Matiu 11:1-30
11 Ọke ri Jesu vwọ vwẹ odjekẹ vwọ kẹ idibo rọyen 12 na nu, o de vrẹn nẹ etiyin re yono ji ghwoghwo vwẹ irere rayen.
2 Ẹkẹvuọvo, Jọn vwo nyo kpahen iruo ri Kristi na vwevunrẹ uwodi rọ hepha, o de ji idibo rọyen
3 ra nọ nẹ: “Wẹwẹ yen Ohwo rọ Cha na, gbanẹ avwanre rhẹro rẹ ohwo ọfa?”
4 Jesu da kpahen kẹ ayen nẹ: “Ovwan yanran ra niyẹnrẹn rẹ oborẹ ovwan nyo kugbe oborẹ ovwan mrẹ na kẹ Jọn:
5 Irhuẹro mrorẹ asaọkiephana, ikpono yan, e ruẹ ehọnvwoti fuan, idierhọ nyẹme, a kpare ihwo ri ghwuru vrẹn, e ji ghwoghwo iyẹnrẹn esiri na kẹ igbere.
6 Omavwerhovwẹn dia vwọ kẹ ohwo rọ mrẹ emu vuọvo rọ so ekprowọ kẹ vwẹ oma mẹ-ẹ.”
7 Rẹ enana vwọ hẹ idjerhe yanran, Jesu kọ ta ota kẹ otu na kpahan Jọn nẹ: “Die yen ovwan kpo evunrẹ atọn na re ni? Okankọn* rẹ odju djuẹ?
8 Kẹ die yen ovwan tobọ re ni? Ọshare ro ku iwun iyoyovwin* phiyọ? Nighere, ihwo ri kuẹ iwun iyoyovwin* phiyọ hẹ evunrẹ iwevwin rẹ ivie.
9 Kẹ die yen ghene nẹrhẹ ovwan kpo otafe? Ovwan ra mrẹ ọmraro? E, me ta kẹ ovwan nẹ, ọ rho vrẹ ọmraro shesheri.
10 Ọnana yen ohwo re si kpahen nẹ: ‘Nighere! mi jẹ ikọn mẹ kobaro kẹ wẹ, ohwo rọ cha rhuẹrẹ idjerhe wẹn phiyotọ hẹrhẹ owẹ!’
11 Uyota me ta kẹ ovwan nẹ, vwẹ usun rẹ ihwo rẹ eya vwiẹre, a je rhe mrẹ ohwo vuọvo rọ rho nọ Jọn ro Brẹ Ihwo Phiyame-e, ẹkẹvuọvo ohwo rọ hanvwere vwẹ Uvie rẹ idjuvwu na rho nọ.
12 Vwo nẹ ọke ri Jọn ro Brẹ Ihwo Phiyame rhi te ọke nana, Uvie rẹ idjuvwu na yen oborẹ ihwo vwọtua, ihwo re vwọtua ọkieje yen sa ruọ.*
13 Kidie ayen eje, Emraro na kugbe Urhi na, mraro rhi te ọke ri Jọn;
14 ovwan da guọnọ rhiabọreyọ, ọyen yen ‘Ilaija rọ cha rhe na.’
15 E jẹ ohwo ro vwo erhọ nyo.
16 “Ono yen me cha vwẹ uvwiẹ nana vwo dje? Ọ họhọ imitete ri chidia vwẹ afieki ri kperẹ se ihwo ri nene ayen heha,
17 nẹ: ‘Avwanre hworo iflutu kẹ ovwan, ẹkẹvuọvo ovwan gbeha-a; avwanre vwerhe oma, ẹkẹvuọvo ovwan ghwiẹ oma rẹ ovwan vwọrẹ uvweri-i.’
