Matiu 2:1-23
2 Ọke re vwo vwiẹ Jesu vwẹ Bẹtlẹhẹm ri Judia vwẹ ọke rẹ ovie Hẹrọd* nu, nighere! ihwo ri nẹ isio* de nẹ Ẹbẹre Ọnre Va Nẹcha rhe Jerusalẹm,
2 ayen da tanẹ: “Tivọ yen ovie rẹ ihwo ri Ju re vwiẹre na hepha? Kidie avwanre mrẹ isio rọyen ọke rẹ avwanre vwọ hẹ Ẹbẹre Ọnre Va Nẹcha, ọtiọyena avwanre rhere rhe vwẹ uyovwin kpotọ kẹ.”
3 Ọke rẹ Ovie Hẹrọd vwo nyo ọnana, ẹwẹn rọyen rhe totọ-ọ, ọtiọyen ji te ihwo eje rehẹ Jerusalẹm.
4 Ro vwo se irherẹn ride na eje kugbe isiẹbe rẹ ihwo na koko nu, ọ da nọ ayen kpahen asan re de che vwiẹ Kristi na.*
5 Ayen da ta kẹ nẹ: “Bẹtlẹhẹm ri Judia, kidie ọtiọyen e siro womarẹ ọmraro na:
6 ‘Wẹwẹ, E Bẹtlẹhẹm rẹ otọ ri Juda, ọ dia owẹ yen orere rọ ma hanvwe vwẹ usun rẹ isun ri Juda-a, kidie ohwo ọvo ro che sun che nẹ evun wẹn rhe, ko che sun ihwo mẹ Izrẹl.’”
7 Ọyena vwọ wan nu, Hẹrọd da bẹbẹ se ihwo ri nẹ isio na,* ọ da frẹkotọ nọ ayen kpahen ọke rẹ isio na vwọ vwomaphia.
8 Ọke ro vwo ji ayen kpo Bẹtlẹhẹm, ọ da ta kẹ ayen nẹ: “Ovwan yanran ra nabọ frẹkotọ guọnọ ọmọ na, ọke rẹ ovwan da mrẹ nu, ovwan rhivwin rhe niyẹnrẹn kẹ vwẹ rere me je yanran ra vwẹ uyovwin kpotọ kẹ.”
9 Ọke rẹ ayen vwo nyo ota rẹ ovie na nu, ayen da ro idjerhe yanran, nighere! isio rẹ ayen mrẹre ọke rẹ ayen vwọ hẹ Ẹbẹre Ọnre Va Nẹcha na da kobaro kẹ ayen, bẹsiẹ rọ rhe vwọ domaji vwẹ obenu rẹ asan rẹ ọmọ na hepha.
10 Ayen vwọ mrẹ isio na, ayen da ghọghọ aghọghọ rode.
11 Ọke rẹ ayen vwọ ro evunrẹ uwevwin na, ayen da mrẹ ọmọ na vẹ Meri oni rọyen, ayen de shiguẹ totọ, ayen da vwẹ uyovwin kpotọ kẹ. Ayen de rhie ekpu rẹ efe rayen, ayen da vwẹ okẹ sansan vwọ kẹ—oro, ifrankisẹnsi kugbe imai.*
12 Ẹkẹvuọvo, kidie nẹ Ọghẹnẹ vwẹ orhọesio kẹ ayen vwevunrẹ evwerhẹn nẹ ayen rhivwin brẹ Hẹrọd ra-a, ayen da wan idjerhe ọfa kpo ẹkuotọ rayen.
13 Ọke rẹ ayen vwọ yanran nu, nighere! amakashe ri Jihova* da vwomaphia kẹ Josẹf vwevunrẹ evwerhẹn, ọ da ta kẹ nẹ: “Vrẹn, reyọ ọmọ na vẹ oni rọyen rere wọ djẹ kpo Ijipt, wọ dia oboyin bẹsiẹ wo vwo nyo mie vwe, kidie Hẹrọd muegbe rọ vwọ hiẹ guọnọ ọmọ na rere o hwe.”
