Matiu 14:1-36
14 Vwẹ ọke yena, Hẹrọd rọ dia osun rẹ ubrakpọ na de nyo kpahen Jesu
2 ọ da ta kẹ idibo rọyen nẹ: “Ọnana Jọn ro Brẹ Ihwo Phiyame na. A kparerọ nẹ ughwu, kọyensorọ o vwo ruiruo rẹ igbevwunu nana.”
3 Hẹrọd* mu Jọn, ọ da gba, o de do phiyọ uwodi fikirẹ Hẹrodias, aye rẹ oniọvo rọyen Filip.
4 Kidie Jọn vuẹ kọke kọke nẹ: “Urhi rhọnvwere nẹ wọ reyọ-ọ.”
5 Ẹkẹvuọvo, dede nẹ ọ guọnọ hwe, jẹ ọ djoshọ rẹ otu na kidie ayen niro nẹ ọyen ọmraro.
6 Ẹkẹvuọvo, ọke rẹ ayen vwọ ria orẹ rẹ ẹdevwiẹ ri Hẹrọd, ọmọtẹ ri Hẹrodias de gbeha vwẹ irueru na, oma da vwerhen Hẹrọd gangan
7 te ẹdia ro vwo ve ive kẹ womarẹ iyorin eduvwon nẹ ọyen cha vwẹ kemu kemu rọ nokpẹn rọyen vwọ kẹ.
8 Ọtiọyena vwo nene oborẹ oni rọyen vuẹrẹ, ọmọtẹ na da tanẹ: “Kẹ vwẹ uyovwin ri Jọn ro Brẹ Ihwo Phiyame na vwẹ ọsete ọphẹphẹghẹ vwẹ etinẹ.”
9 Dede nẹ ọ da ovie na, jẹ fikirẹ iyorin ro duvwunru kugbe ihwo re vẹ ọyen gba riemu na,* o de jurhi nẹ a vwọ kẹ.
10 O de ji ohwo yanran nẹ o re bru uyovwin ri Jọn no vwẹ uwodi.
11 E de mu uyovwin rọyen phiyọ ọsete ọphẹphẹghẹ rhe, e de muo kẹ ọmọtẹ na, ọmọtẹ na de muo rhe oni rọyen.
12 Ọke vwọ yan obaro, idibo rọyen da rhe, ayen de mu orivwin rọyen re shi; ayen da rhe rhe niyẹnrẹn kẹ Jesu.
13 Jesu vwo nyo ọnana, ọ da ro okọ nẹ etiyin vwo kpo asan ro sherabọ kẹ irere na rere ọyen ọvo dia. Ẹkẹvuọvo otu na vwo nyo kpahọn, ayen da vwẹ owọ yan nẹ irere na nene.
14 Ọke ro vwo wontọ nẹ okọ na, ọ da mrẹ otu buebun, aro rayen da dọn, o de sivwin ihwo rayen re muọga.
15 Ẹkẹvuọvo ovwọnvwọn vwo te, idibo rọyen de bro rhe, ayen da ta kẹ nẹ: “Etinẹ na sherabọ kẹ irere na, ọke ji she re; siobọnẹ otu na rere ayen ro evunrẹ eko na ra dẹ emu re.”
16 Ẹkẹvuọvo Jesu da ta kẹ ayen nẹ: “O vwo oboresorọ ayen vwọ yanra-an; ovwan kẹ ayen oborẹ ayen cha re.”
17 Ayen da ta kẹ nẹ: “Avwanre vwo emu ọvuọvo vwẹ etinẹ-ẹ, jokparẹ ibrẹdi iyorin kugbe erin ivẹ.”
18 Ọ da tanẹ: “Ovwan reyọ ayen rhe vwe vwẹ etinẹ.”
19 Ọ da vuẹ otu na nẹ ayen chidia totọ vwẹ enu rẹ odi na. Ọ da reyọ ibrẹdi iyorin kugbe erin ivẹ na, ọ da kpare opharo rọyen ni odjuvwu, ọ da nẹrhovwo, ro vwo bru ibrẹdi na nu, ọ da vwẹ ayen kẹ idibo na, idibo na da vwẹ ayen kẹ otu na.
