Matiu 16:1-28
16 Ihwo ri Farisi kugbe Sadiusi na de bro rhe etinẹ, rẹ ayen vwọ davwọn ni, ayen da vuẹ nẹ o ru oka nẹ odjuvwu rhe vwọ kẹ ayen.
2 Ọ da kpahen kẹ ayen nẹ: “Ovwọnvwọn de te ovwan me tanẹ, ‘Aruọke na che yovwin, kidie enu na vwara kerẹ erhanre,’
3 urhiọke de rhe te ovwan me tanẹ, ‘ekpahen cha dia, osio je cha rhọ nonẹna kidie enu na vwara kerẹ erhanre ẹkẹvuọvo o bi phiyọ.’ Ovwan se djisẹ rẹ oborẹ enu na hepha, ẹkẹvuọvo ovwan vwo ẹruọ rẹ eka rẹ ọke na-a.
4 Uvwiẹ umwemwu kugbe igberadja* na rha guọnọ oka, ẹkẹvuọvo e che dje oka vuọvo kẹ-ẹ, jokparẹ oka ri Jona.” Ọtiọyena ọ da yanjẹ ayen vwo, ọ da yanran.
5 Asaọkiephana idibo na da wanvrẹ kpo ẹbẹre ochekọ na, jẹ ayen karophiyọ ghwa ibrẹdi nene oma-a.
6 Jesu da ta kẹ ayen nẹ: “Ovwan rhiẹro rẹ ovwan phiyọ, ovwan ji nomaso kpahen iphuephu* rẹ ihwo ri Farisi kugbe Sadiusi na.”
7 Ọtiọyena kẹ ayen ta kẹ omoma rayen nẹ: “Avwanre ghwa ibrẹdi vuọvo nene oma-a.”
8 Jesu vwọ riẹn ọnana, ọ da tanẹ: “Diesorọ ovwan vwọ ta kẹ ohwohwo nẹ ovwan vwo ibrẹdi-i, ovwan ri vwo esegbuyota tutuno na?
9 Ovwan ji rhi vwo ẹruọ rẹ ẹkpo na, gbanẹ ovwan rha karophiyọ ibrẹdi iyorin re me vwọ ghẹrẹ ihwo 5,000 na kugbe uche ibere rẹ ovwan kokori-i?
10 Yẹrẹ ibrẹdi ighwrẹn re me vwọ ghẹrẹ ihwo 4,000 na kugbe uche ibere ride rẹ ovwan kokori-i?
11 Diesorọ ovwan vwo jẹriẹn nẹ ọ dia ibrẹdi yen me ta ota kpaha-an? Ẹkẹvuọvo ovwan nomaso kpahen iphuephu* rẹ ihwo ri Farisi kugbe Sadiusi na.”
12 Ayen da rhe riẹn nẹ ọ dia iphuephu* rẹ ibrẹdi yen ọ tanẹ ayen nomaso kpahe-en, ẹkẹvuọvo uyono rẹ ihwo ri Farisi kugbe Sadiusi na.
13 Ọke ro vwo te ekogho ri Sizaria Filipae, Jesu da nọ idibo rọyen nẹ: “Ono yen ihwo tanẹ Ọmọ rẹ ohwo na hepha?”
14 Ayen da tanẹ: “Evo nẹ Jọn ro Brẹ Ihwo Phiyame, efa nẹ Ilaija, efa je tanẹ Jerimaya yẹrẹ ọvo vwẹ usun rẹ emraro na.”
15 Ọ da ta kẹ ayen nẹ: “Kẹ ovwan vwo, ono yen ovwan tanẹ me hepha?”
16 Saimọn Pita da kpahen nẹ: “Wẹwẹ yen Kristi na, Ọmọ rẹ Ọghẹnẹ ro jeghwo na.”
17 Jesu da kpahen kẹ nẹ: “Omavwerhovwẹn dia kẹ wẹ, Saimọn ọmọ ri Jona, kidie ọ dia uvwo vẹ ọbara* yen djere kẹ wẹ-ẹ, ẹkẹvuọvo Ọsẹ mẹ rọhẹ obodjuvwu na yen djere kẹ wẹ.
