Mak 4:1-41
4 Ọ da rhoma ton eyono phiyọ vwẹ orhoma rẹ abadi na, otu buebun de siomakoko kẹrẹ. Ọtiọyena ọ da ro okọ ọvo, o de chidia evun rọyen, o de bi ro evunrẹ abadi na emerha, ẹkẹvuọvo otu na ejobi mudia orhoma rẹ abadi na.
2 Ko yono ayen erọnvwọn buebun womarẹ idje, ọke ro vwo yono na, ọ da ta kẹ ayen nẹ:
3 “Ovwan kerhọ. Nighere! ọkekankọn na yanran ra kọn.
4 Rọ vwọ kọn na, ibi evo de she phiyọ orhoma rẹ idjerhe, emephran da rhe, ayen da re ayen.
5 Efa she phiyọ otọ rọ vọnre vẹ ikuta ro ghwe vwo ekpẹn buebu-un, ayen da djẹ ugege yena kidie ekpẹn na kodori-i.
6 Ẹkẹvuọvo ọke rẹ ọnre na vwọ varhe, ọrhorho rọyen da gan nọ kẹ ekankọn na, ayen de vwioro kidie ayen vwo awọ-ọ.
7 Ibi efa she phiyọ ohri rẹ idjigbẹn, idjigbẹn na da djẹ phia, i de duvwun ayen, ayen rha mọ omamọ vuọvo-o.
8 Ẹkẹvuọvo efa she phiyọ omamọ rẹ otọ, rẹ ayen vwọ rhua ji buẹnphiyọ na, kẹ ayen mọ emamọ, ayen mọ 30, 60, kugbe 100 vrẹ obo ra kọnre na.”
9 Vwọba, ọ da tanẹ: “E jẹ ohwo ro vwo erhọ ro vwo nyo, nyo.”
10 Asaọkiephana rẹ ọyen ọvo vwọ herọ, ihwo rehẹ etiyin vẹ Ihwivẹ na ke nọ enọ kpahan idje na.
11 Ọ da ta kẹ ayen nẹ: “Ovwan yen a vwẹ odjahọn ọfuanfon rẹ Uvie rẹ Ọghẹnẹ na kẹ, ẹkẹvuọvo vwọ kẹ ihwo rehẹ obotafe, erọnvwọn eje ghwa idje,
12 rere dede nẹ ayen nẹ, ayen se ni jẹ ayen cha mrẹ orọnvwọn vuọvo-o, dede nẹ ayen nyo, ayen se nyo jẹ ayen che vwo ẹruọ rọye-en; yẹrẹ ayen che kurhẹriẹ rere ayen mrẹ evwoghovwo-o.”
13 Vwo kpobarophiyọ, ọ da ta kẹ ayen nẹ: “Ovwan riẹn udje nana-a, kẹ mavọ yen ovwan se vwo vwo ẹruọ rẹ idje ri chekọ na eje?
14 “Ọkekankọn na kọn ota na.
15 Ọtiọyena enana yen e rehẹ orhoma rẹ idjerhe na, asan ra kọn ota na phiyọ; ẹkẹvuọvo ugege rẹ ayen vwo nyo nu, Eshu da rhe, ọ da reyọ ota ra kọn phiyọ evun rayen na.
16 Vwẹ idjerhe vuọvo na, enana yen e ra kọn phiyọ otọ rọ vọnre vẹ eragha; ugege rẹ ayen vwo nyo ota na, ayen de rhiabọreyọ vẹ aghọghọ.
17 Dedena ayen vwo awọ vwẹ otọ-ọ, ẹkẹvuọvo ayen da dia vwẹ ọmọke; jẹ ugege rẹ ukpokpogho yẹrẹ omukpahen vwọ vwomaphia fikirẹ ota na, ayen da kprowọ.
18 O ji vwo efa ra kọn phiyọ ohri rẹ idjigbẹn. Enana yen ihwo ri nyo ota na,
19 ẹkẹvuọvo ẹnwan rẹ eyeren* nana kugbe ẹgba rẹ ophiẹnvwe rẹ efe kugbe urhurusivwe rẹ erọnvwọn ri chekọ eje da ro evunrẹ ubiudu rayen, i de keke ota na, ọ rha sa mọ-ọ.
20 Ọ rọ koba, e ra kọn phiyọ omamọ rẹ otọ na yen ihwo re kerhọ rẹ ota na ji rhiabọreyọ vẹ ẹwẹn esiri, ayen da mọ emamọ—30, 60, kugbe 100 vrẹ obo ra kọnre.”
21 Ọ da je ta kẹ ayen nẹ: “E muẹ urhukpẹ phiyọ otọ rẹ obere yẹrẹ otọ rẹ ehwa-a, gbanẹ e ruẹ ọtiọyen? Ọ dia enu rẹ ogburhukpẹ yen e muo phiyọ?
