanajis ro mudiaphiyọ “Emọ rẹ Agbraran”),
18 Andru, Filip, Batolomio, Matiu, Tọmọs, Jems ọmọ rẹ Alfiọs, Tadiọs, Saimọn rọ dia Kenanian na,*
19 kugbe Judas Iskariọt rọ shẹrẹ ukuko na.
Ọyena vwọ wan nu, ọ da ro uwevwin ọvo,
20 otu na da rhoma siomakoko, ọtiọyena ayen rha sa tobọ riemu-u.
21 Ẹkẹvuọvo ọke rẹ imoni rọyen vwo nyo kpahọn, ayen da yanran re muo, kidie ayen tanẹ: “Uyovwin rọyen gbare-e.”
22 Vwọba, isiẹbe na ri nẹ Jerusalẹm rhe ke tanẹ: “O vwo Bẹlzibọb,* womarẹ ogangan rẹ osun rẹ ẹwẹn rẹ Idẹbono na yen ọ vwọ djẹ ẹwẹn rẹ Idẹbono na phia.”
23 Ọtiọyena ọke ro vwo se ayen te oma nu, ọ da ta ota kẹ ayen womarẹ idje nẹ: “Mavọ yen Eshu sa vwọ djẹ Eshu phia?
24 Ọ da dianẹ uvie ghare vwọso oma rọyen, uvie yena che se mudia-a;
25 ọ da dianẹ uwevwin ghare vwọso oma rọyen, uwevwin yena che se mudia-a.
26 Vwọba, ọ da dianẹ Eshu vrẹn vwọso oma rọyen ọ da je ghare, o che se mudia-a, ẹkẹvuọvo o che vwoba.
27 Vwọrẹ uyota, o vwo ohwo vuọvo rọ ro uwevwin rẹ ọgba ro se cho ekuakua rọye-en, jokpanẹ ọ ka gba ọgba na tavwen. Ọke yena ọvo yen ọ sa vwọ ghwẹ ekuakua rẹ uwevwin rọyen reyọ.
28 Uyota me ta kẹ ovwan nẹ, a cha vwẹ erọnvwọn eje vwo ghovwo emọ rẹ ihwo, o toro imwemwu rẹ ayen ruru kugbe eta rẹ ẹgua rẹ ayen tare-e.
29 Ẹkẹvuọvo kohwo kohwo rọ ta eta rẹ ẹgua vwọso ẹwẹn ọfuanfon na, e che vwo ghovwo bẹdẹ-ẹ, ẹkẹvuọvo ọ riabe rẹ umwemwu ri bẹdẹ.”
30 Ọ ta ọnana kidie ayen tanẹ: “O vwo ẹwẹn ro jẹfuọn.”
31 Asaọkiephana oni rọyen vẹ iniọvo rọyen da rhe, ayen mudia otafe, ayen de ji ohwo re se.
32 Rọ vwọ dianẹ otu na chidia riariẹ phiyọ na, ayen da ta kẹ nẹ: “Nighere! Oni wẹn vẹ iniọvo wẹn hẹ otafe nokpẹn wẹn.”
33 Ẹkẹvuọvo ọ da kpahen kẹ ayen nẹ: “Amono yen oni mẹ kugbe iniọvo mẹ?”
34 O de ni ihwo ri chidia riariẹ phiyọ na, ọ da tanẹ: “Nighere, oni mẹ kugbe iniọvo mẹ!
35 Kohwo kohwo ro ru ọhọre rẹ Ọghẹnẹ, ohwo yena yen oniọvo mẹ rẹ ọshare kugbe oniọvo mẹ rẹ aye kugbe oni mẹ.”
Eta rehẹ obotọ na
^ Yẹrẹ “ọshare ọvo rọ sa kpara obọ-ọ.”
^ Yẹrẹ “ọshare ọvo rọ sa kpara obọ-ọ.”
^ Yẹrẹ “erhi.” Ni Eta re Vwomaphia.
^ Yẹrẹ “Ọ da vwẹ ihwo 12 vwo mu phiyọ ẹko ọvo.”
^ Yẹrẹ “Ihwo 12 ro vwo mu phiyọ ẹko na yen.”
^ Yẹrẹ “rọ dia ọ ro vwo oruru na.”
^ Odẹ re vwo se Eshu.