Matiu 18:1-35
18 Vwẹ unọke yena, idibo na de bru Jesu rhe ayen da tanẹ: “Ono yen ghene ma rho vwevunrẹ Uvie rẹ idjuvwu na?”
2 Ọtiọyena o de se omotete ọvo te oma, o de vwo mudia vwẹ ohri rayen
3 ọ da tanẹ: “Uyota me ta kẹ ovwan nẹ, jokpanẹ kẹ ovwan kurhẹriẹ rẹ ovwan da dia kerẹ imitete, o vwo ọke vuọvo rẹ ovwan cha vwọ ro Uvie rẹ idjuvwu na-a.
4 Ọtiọyena, kohwo kohwo rọ vwomakpotọ kerẹ omotete nana yen ohwo rọ ma rho vwevunrẹ Uvie rẹ idjuvwu na;
5 kohwo kohwo ro rhiabọreyọ omotete tiọna fikirẹ odẹ mẹ ji rhiabọreyọ ovwẹ.
6 Ẹkẹvuọvo kohwo kohwo rọ so ekprowọ kẹ ọvo vwẹ usun rẹ itete nana ri vwo esegbuyota kpahen ovwẹ na, o che yovwin ra vwọ gba ukuta rode ra vwọ lọ erọnvwọn rẹ ekẹkẹtẹ kiẹn si ohọre rọyen rere e do phiyọ abadi.
7 “Okpetu rode vwọ kẹ akpọ na fikirẹ ekprowọ na! Vwọrẹ uyota, ekprowọ che jẹ ẹcha-a, ẹkẹvuọvo okpetu rode vwọ kẹ ohwo rẹ ekprowọ na wan oma rọyen rhe!
8 Ọtiọyena, ọ da dianẹ obọ wẹn yẹrẹ owọ wẹn nẹrhẹ wọ kprowọ, bro no rere wo do kufia. O yovwirin wo vwo vwo arhọ vẹ ẹbẹre ọvo rẹ oma wẹn re bru no yẹrẹ kerẹ ukpono, vwọ vrẹ ọ re vwo do we vẹ abọ ivẹ kugbe awọ ivẹ phiyọ erhanre ri bẹdẹ.
9 Vwọba, ọ da dianẹ ẹro wẹn nẹrhẹ wọ kprowọ, yoro no rere wo do kufia. O yovwirin wo vwo vwo arhọ vẹ ẹro ọvo vwọ vrẹ ọ re vwo do we vẹ ẹro ivẹ phiyọ erhanre ri Gehina.*
10 Ovwan nomaso nẹ ovwan jẹ ọvo vwẹ usun rẹ itete nana fia-a, kidie me ta kẹ ovwan nẹ emekashe rayen vwẹ obodjuvwu vwẹ ọkieje vwo nẹ opharo rẹ Ọsẹ mẹ rọhẹ obodjuvwu.
11 *——
12 “Die yen ovwan rorori? Ọ da dianẹ ohwo ọvo vwo igodẹ 100 rẹ ọvo vwẹ usun rayen de bo ghwru, ọ cha yanjẹ 99 na vwo vwẹ enu rẹ ugbenu ra guọnọ ọvuọvo ro bo ghwru na?
13 Ọ da mrẹ, me vuẹ ovwan vwọrẹ uyota nẹ, ọ cha ghọghọ fiki rọyen vwọ vrẹ 99 ri bo ghwru-u na.
14 Vwẹ idjerhe vuọvo na, Ọsẹ mẹ* rọhẹ obodjuvwu na guọnọre nẹ ọvuọvo dede vwẹ usun rẹ itete nana ghwọrọ-ọ.
15 “Vwọ vrẹ ọyena, ọ da dianẹ oniọvo wẹn ru umwemwu, bro ra rere wo dje echobọ rọyen na kẹ* vwẹ uvwre wẹn vẹ ọyen ọvo. Ọ da kerhọ wẹn, kọyen wọ cha oniọvo wẹn uko vwo ru obo ri yovwirin.
16 Ẹkẹvuọvo ọ da dianẹ ọ kerhọ-ọ, gba reyọ ohwo ọvo yẹrẹ ivẹ nene oma, rere womarẹ ota* rẹ iseri ivẹ yẹrẹ erha, kota kota se vwo muẹro.
17 Ọ da dianẹ ọ kerhọ raye-en, gba ta ota kẹ ukoko na. Ọ rha je kerhọ rẹ ukoko na-a, gbe jẹ ọ dia kẹ wẹ kerẹ ohwo rẹ ẹgborho na kugbe kerẹ ohwo ro phi osa uyovwin.
18 “Uyota me ta kẹ ovwan nẹ, kemu kemu rẹ ovwan gbare vwẹ akpọ na cha dia obo ra gbare vwẹ obodjuvwu nure, kemu kemu rẹ ovwan rhanre vwẹ akpọ na cha dia obo ra rhanre vwẹ obodjuvwu nure.