22 Kidie o vwo orọnvwọn vuọvo re sinu re che je tue phia-a, o vwo orọnvwọn vuọvo ra nabọ sinu ro che jẹ phia vwẹ azagba-a.
23 Kohwo kohwo ro vwo erhọ ro vwo nyo, e jẹ o nyo.”
24 Vwo kpobarophiyọ, ọ da ta kẹ ayen nẹ: “Ovwan nomaso kpahen oborẹ ovwan nyo. Ovwanvwọ rẹ ovwan vwọ vwanvwa kẹ ihwo, ọyen a je cha vwọ vwanvwe kẹ ovwan, e, a cha vwẹ efa ba kẹ ovwan.
25 Kidie kohwo kohwo ro vwori, a cha vwẹ efa ba kẹ, ẹkẹvuọvo kohwo kohwo ro vwori-i, obo rọ tobọ vwo na, a cha reyọ mie.”
26 Ọtiọyena ọ da je tanẹ: “Vwẹ idjerhe nana, Uvie rẹ Ọghẹnẹ na pha kerẹ ọke rẹ ohwo de do ibi phiyotọ.
27 Ọ vwerhẹn vwẹ ason o mi vrẹn vwẹ urhiọke, ibi na da djẹ, e da je rho—jẹ ọ riẹn oborẹ ọnana phia wa-an.
28 Otọ na ọvo yen vwẹ emamọ phia ememerha, ẹsosuọ ugbẹn na, ọyena vwọ wan nu kọ kpipho, ukuotọ rọyen ọ da rhe mọ emamọ.
29 Ẹkẹvuọvo ugege rẹ okankọn na vwọ ghwo nu, o de duvwun ubiakpa* rọyen phiyọ, kidie ọke rẹ orhọ na te re.”
30 Ọ da je tanẹ: “Die yen avwanre sa reyọ Uvie rẹ Ọghẹnẹ na vwo dje, yẹrẹ udje vọ yen avwanre se vwo dje fiotọ?
31 Ọ họhọ ubi rẹ imọstadi, ọke ra vwọ kọn, ọyen yen ma hanvwe kparobọ vwẹ usun rẹ ibi ejobi vwẹ akpọ na.
32 Ẹkẹvuọvo ọke ra da kọn nu kọ djẹ, ọ me rhe rho vrẹ ekankọn ri chekọ eje, o mi ji rhi vwo eghọn ride, te ẹdia rẹ emephran rẹ odjuvwu na me rhe dia otọ rẹ ophie rọyen.”
33 Oka rẹ idje tiọyena buebun yen ọ vwọ ta ota na kẹ ayen, te ẹdia rẹ ayen sa kerhọ te.
34 Vwọrẹ uyota, ababọ rẹ udje ọ cha ta ota kẹ aye-en, ẹkẹvuọvo o dje erọnvwọn ejobi fiotọ kẹ idibo rọyen vwẹ odjahọn.
35 Vwẹ ẹdẹ yena, ọke rẹ ovwọnvwọn vwo te, ọ da ta kẹ ayen nẹ: “E jẹ avwanre kpo ẹbẹre ochekọ rẹ abadi na.”
36 Ọtiọyena ọke rẹ ayen vwo siobọnẹ otu na nu, ayen da reyọ phiyọ okọ na ọtiọyen, jẹ ekọ efa jehẹ etiyin.
37 Asaọkiephana ogiribo ọgangan ọvo ro muoshọ ko djuẹ, ọgbogho na kọ mwavwa rua evunrẹ okọ na, te ẹdia rẹ okọ na kọ guọnọ shuẹ.
38 Ẹkẹvuọvo ọ hẹ obuko rẹ okọ na, ọ vwerhẹn vwẹ enu rẹ ọchuyovwin. Ọtiọyena ayen da rhọvwọn, ayen da ta kẹ nẹ: “Oyono, wọ rha mrẹ nẹ ughwu yen avwanre hepha na?”
39 Ọtiọyena o de vrẹn, ọ da ghwọku odju na, ọ da ta kẹ abadi na nẹ: “Fọ! Wọ dia riẹi!” Odju na de kpotọ, asan ejobi da fọ riẹi.
40 Ọtiọyena ọ da ta kẹ ayen nẹ: “Diesorọ oshọ vwo mu ovwan te ọtiọna?* Ovwan ji rhi vwo esegbuyota?”
41 Ẹkẹvuọvo oshọ de mu ayen gangan, kẹ ayen ta kẹ ohwohwo nẹ: “Ono yen ohwo nana ghene hepha? Odju na vẹ abadi na dede nyẹme rọyen.”
Eta rehẹ obotọ na
^ Yẹrẹ “oge.” Ni Eta re Vwomaphia.
^ Yẹrẹ “aphia.”
^ Yẹrẹ “udu vwo nẹ ovwan awọ.”