14 Ọtiọyena Josẹf de vrẹn, ọ da reyọ ọmọ na vẹ oni rẹ ọmọ na vwẹ ason, o de kpo Ijipt.
15 Ọ da dia oboyin bẹsiẹ ri Hẹrọd vwo ghwu. Ọnana de ru orugba rẹ oborẹ Jihova* tare womarẹ ọmraro rọyen nẹ: “Mi se ọmọ mẹ nẹ Ijipt rhe.”
16 Hẹrọd vwo no nẹ ihwo ri nẹ isio na* phiẹn ọyen, ophu de muo gangan, o de ji ihwo yanran re hwe emeshare eje rehẹ Bẹtlẹhẹm kugbe ubrakpọ rọyen ejobi, vwo nẹ ẹgbukpe ivẹ kpotọ, vwo nene ọke rọ nabọ frẹkotọ riẹn mie ihwo ri nẹ isio na.*
17 Obo ra tare womarẹ ọmraro Jerimaya de rugba, rọ vwọ tanẹ:
18 “E nyo urhuru ọvo vwẹ Rama rọ viẹ ji vwerhe oma gangan. Reshẹl yen viẹ fikirẹ emọ rọyen, ọ rhọnvwere nẹ e bru ọyen uche-e, kidie ayen rha herọ-ọ.”
19 Ọke ri Hẹrọd vwo ghwu nu, nighere! amakashe ri Jihova* da vwomaphia kẹ Josẹf vwevunrẹ evwerhẹn vwẹ Ijipt,
20 ọ da tanẹ: “Vrẹn, reyọ ọmọ na vẹ oni rọyen, wo kpo otọ rẹ Izrẹl, kidie ihwo re guọnọ reyọ arhọ* rẹ ọmọ na jovwo na ghwure.”
21 Ọtiọyena o de vrẹn, ọ da reyọ ọmọ na vẹ oni rẹ ọmọ na, ọ da ro otọ rẹ Izrẹl.
22 Ẹkẹvuọvo ọke ro vwo nyo nẹ Akiẹliọs yen reyọ ẹdia rẹ ọsẹ rọyen Hẹrọd kerẹ osun ri Judia, oshọ ko muo ro vwo kpo oboyin. Vwọba, kidie nẹ Ọghẹnẹ vwẹ orhọesio kẹ vwevunrẹ evwerhẹn, o de siomareyọ kpo ekogho ri Galili.
23 Ọ da rhe dia orere re se Nazarẹt, rere obo ra tare womarẹ emraro na se vwo rugba nẹ: “E che se ohwo ri Nazarẹt.”*
Eta rehẹ obotọ na
^ Ni Eta re Vwomaphia.
^ Yẹrẹ “magi.” Ohwo ro nẹ isio vwọ mraro yẹrẹ ta obo re cha phia vwẹ obaro na.
^ Yẹrẹ “Mesaya na; Ọ ra Jẹreyọ na.”
^ Yẹrẹ “magi.” Ohwo ro nẹ isio vwọ mraro yẹrẹ ta obo re cha phia vwẹ obaro na.
^ Ifrankisẹnsi kugbe imai, eyen erọnvwọn re pha ghanghanre ri gbon omamọ ọnrhe.
^ Ni Eta re Vwomaphia.
^ Ni Eta re Vwomaphia.
^ Yẹrẹ “magi.” Ohwo ro nẹ isio vwọ mraro yẹrẹ ta obo re cha phia vwẹ obaro na.
^ Yẹrẹ “magi.” Ohwo ro nẹ isio vwọ mraro yẹrẹ ta obo re cha phia vwẹ obaro na.
^ Ni Eta re Vwomaphia.
^ Yẹrẹ “erhi.” Ni Eta re Vwomaphia.
^ Ọ sa dianẹ o nẹ ota ri Hibru na “djẹ phia” rhe.