Matiu 15:1-39
15 Ọyena vwọ wan nu, ihwo ri Farisi kugbe isiẹbe de nẹ Jerusalẹm bru Jesu rhe, ayen da tanẹ:
2 “Diesorọ idibo wẹn vwo jẹ ẹkuruemu rẹ ihwo awanre na enene? Kerẹ udje, ayen hworhẹ* abọ rayen ọke rẹ ayen da guọnọ riemu-u.”
3 Ọ da kpahen kẹ ayen nẹ: “Diesorọ ovwan vwo jẹ iji rẹ Ọghẹnẹ enene fikirẹ ẹkuruemu rẹ ovwan?
4 Kerẹ udje, Ọghẹnẹ tare nẹ, ‘Muọghọ kẹ ọsẹ wẹn vẹ oni wẹn,’ ọ je tanẹ, ‘E jẹ e hwe kohwo kohwo rọ ta eta ebrabra kpahen* ọsẹ yẹrẹ oni rọyen.’
5 Ẹkẹvuọvo ovwan tanẹ, ‘Kohwo kohwo rọ ta kẹ ọsẹ yẹrẹ oni rọyen nẹ: “Kemu kemu ri mi vwori ro se fierere kẹ wẹ ọyen okẹ ra vwọ kpahotọ kẹ Ọghẹnẹ,”
6 o rhe fo nẹ o muọghọ kẹ ọsẹ rọyen kakaka-a.’ Ọtiọyena ovwan ru ota rẹ Ọghẹnẹ phiyọ obo ri fiemu-u fikirẹ ẹkuruemu rẹ ovwan.
7 Ovwan ihwo rẹ omeru na, Aizaya nabọ mraro kpahen ovwan gbagba rọ vwọ tanẹ:
8 ‘Ihwo nana vwẹ ẹbẹrunu rayen vwo muọghọ kẹ vwẹ, ẹkẹvuọvo ubiudu rayen pha shesheri kẹ vwẹ.
9 Ẹga rẹ ayen vwọ kẹ vwẹ ofefe, kidie iji rẹ ihworakpọ yen ayen yono.’”
10 Ọtiọyena o de se otu na te oma, ọ da ta kẹ ayen nẹ: “Ovwan kerhọ rere ovwan vwo ẹruọ rọyen:
11 Ọ dia obo re ro unu rẹ ohwo yen gbe ẹgua-a, ẹkẹvuọvo obo ri nẹ unu rọyen rhe yen gbe ẹgua.”
12 Idibo na da rhe, ayen da ta kẹ nẹ: “Wọ riẹnre nẹ obo wọ tare na so ekprowọ kẹ ihwo ri Farisi na?”
13 Ọ da kpahen kẹ ayen nẹ: “Kokankọn kokankọn rẹ Ọsẹ mẹ rọhẹ obodjuvwu na kọnre-e, e che ghwie.
14 Ovwan yanjẹ ayen vwo. Isun ri rhuẹro yen ayen ruẹ. Ọtiọyena ọ da dianẹ orhuẹro sun orhuẹro, ayen ihwo ivẹ na che she phiyọ ọgọdọ.”
15 Pita da kpahen nẹ: “Ru udje na phẹn kẹ avwanre.”
16 Ọtiọyena ọ da tanẹ: “Ovwan ji vwo ẹruọ rọye-en?
17 Ovwan rha riẹn nẹ kemu kemu rọ ro unu na wanvrẹ kpo evun na, e mi ne phiyọ ukpotọ?
18 Ẹkẹvuọvo kemu kemu ro nẹ unu na rhe, evunrẹ ubiudu na yen o nurhe, erọnvwọn yena yen gbe ohwo ẹgua.
19 Kerẹ udje, ubiudu na yen iroro rẹ umwemwu nẹcha: ozighẹ-ẹdẹ, igberadja, ọfanrhiẹn,* ujiecho, oseri rẹ efian, eta rẹ ẹgua.
20 Erọnvwọn nana yen gbe ohwo ẹgua; ẹkẹvuọvo abọ ra hworhẹre* tavwen a ke riemu-u gbe ohwo ẹgua-a.”
21 Jesu vwo vrẹn nẹ etiyin, o de kpo ekogho ri Taya kugbe Saidọn.
22 Nighere! aye ri Fonisha ọvo ro nẹ ekogho yena rhe da rhe, o de kperi phia nẹ: “Gbe arodọnvwẹ kẹ vwẹ, Ọrovwori, Ọmọ ri Devid. Ẹwẹn rẹ Idẹbono gboja kẹ ọmọtẹ mẹ gangan.”