18 Vwẹ idjerhe vuọvo na, Jọn rhere, ọ rere-e, ọ dare-e, ẹkẹvuọvo ihwo tanẹ, ‘O vwo ẹwẹn rẹ Idẹbono.’
19 Ọmọ rẹ ohwo rhere, ọ ria, ọ je da, ẹkẹvuọvo ihwo tanẹ, ‘Nighere! Ọgbọre kugbe ọgbaudi yen o ruẹ, ugbeyan rẹ ihwo ri phi osa uyovwin kugbe irumwemwu.’ Dedena e dje aghwanre phiyọ ọvwata* womarẹ iruo rọyen.”*
20 Kọ hanrha irere ro de ru buebun rẹ iruo rẹ igbevwunu rọyen, kidie ayen kurhẹriẹ-ẹ:
21 “Okpetu rode kẹ wẹ, Korazin! Okpetu rode kẹ wẹ, Bẹtsaida! kidie ọ da dianẹ e ruiruo rẹ igbevwunu re ruru vwevunrẹ ovwan vwẹ Taya kugbe Saidọn, mane jẹ ayen kurhẹriẹ ọke grongron re vwevunrẹ emwa rẹ esiso kugbe iwurhie.
22 Ẹkẹvuọvo me ta kẹ ovwan nẹ, ọ cha bra vwọ kẹ ovwan vwẹ Ẹdẹ rẹ Ẹdjọeguo na vwọ vrẹ Taya kugbe Saidọn.
23 Kugbe owẹ, Kepanọm, a cha kpare owẹ kpenu kpo odjuvwu? Obotọ vwevunrẹ Ushi* ọyen wọ cha ra; kidie ọ da dianẹ iruo rẹ igbevwunu re phiare vwẹ evun wẹn phiare vwẹ Sodọm, mane ọ rha dia te nonẹna.
24 Ẹkẹvuọvo me ta kẹ ovwan nẹ, ọ cha bra vwọ kẹ wẹ vwẹ Ẹdẹ rẹ Ẹdjọeguo na vwọ vrẹ otọ ri Sodọm.
25 Vwẹ ọke yena Jesu da kpahen nẹ: “Mi jiri uwe vwẹ azagba, Ọsẹ, Ọrovwori rẹ idjuvwu kugbe akpọ, kidie wo si erọnvwọn nana nu vwọ kẹ evwaghwanre kugbe ihwo re riẹn ẹbe, wo de dje ayen phia vwọ kẹ imitete.
26 E, Ọsẹ, kidie ọnana yen idjerhe ru wọ rhọnvwephiyọ.
27 Ọsẹ mẹ phi erọnvwọn eje phiyọ ovwẹ obọ re, o vwo ohwo vuọvo rọ nabọ riẹn Ọmọ na-a jokparẹ Ọsẹ na; o ji vwo ohwo vuọvo rọ nabọ riẹn Ọsẹ na-a jokparẹ Ọmọ na kugbe kohwo kohwo rẹ Ọmọ na vwo owenvwe ro vwo dje kẹ.
28 Ovwan bru vwe rhe, ovwan eje re wian gangan re ji krun oghwa nyẹ, me cha kẹ ovwan omaerovwon.*
29 Ovwan mu urhekpe mẹ, ovwan ji yono mie vwe, kidie me pha dẹndẹn, me je vwomakpotọ vwevunrẹ ubiudu, kẹ ovwan cha mrẹ omaerovwon kẹ oma* rẹ ovwan.
30 Kidie urhekpe mẹ pha phapharhe,* oghwa mẹ je họhọ-ọ.”*
Eta rehẹ obotọ na
^ Okankọn ọvo rọ pha tẹnrẹnrẹn grongron rọ djẹ vwẹ orhoma rẹ urhie.
^ Vwẹ Grik, “iwun elọlọhọ.”
^ Vwẹ Grik, “iwun elọlọhọ.”
^ Vwẹ Grik, “yen sa yọnrọn.”
^ Yẹrẹ “e bru kẹ aghwanre.”
^ Yẹrẹ “obo ro ru phia.”
^ Yẹrẹ “Hades,” kọyen, ushi re shi ihwo phiyọ. Ni Eta re Vwomaphia.
^ Yẹrẹ “ogangan.”
^ Yẹrẹ “erhi.” Ni Eta re Vwomaphia.
^ Yẹrẹ “ọ lọhọre e vwo mu urhekpe mẹ.”
^ Yẹrẹ “je pha frae. ”