19 Vwọrẹ uyota me rhoma ta kẹ ovwan nẹ, ọ da dianẹ ihwo ivẹ vwẹ usun rẹ ovwan rehẹ akpọ na rhọnvwe kugbe vwọ kpahen orọnvwọn ọghanghanre ọvo ro fori nẹ ayen nokpẹn rọyen, ọ cha dia ọtiọyen kẹ ayen fikirẹ Ọsẹ mẹ rọhẹ obodjuvwu.
20 Kidie asan rẹ ihwo ivẹ yẹrẹ erha de siomakoko vwẹ odẹ mẹ, me hẹ ohri rayen.”
21 Pita da rhe ọ da ta kẹ nẹ: “Ọrovwori, brabọ yen oniọvo mẹ che ru umwemwu vwọso ovwẹ ri mi de vwo ghovwo? Vwo te abọ ighwrẹn?”
22 Jesu da ta kẹ nẹ: “Me ta kẹ wẹ nẹ ọ dia vwo te abọ ighwrẹ-ẹn, ẹkẹvuọvo vwo te abọ 77.
23 “Kọyensorọ a sa vwọ reyọ Uvie rẹ idjuvwu na vwo dje ovie rọ guọnọre nẹ idibo rọyen hwosa rẹ ayen rere.
24 Ọke rẹ ayen vwọ hwosa na, e de mu ọshare ọvo rọ riosa rọyen italẹnti 10,000* rhe.
25 Ẹkẹvuọvo kidie nẹ o vwo obo rọ sa vwọ hwosa na rhivwi-in, onini rọyen da tanẹ a shẹ vẹ aye rọyen kugbe emọ rọyen kugbe erọnvwọn eje ro vwori, rere a reyọ vwọ hwosa na.
26 Ọtiọyena odibo na de shiguẹ ọ da vwẹ uyovwin kpotọ kẹ, ọ da tanẹ, ‘Vwo edirin mẹ, me cha hwosa na ejobi kẹ wẹ.’
27 Fikirẹ arodọnvwẹ, onini rẹ odibo yena da yan jovwo, ọ da je kpairoro vrẹ osa rọ rere na.
28 Ẹkẹvuọvo odibo yena da yanran, ọ da mrẹ ọvo vwẹ usun rẹ ihwo re vẹ ọyen gba dia idibo, rọ riosa rọyen idinari* 100, o de shabọ phiyọ, ọ da yọnrọn ohọre rọyen, jẹ ọ tanẹ, ‘Hwosa ri kemu kemu ru wọ rere.’
29 Ọtiọyena, ọ rọ vẹ ọyen gba dia odibo na de she teyen otọ, kọ rẹ nẹ, ‘Vwo edirin mẹ, me cha hwosa na kẹ wẹ.’
30 Ẹkẹvuọvo, ọ rhọnvwere-e, ọ da yanran o de re do phiyọ uwodi bẹsiẹ rọ vwọ hwosa rọ rere na rhivwin.
31 Ọke rẹ ihwo re vẹ ọyen gba dia idibo vwọ mrẹ obo re phiare na, o de kpokpo ayen ẹwẹn mamọ, ayen da yanran ra niyẹnrẹn rẹ erọnvwọn na eje re phiare na kẹ onini rayen.
32 Ọtiọyena onini rọyen de se, ọ da ta kẹ nẹ: ‘Odibo umwemwu na, me kpairoro vrẹ esa yena eje ọke wọ vwọ rẹ vwẹ.
33 O rhe fo nẹ wo ji gbe arodọnvwẹ kẹ ọ rẹ owẹ vẹ ọyen gba dia odibo kirobo ri mi gbe arodọnvwẹ kẹ wẹ na?’
34 Ọnana da nẹrhẹ ivun miovwo onini rọyen gangan, ọ da reyọ vwọ kẹ ihwo re rhẹrẹ uwodi na bẹsiẹ rọ vwọ hwosa rọ rere eje.
35 Ọtiọyen Ọsẹ mẹ rọhẹ obodjuvwu ji che ru kẹ ovwan, ọ da dianẹ ovwan ohwo ọvuọvo vwo ghovwo oniọvo rọyen vwo nẹ ubiudu rẹ ovwan rhe-e.”
Eta rehẹ obotọ na
^ Ni Eta re Vwomaphia.
^ Owọrota nana hẹ imanuskripti rẹ awanre evo-o, imuẹro je herọ nẹ ọ dia ẹbẹre ọvo rẹ Isiesi Ọfuanfon na-a.
^ Yẹrẹ ọ sa dia, “rẹ ovwan.”
^ Vwẹ Grik, “rere wọ ghwọkuo.”
^ Vwẹ Grik, “unu.”
^ Italẹnti 10,000 rẹ idọnọ ọfuanfon vẹ idinari 60,000,000 abavo. Ni Eta re Vwomaphia.
^ Ni Eta re Vwomaphia.