Mak 5:1-43
5 Ọyena vwọ wan nu, ayen de rhi te ẹbẹre ochekọ rẹ abadi na, ayen da ro ekogho rẹ ihwo ri Gẹrasa.
2 Ugege ri Jesu ghwe vwo wontọ nẹ okọ na nu, ọshare ọvo rẹ ẹwẹn ro jẹfuọn kpokpo ro nẹ ohri rẹ ishi* na rhe da rhe vwa.
3 Ohri rẹ ishi na yen ọ dia, rhi te ọke yena a je rhe mrẹ ohwo vuọvo rọ sa vwẹ ọjọnrọn dede vwọ gba kokoroko-o.
4 A vwẹ igoni vẹ ejọnrọn vwọ gba abọ buebun re, ẹkẹvuọvo ọ savwen ejọnrọn na kufia je guọghọ igoni na; o vwo ohwo vuọvo ro vwo ogangan rọ sa vwọ gba phiyotọ-ọ.
5 Kọke kọke, te ason te uvo, yen o vwo kperẹ phia vwẹ ohri rẹ ishi na kugbe igbenu na, jẹ ọ vwẹ ikuta vwo brẹ oma rọyen.
6 Ẹkẹvuọvo rọ vwọ kparo mrẹ Jesu vwẹ ugboko, ọ da djẹ yanran ra vwẹ uyovwin kpotọ kẹ.
7 O de kperi phia vẹ urhuru ọgangan nẹ: “Die yen mẹ vẹ owẹ vwo kugbe, Jesu, Ọmọ rẹ Ọghẹnẹ ro Me Kpenu na? Reyọ Ọghẹnẹ vwo duvwun iyorin nẹ, wo che gboja kẹ vwẹ-ẹ.”
8 Kidie Jesu vuẹ nẹ: “Vrẹn nẹ oma rẹ ọshare na, wẹwẹ rẹ ẹwẹn ro jẹfuọn na.”
9 Ẹkẹvuọvo Jesu da nọ nẹ: “Die yen odẹ wẹn?” Ọ da kpahen nẹ: “Odẹ mẹ Lijọn, kidie avwanre pha buebun.”
10 Kọ rẹ Jesu nẹ ọ djẹ ẹwẹn na nẹ ekogho na-a.
11 Asaọkiephana ẹko rẹ isi buebun hẹ etiyin riemu vwẹ asan ugbenu na.
12 Ọtiọyena ẹwẹn na da rẹ nẹ: “Djẹ avwanre ro evunrẹ isi na rere avwanre ro evunrẹ oma rayen.”
13 Ọ da rhọnvwe kẹ ayen. Ọtiọyena ẹwẹn ri jẹfuọn na de nẹ oma rọyen, ayen da ra ro evunrẹ isi na, ẹko rẹ isi na da họrhọ nene ọghwrọrọ na ro evunrẹ abadi na, ayen te omarẹ 2,000, ayen de divwin ghwu vwevunrẹ abadi na.
14 Ẹkẹvuọvo ihwo ri suẹn isi na da djẹ ra niyẹnrẹn rọyen vwevunrẹ orere na kugbe eko na, ihwo da rhe rhe mrẹ obo re phiare na.
15 Ọtiọyena ayen de bru Jesu rhe, ayen da mrẹ ọshare rẹ ẹwẹn rẹ Idẹbono kpokpo jovwo na, ọ rẹ lijọn hẹ oma rọyen jovwo na, o chidia totọ, o ji ku ewun phiyọ, iroro rọyen je gba, oshọ de mu ayen.
16 Vwọba, ihwo re mrẹrẹ da vuẹ ayen obo re phia kẹ ọshare rẹ ẹwẹn rẹ Idẹbono kpokpo jovwo na vẹ isi na.
17 Ọtiọyena kẹ ayen rẹ Jesu nẹ o vrẹn nẹ ekogho rayen.
18 Asaọkiephana rọ vwọ rua okọ na, ọshare rẹ ẹwẹn rẹ Idẹbono kpokpo jovwo na kọ rẹ nẹ, o jẹ ọyen nene.
19 Ẹkẹvuọvo ọ rhọnvwere-e, ọ da ta kẹ nẹ: “Kpo uwevwin wẹn bru ihwo rẹ orua wẹn ra, rere wọ vuẹ ayen erọnvwọn eje ri Jihova* ru kẹ wẹ kugbe arodọnvwẹ ro dje kẹ wẹ.”
20 Ọshare nana da yanran, ko ghwoghwo vwẹ Dikapolis na* erọnvwọn eje ri Jesu ru kẹ, ọnana de gbe ihwo na eje unu.
21 Ọke ri Jesu vwọ rhoma ro okọ kpo ẹbẹre ochekọ rẹ abadi na nu, otu buebun de koko bro rhe, jẹ ọ hẹ orhoma rẹ abadi na.
22 Ọvo vwẹ usun rẹ isun ri sinagọg na re se Jairọs da rhe, rọ vwọ mrẹ, o de she teyen otọ vwẹ asan awọ rọyen.
