Mak 8:1-38
8 Vwẹ ọke yena, ihwo buebun da rhoma koko, jẹ ayen vwo oborẹ ayen cha re-e. Ọtiọyena o de se idibo rọyen, ọ da ta kẹ ayen nẹ:
2 “Aro rẹ otu na dọn vwẹ kidie etiyin ẹdẹ erha yen ayen vẹ ovwẹ vwọ herọ re, jẹ ayen vwo orọnvwọn vuọvo rẹ ayen cha re-e.
3 Mi de siobọnẹ ayen nẹ ayen kpo iwevwin rayen vẹ evun ofefe,* ayen che shero vwẹ idjerhe, jẹ evo vwẹ usun rayen nẹ asan oshesheri rhe.”
4 Ẹkẹvuọvo idibo rọyen da kpahen kẹ nẹ: “Tivọ yen ohwo da sa mrẹ ibrẹdi rọ cha vọn ihwo nana evun vwẹ etinẹ na ro sherabọ kẹ irere na?”
5 Ọtiọyena ọ da nọ ayen nẹ: “Bro ibrẹdi yen ovwan vwori?” Ayen da tanẹ: “Ighwrẹn.”
6 Ọ da vuẹ otu na nẹ ayen chidia totọ. Ọ da reyọ ibrẹdi ighwrẹn na, ọ da kpẹvwẹ Ọghẹnẹ, o de bru ayen, kọ vwẹ ayen kẹ idibo rọyen nẹ ayen ghare ayen, idibo na da ghare ayen vwọ kẹ otu na.
7 Ayen ji vwo emerin evo, rọ vwọ nẹrhovwo phiyọ enana nu, ọ da vuẹ ayen nẹ ayen je ghare ayen.
8 Ọtiọyena ayen da re, evun da vọn ayen, ayen de koko ibere ride ighwrẹn re vọnre vẹ e ra re chekọ.
9 Asaọkiephana eshare ri te omarẹ 4,000 yen etiyin. O de siobọnẹ ayen yanran.
10 Ugege yena, ọ vẹ idibo rọyen da ro okọ, ayen de kpo ekogho ri Dalmanuta.
11 Ihwo ri Farisi na de bro rhe vwẹ etinẹ, kẹ ayen nene phraphro, rẹ ayen vwọ vuẹ nẹ o ru oka nẹ odjuvwu rhe, rere ayen vwọ davwọn ni.
12 Ọtiọyena o de ku ẹwẹn totọ, ọ da tanẹ: “Diesorọ uvwiẹ nana vwọ guọnọ oka? Uyota me ta na nẹ, e che dje oka vuọvo kẹ uvwiẹ nana-a.”
13 Ọtiọyena ọ da yanjẹ ayen vwo, ọ da rhoma ro okọ, o de kpo ẹbẹre ochekọ rẹ abadi na.
14 Ẹkẹvuọvo ayen karophiyọ ghwa ibrẹdi nene oma-a, ọtiọyena ayen rhe vwo emu vuọvo vwevunrẹ okọ na-a jokparẹ ibrẹdi ọvuọvo.
15 Ọ da kẹ ayen orhọesio phephẹn nẹ: “Ovwan rhiẹro rẹ ovwan phiyọ; ovwan nomaso kpahen iphuephu rẹ ihwo ri Farisi kugbe iphuephu ri Hẹrọd.”
16 Ọtiọyena kẹ ayen nene omoma rayen phraphro kidie nẹ ayen vwo ibrẹdi-i.
17 Ro vwo ni ọnana so, ọ da ta kẹ ayen nẹ: “Diesorọ ovwan vwọ phraphro nẹ ovwan vwo ibrẹdi-i? Ovwan je rhe riẹn ji vwo ẹruọ? Udu rẹ ovwan ji rhi vwo ẹruọ?
18 ‘Dede nẹ ovwan vwo ẹro, ovwan mrorẹ-ẹ; dede nẹ ovwan vwo erhọ, ovwan nyẹme-e.’ Ovwan rha karophiyọ
19 uche ibere re vọnre vẹ e ra re chekọ rẹ ovwan kokori ọke mi vwo bru ibrẹdi iyorin vwọ kẹ eshare 5,000 na? Ayen da ta kẹ nẹ: “Ihwivẹ.”
20 Ọke mi vwo bru ibrẹdi ighwrẹn vwọ kẹ eshare 4,000 na, bro ibere ride re vọnre vẹ e ra re chekọ yen ovwan kokori?” Ayen da ta kẹ nẹ: “Ighwrẹn.”