20 Ọtiọyena ayen ejobi da re, evun da vọn ayen, ayen da ghwẹ e ra re chekọ na koko, e vọn ibere 12.
21 Asaọkiephana ihwo re riemu na te omarẹ eshare 5,000 kugbe eya vẹ imitete.
22 Ọtiọyena vwọrẹ jẹ ọke ehwe, ọ da tanẹ idibo rọyen ro okọ rere ayen kobaro kẹ ọyen kpo ẹbẹre ochekọ na, rẹ ayen vwọ yanran na, o de siobọnẹ otu na.
23 Ro vwo siobọnẹ otu na nu, ọyen ọvo de kpo enu rẹ ugbenu na ra nẹrhovwo. Ovwọnvwọn vwo te, ọyen ọvo kọyen hẹ etiyin.
24 Asaọkiephana okọ na vwẹ iyadi* ujorin buebun vwo sheri kẹ otọ na re, jẹ ayen nene ọgbogho na muabọ kidie odju na kpokpo ayen.
25 Ẹkẹvuọvo vwẹ orhẹrẹ rẹne rẹ ason na,* o de bru ayen rhe, jẹ ọ yan vwẹ enu rẹ abadi na.
26 Ọke rẹ ayen vwọ mrẹ rọ yan vwẹ enu rẹ abadi na, oshọ de mu idibo na, ayen da tanẹ: “Ọnana evwerhẹn!” Ayen de kperi phia vwọrẹ oshọ.
27 Ẹkẹvuọvo ugege yena Jesu da ta kẹ ayen nẹ: “Ovwan fiudugberi! Omẹvwẹ; ovwan djoshọ-ọ.”
28 Pita da kpahen kẹ nẹ: “Ọrovwori, ọ da dia owẹ, gba vuẹ vwẹ nẹ mi bru we rhe vwẹ enu rẹ ame na.”
29 Ọ da tanẹ: “Yanrhe!” Ọtiọyena Pita de nẹ evunrẹ okọ na, kọ yan vwẹ enu rẹ ame na brẹ Jesu ra.
30 Ẹkẹvuọvo ro vwo nẹ ogiribo na oshọ ko muo. Ọke ro vwo divwẹn o de kperi phia nẹ: “Ọrovwori, sivwin uvwe!”
31 Ugege yena rọ vwọ riẹn obọ rọyen phia Jesu da yọnrọn, ọ da ta kẹ nẹ: “Wẹwẹ ro vwo esegbuyota tutuno na, diesorọ wo vwo vwo ẹwẹn ivivẹ?”
32 Ọke rẹ ayen vwọ ro evunrẹ okọ na nu, ogiribo na da fọ.
33 Ọtiọyena ihwo rehẹ evunrẹ okọ na da vwẹ uyovwin kpotọ kẹ, kẹ ayen tanẹ: “Wẹwẹ ghene Ọmọ rẹ Ọghẹnẹ.”
34 Ayen de bi vrẹ vwo kpo ẹbẹre ochekọ na, ayen de rhi duvwun vwẹ Gẹnẹsarẹt.
35 Ọke rẹ ihwo rẹ asan na vwo vughe, ayen da vwẹ ovuẹ vwo kpo irere eje re riariẹ ayen phiyọ, ihwo na de mu ihwo eje re muọga bro rhe.
36 Ayen da rẹ nẹ o jẹ ayen di djobọte ejọjọ rẹ ewun rẹ obotafe rọyen, oma rẹ ihwo eje ri djobọte de kpo karekare.
Eta rehẹ obotọ na
^ Kọyen, Hẹrọd Antipas. Ni Eta re Vwomaphia.
^ Yẹrẹ “gbe chidia imẹjẹ kugbe na.”
^ Vwẹ Grik, “istediọmu buebun.” Istediọmu ọvo vẹ imita 185 (ichiyin 606.95) abavo.
^ Kọyen, omarẹ ughọjọ 3 rẹ urhiọke re te ọke rẹ ọnre vwọ varhe vwẹ omarẹ ughọjọ 6 rẹ urhiọke.