23 Ẹkẹvuọvo ọ kpahen ota vuọvo kẹ-ẹ. Ọtiọyena idibo rọyen da rhe, kẹ ayen vuẹ nẹ: “Djẹ yanran, kidie o kperẹ nene avwanre.”
24 Ọ da kpahen nẹ: “E ji vwe bru ohwo vuọvo ra-a, jokparẹ igodẹ rẹ uwevwin rẹ Izrẹl ri ghwruru.”
25 Ẹkẹvuọvo aye na da rhe, ọ da vwẹ uyovwin kpotọ kẹ, rọ vwọ tanẹ: “Ọrovwori, cha vwẹ uko!”
26 Ọ da kpahen nẹ: “Ofori ra vwọ reyọ ibrẹdi rẹ emọ na, e mi do vwọ kẹ emeranko-o.”
27 Aye na da tanẹ: “E, Ọrovwori, ẹkẹvuọvo emeranko na ria i ri she nẹ imẹjẹ rẹ inini rayen.”
28 Ọtiọyena Jesu da kpahen kẹ aye na nẹ: “E aye, esegbuyota wẹn rhoro; jẹ ọ phia kẹ wẹ kirobo ru wọ guọnọre.” Vwo nẹ unọke yena yanran oma rẹ ọmọtẹ rọyen na da gan.
29 Ro vwo vrẹn nẹ etiyin, Jesu de sikẹrẹ Abadi ri Galili, ro vwo yerin kpo enu rẹ ugbenu na nu, o de chidia etiyin.
30 Ihwo buebun de bro rhe, ayen mu ikpono, ikrabọ yẹrẹ ikrawọ, irhuẹro, ihwo re sa ta ota-a, kugbe ihwo efa buebun nene oma, ayen de mu ayen phiyọ asan awọ rọyen, o de sivwin ayen.
31 Ọtiọyena, o de gbe otu na unu ọke rẹ ayen vwọ mrẹ ihwo re sa ta ota-a re ta ota, ikrabọ yẹrẹ ikrawọ rẹ oma rayen kpori, ikpono re yan kugbe irhuẹro re mrorẹ, ayen da vwẹ urinrin kẹ Ọghẹnẹ rẹ Izrẹl.
32 Ẹkẹvuọvo Jesu de se idibo rọyen, ọ da tanẹ: “Aro rẹ otu na dọn vwẹ, kidie etiyin ẹdẹ erha yen ayen vẹ ovwe vwọ herọ re, jẹ ayen vwo orọnvwọn vuọvo rẹ ayen cha re-e. Me guọnọ siobọnẹ ayen kpo vẹ evun fefe-e, kidie ayen se shero vwẹ idjerhe.”
33 Ẹkẹvuọvo idibo na da ta kẹ nẹ: “Tivọ yen avwanre da sa mrẹ ibrẹdi rọ cha vọn otu nana evun vwẹ etinẹ na ro sherabọ kẹ irere na?”
34 Ọtiọyena Jesu da ta kẹ ayen nẹ: “Bro ibrẹdi yen ovwan vwori?” Ayen da tanẹ: “Ighwrẹn, kugbe erin evo tutuno.”
35 Ọtiọyena rọ vwọ vuẹ otu na nẹ ayen chidia totọ nu,
36 ọ da reyọ ibrẹdi ighwrẹn na kugbe erin na, rọ vwọ kpẹvwẹ Ọghẹnẹ nu, o de bru ayen, kọ vwẹ ayen kẹ idibo na, idibo na da vwẹ ayen kẹ otu na,
37 ayen eje da re, evun da vọn ayen, ayen de koko ibere ride ighwrẹn re vọnre vẹ e ra re chekọ.
38 Asaọkiephana eshare 4,000 yen riemu na, kugbe eya vẹ imitete.
39 Ukuotọ rọyen ro vwo siobọnẹ otu na nu, ọ da ro okọ, o de kpo ekogho ri Magadan.
Eta rehẹ obotọ na
^ Kọyen, a vwọ hworhẹ vwo nene urhi.
^ Yẹrẹ “rọ hanrhe.”
^ Vwẹ Grik, por·nei′a, siẹrẹ a da reyọ vwọ ta ota kpahen orọnvwọn rọ vrẹ ọvo. Ni Eta re Vwomaphia.
^ Kọyen, ra hworhẹre vwo nene urhi-i.