23 Ọ da rẹ abọ buebun, rọ vwọ tanẹ: “Oma rẹ ọmọtẹ mẹ ganre kakaka-a.* Biko yanrhe wọ rhe ghwabọ wẹn kpahọn rere oma rọyen sa vwọ gan, o vwo jeghwo.”
24 Ọtiọyena Jesu de nene, otu buebun da je ghwiẹ nene, jẹ ayen keke.
25 Asaọkiephana o vwo aye ọvo rẹ ọbara hwẹ nẹ oma rọyen vwẹ ẹgbukpe 12 re.
26 Ọ rioja mamọ vwẹ obọ rẹ ebo buebun re, ọ je ghwọrọ obo ro vwori eje re, dedena oma na kpori-i, ukperẹ ọtiọyen kọ rhoma braphiyọ.
27 Ọke ro vwo nyo kpahen Jesu, ọ da yanrhe obuko rọyen vwevunrẹ otu na, o de djobọte ewun rẹ obotafe rọyen,
28 kidie o dje ẹtẹta nẹ: “Mi de se djobọte iwun rẹ obotafe rọyen ọvo, oma mẹ cha gan.”
29 Ugege yena, ọbara ro hwẹ nẹ oma rọyen na da ka, ọ da rhe riẹn nẹ e sivwin ọyen vwo nẹ ọga ọbrabra na re.
30 Ugege yena, Jesu da riẹn nẹ ẹgba nẹ ọyen oma, o de kuomarhẹriẹ vwevunrẹ otu na, ọ da nọ nẹ: “Ono yen djobọte iwun rẹ obotafe mẹ?”
31 Ẹkẹvuọvo idibo rọyen da ta kẹ nẹ: “Wọ mrẹ otu na ri keke uwe na, jẹ wọ nọ nẹ, ‘Ono yen djobọte vwe?’”
32 Dedena jẹ o nẹ oma riariẹ, rọ vwọ guọnọ ohwo ro djobọte na.
33 Oshọ ko muẹ aye na, kọ phariẹ, rọ vwọ riẹn obo re phia kẹ na, ọ da yanrhe, o de she teyen otọ vwẹ obaro rọyen, ọ da vuẹ uyota na eje.
34 Jesu da ta kẹ nẹ: “Ọmọtẹ, esegbuyota wẹn nẹrhẹ oma wẹn gan nure. Yanran vwọrẹ ufuoma, e sivwin uwe vwo nẹ ọga ọbrabra wẹn na re.”
35 Rọ je vwọ ta ota na, eshare evo de nẹ uwevwin rẹ osun ri sinagọg na rhe, ayen da tanẹ: “Ọmọtẹ wẹn ghwure! Diesorọ wo ji vwo kpokpo Oyono na?”
36 Ẹkẹvuọvo eta rayen na de shephiyọ orhọ ri Jesu, ọ da ta kẹ osun ri sinagọg na nẹ: “Wọ djoshọ-ọ,* takpe vwo esegbuyota.”
37 Asaọkiephana ọ rhọnvwere nẹ ohwo vuọvo nene ọye-en, jokparẹ Pita, Jems, kugbe Jọn oniọvo ri Jems.
38 Ọtiọyena ayen de rhi te uwevwin rẹ osun ri sinagọg na, ọ da mrẹ ihwo ri do kugbe otu re viẹ ri ji vwerhe oma gangan.
39 Ọke rọ vwọ ro evunrẹ uwevwin na nu, ọ da ta kẹ ayen nẹ: “Diesorọ ovwan vwọ viẹ je sua edo nana? Ọmọ na ghwuru-u, ẹkẹvuọvo ọ vwerhẹn.”
40 Ọtiọyena kẹ ayen reyọ vwọ jehwẹ. Ẹkẹvuọvo ọke rọ vwọ vuẹ ihwo ejobi nẹ ayen ro otafe nu, ọ da reyọ ọsẹ vẹ oni rẹ ọmọ na kugbe ihwo re vẹ ọyen gba herọ, o de kpo asan rẹ ọmọ na hepha.
41 Ọ da yọnrọn obọ rẹ ọmọ na, ọ da ta kẹ nẹ: “Talita kumi,” a da fan, o mudiaphiyọ nẹ: “Ọmọtẹ, me ta kẹ wẹ, vrẹn!”
42 Ugege yena, ọmọtẹ na de vrẹn, kọ yan. (Ọ hẹ ẹgbukpe 12.) Siẹvuọvo na, oma kọ vwerhen ayen gangan.
43 Ẹkẹvuọvo o de si ayen orhọ abọ buebun* nẹ, ayen jẹ ohwo vuọvo riẹn kpahen ọnana-a, ọ da tanẹ a vwẹ orọnvwọn kẹ rere ọ re.
Eta rehẹ obotọ na
^ Yẹrẹ “ishi rẹ ẹkarophiyọ.”
^ Ni Eta re Vwomaphia.
^ Yẹrẹ “Ekogho rẹ Irere Ihwe na.”
^ Yẹrẹ “Ọmọtẹ mẹ muegbe rẹ ughwu re.”
^ Yẹrẹ “Wọ rha djoshọ-ọ.”
^ Yẹrẹ “o de si ayen orhọ gangan.”