18 Vwọba, me ta kẹ wẹ nẹ: Wẹwẹ Pita, enu rẹ oragha nana yen me cha bọn ukoko mẹ phiyọ, anurhoro rẹ Ushi* cha sa gan nọ-ọ.
19 Me cha kẹ wẹ isiaphrẹ rẹ Uvie rẹ idjuvwu na, kemu kemu ru wọ gbare vwẹ akpọ na, jẹ a gbarọ vwẹ idjuvwu nure, kemu kemu ru wọ rhanre vwẹ akpọ na, jẹ a rhanrọ vwẹ idjuvwu nure.”
20 O de si idibo na orhọ gangan nẹ ayen vuẹ ohwo vuọvo nẹ ọyen yen Kristi na-a.
21 Vwo nẹ ọke yena yanran, Jesu ko dje kẹ idibo rọyen nẹ ọyen che kpo Jerusalẹm, ọyen cha rioja rẹ erọnvwọn buebun vwẹ obọ rẹ ekpako na kugbe irherẹn ride kugbe isiẹbe na, e che hwe ọyen, vwẹ ẹdẹ rerha, ka cha kpare ọyen vrẹn.
22 Ọtiọyena Pita da reyọ kpo ọkọkọ, kọ ghwọkuo rọ vwọ tanẹ: “Wọ ta oka rẹ ota ọtiọyena kpahen oma wẹ-ẹn Ọrovwori; erọnvwọn nana cha phia kẹ wẹ kakaka-a.”
23 Ẹkẹvuọvo ro vwo kuomarhẹriẹ, ọ da ta kẹ Pita nẹ: “Wan nẹ etinẹ, Eshu! Wẹwẹ ekprowọ vwọ kẹ vwẹ, kidie ọ dia iroro rẹ Ọghẹnẹ yen wo roro-o, ẹkẹvuọvo ọ rẹ ihworakpọ.”
24 Jesu da ta kẹ idibo rọyen nẹ: “Ọ da dianẹ ohwo guọnọ nene uvwe, e jẹ ọ sen oma rọyen rere o mu urhe rẹ oja* rọyen rere o rhe nene uvwe.
25 Kidie kohwo kohwo rọ guọnọ sivwin arhọ* rọyen che kuo kufia, ẹkẹvuọvo kohwo kohwo ro ku arhọ* rọyen kufia fiki mẹ cha mrẹ.
26 Vwọrẹ uyota, erere vọ yen che te ohwo siẹrẹ o de vwo akpọ na ejobi, jẹ o ku arhọ* rọyen kufia? Yẹrẹ die yen ohwo cha vwọ kpahotọ vwo wene arhọ* rọyen?
27 Kidie Ọmọ rẹ ohwo na cha rhe vwevunrẹ urinrin rẹ Ọsẹ rọyen vẹ emekashe rọyen, ọke yena kọ cha hwosa kẹ ohwo ọvuọvo vwo nene uruemu rọyen.
28 Uyota me ta kẹ ovwan nẹ o vwo ihwo evo vwẹ usun rẹ ihwo ri mudia etinẹ na re cha davwen ughwu kakaka-a, jokpanẹ ayen mrẹ Ọmọ rẹ ohwo rọ cha vwevunrẹ Uvie rọyen tavwen.”
Eta rehẹ obotọ na
^ Yẹrẹ “Uvwiẹ umwemwu ro jẹ evun ẹfuọn.”
^ Yẹrẹ “iyisti.”
^ Yẹrẹ “iyisti.”
^ Yẹrẹ “iyisti.”
^ Yẹrẹ “kidie ọ dia ohworakpọ.”
^ Yẹrẹ “Hades,” kọyen, ushi re shi ihwo phiyọ. Ni Eta re Vwomaphia.
^ Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Yẹrẹ “erhi.” Ni Eta re Vwomaphia.