21 Ọtiọyena ọ da ta kẹ ayen nẹ: “Ovwan ji rhi vwo ẹruọ?”
22 Asaọkiephana ayen da domaji vwẹ Bẹtsaida, ihwo de mu ọshare ọvo ro rhuẹro bro rhe vwẹ etinẹ, ayen da rẹ nẹ o djobọte.
23 Ọ da yọnrọn obọ rẹ ọshare ro rhuẹro na, ọ da reyọ kpo otafe rẹ ọko na. Ro vwo dje enya ku ẹro rọyen nu, ọ da ghwabọ kpahọn, ọ da nọ nẹ: “Die yen wọ mrẹ?”
24 Ọshare na da kpare opharo kpenu, ọ da tanẹ: “Me mrẹ ihwo, ẹkẹvuọvo ayen họhọ irhe re yancha yankpo.”
25 Ọ da rhoma ghwabọ kpahen ẹro rẹ ọshare na, ọshare na da mrorẹ fiotọ, ẹro rọyen de shephiyọ, kọ sa nabọ mrẹ erọnvwọn eje fiotọ.
26 Ọtiọyena o de siobọno kpo uwevwin rọyen, ọ da ta kẹ nẹ: “Wọ rua evunrẹ ọko na-a.”
27 Asaọkiephana Jesu vẹ idibo rọyen ki kpo eko ri Sizaria Filipae, rẹ ayen vwọ hẹ idjerhe yanran na, kọ nọ idibo rọyen nẹ: “Ono yen ihwo tanẹ me hepha?”
28 Ayen da ta kẹ nẹ: “Jọn ro Brẹ Ihwo Phiyame, ẹkẹvuọvo efa tanẹ Ilaija, efa je tanẹ ọvo vwẹ usun rẹ emraro na.”
29 Ọ da nọ ayen nẹ: “Kẹ ovwan vwo, ono yen ovwan tanẹ me hepha?” Pita da kpahen kẹ nẹ: “Wẹwẹ yen Kristi na.”
30 Ọtiọyena o de si ayen orhọ gangan nẹ ayen vuẹ ohwo vuọvo kpahan ọye-en.
31 Vwọba, ko yono ayen nẹ Ọmọ rẹ ohwo na cha rioja rẹ erọnvwọn buebun, ekpako na kugbe irherẹn ride na kugbe isiẹbe na cha siọn ji hwe, ẹdẹ erha da wan nu ko che vrẹn.
32 Vwọrẹ uyota, azagba yen ọ da ta eta nana. Ẹkẹvuọvo Pita da reyọ kpo ọkọkọ, kọ ghwọkuo.
33 Ọtiọyena o de kuomarhẹriẹ, o de ni idibo rọyen, ọ da ghwọku Pita rọ vwọ tanẹ: “Wan nẹ etinẹ, Eshu! kidie ọ dia iroro rẹ Ọghẹnẹ yen wo roro-o, ẹkẹvuọvo ọ rẹ ihworakpọ.”
34 Asaọkiephana o de se otu na vẹ idibo rọyen te oma, ọ da ta kẹ ayen nẹ: “Ọ da dianẹ ohwo guọnọ nene uvwe, e jẹ ọ sen oma rọyen rere o mu urhe rẹ oja* rọyen rere o rhe nene uvwe.
35 Kidie kohwo kohwo rọ guọnọ sivwin arhọ* rọyen che kuo kufia, ẹkẹvuọvo kohwo kohwo ro ku arhọ* rọyen kufia fiki mẹ kugbe fikirẹ iyẹnrẹn esiri na che sivwon.
36 Vwọrẹ uyota, erere vọ yen che te ohwo siẹrẹ o de vwo akpọ na ejobi, jẹ o ku arhọ* rọyen kufia?
37 Vwọrẹ uyota, die yen ohwo cha vwọ kpahotọ vwo wene arhọ* rọyen?
38 Kidie kohwo kohwo rẹ oma voro fiki mẹ kugbe eta mẹ vwevunrẹ uvwiẹ rẹ igberadja* nana rọ je vọn vẹ umwemwu na, oma je cha vo Ọmọ rẹ ohwo fiki rọyen ọke rọ da rhe vwevunrẹ urinrin rẹ Ọsẹ rọyen vẹ emekashe efuanfon na.”
Eta rehẹ obotọ na
^ Yẹrẹ “owẹnvwe.”
^ Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “uvwiẹ ro jẹ evun ẹfuọn.”