Matiu 21:1-46
21 Ọke rẹ ayen vwo sikẹrẹ Jerusalẹm, rẹ ayen vwo te Bẹtfaji vwẹ Ugbenu rẹ Oliv, Jesu de ji idibo ivẹ,
2 ọ da ta kẹ ayen nẹ: “Ovwan kpo evunrẹ ọko ra kparo mrẹ na, ugege rẹ ovwan de te etiyin ovwan cha mrẹ ekẹkẹtẹ ọvo vẹ ọmọ rẹ ekẹkẹtẹ re churu vẹ ọyen. Ovwan rhan ayen rere ovwan reyọ ayen rhe vwe.
3 Ọ da dianẹ ohwo nọ ovwan onọ kpahọn, ovwan tanẹ, ‘Ọrovwori na guọnọ ayen.’ Ugege yena o che siobọnẹ ayen.”
4 Vwọrẹ uyota, ọnana phiare rere obo ra tare womarẹ ọmraro na vwo rugba, rọ tare nẹ:
5 “Ta kẹ ọmọtẹ ri Zayọn: ‘Nighere! Ovie wẹn bru we cha, ọ pha vworovworo, o chidia enu rẹ ekẹkẹtẹ, e, enu rẹ ọmọ rẹ ekẹkẹtẹ, ọmọ rẹ eranvwe re vwo muẹ eghwa.’”
6 Ọtiọyena idibo na da yanran, ayen de ghwe ru oborẹ Jesu vuẹ ayen nẹ ayen ru na.
7 Ayen da reyọ ekẹkẹtẹ na vẹ ọmọ rọyen rhe, ayen da vwẹ iwun rẹ obotafe rayen vwọ hwa enu rayen, o de chidia enu rayen.*
8 Ihwo buebun vwẹ otu na ke vwẹ iwun rẹ obotafe rayen vwọ hwa idjerhe na, jẹ efa nyavwa eghọn rẹ irhe je vwẹ ayen hwa idjerhe na.
9 Vwọba, otu na re kobaro kẹ kugbe ihwo re vwọ kpahọn ki kperẹ nẹ: “Sivwin, Ọmọ ri Devid, avwanre rẹre! Ebruba kẹ ohwo rọ cha vwẹ odẹ ri Jihova!* Sivwon vwẹ asan ri kpenu vwẹ obenu na, avwanre rẹre!”
10 Ọke rọ vwọ ro Jerusalẹm, edo de mu vwevunrẹ orere na ejobi, rẹ ayen vwọ tanẹ: “Ọnana ono?”
11 Jẹ otu na tanẹ: “Ọnana yen ọmraro na, Jesu ro nẹ Nazarẹt ri Galili rhe!”
12 Jesu da ro uwevwin rẹ ẹga na, ọ da djẹ ihwo eje re shẹ kugbe ihwo re dẹ vwẹ uwevwin rẹ ẹga na ro otafe, ọ da bọvwọn imẹjẹ rẹ ihwo ri wene igho kugbe egbara rẹ ihwo re shẹ ilekuku rhuotọ.
13 Ọ da ta kẹ ayen nẹ: “E siro nẹ, ‘Mi che se uwevwin mẹ uwevwin rẹ ẹrhovwo,’ ẹkẹvuọvo ovwan reyọ vwo ruẹ unu rẹ iji.”
14 Vwọba, irhuẹro vẹ ikpono de bro rhe uwevwin rẹ ẹga na, o de sivwin ayen.
15 Ọke rẹ irherẹn ride na kugbe isiẹbe na vwọ mrẹ emu rẹ igbevwunu ro ruru kugbe emeshare na ri kperẹ vwẹ uwevwin rẹ ẹga na nẹ, “Sivwin, Ọmọ ri Devid, avwanre rẹre!” ophu de mu ayen gangan
16 ayen da ta kẹ nẹ: “Wo nyo oborẹ enana ta na?” Jesu da ta kẹ ayen nẹ: “E. Ovwan ji rhi se ọnana dẹvo nẹ, “Vwẹ unu rẹ imitete kugbe emeboba yen wọ reyọ ujiri nurhe’?”
17 Rọ vwọ yanjẹ ayen vwo, o de vrẹn nẹ orere na kpo Bẹtani, ọ da dia etiyin hrọke.
18 Ọke ro vwo rhivwin kpo orere na vwẹ edegburhiọke, owẹnvwe ko hwe.
19 Ọ da kparo mrẹ urhe rẹ ifigi ọvo vwẹ orhoma rẹ idjerhe na, o de kpo asan rẹ urhe na hepha, ẹkẹvuọvo ọ mrẹ omamọ vuọvo vwọ-ọ jokparẹ ẹbe ọvo, ọ da ta kẹ nẹ: “E jẹ a rha mrẹ omamọ vuọvo vwẹ enu wẹn ọfa-a. Ugege yena urhe rẹ ifigi na de ghwu.
20 Ọke rẹ idibo na vwọ mrẹ ọnana, o de gbe ayen unu, ayen da tanẹ: “Mavọ yen urhe rẹ ifigi na ghwe vwo ghwu ugugege na?”
21 Jesu da kpahen kẹ ayen nẹ: “Uyota me ta kẹ ovwan nẹ, ovwan de vwo esegbuyota, ovwan rhe vwo ẹwẹn ivivẹ-ẹ, ọ dia obo ri mi ru kẹ urhe rẹ ifigi na ọvo yen ovwan che ru-u, ẹkẹvuọvo ovwan da tobọ ta kẹ ugbenu nana nẹ, ‘Ghwie nẹ etinẹ wọ ro evunrẹ abadi na,’ ọ cha phia.
22 Erọnvwọn eje rẹ ovwan nokpẹn rọyen vwẹ ẹrhovwo, ovwan de vwo esegbuyota, ovwan che vwo ayen.”
23 Ọke rọ vwọ ro evunrẹ uwevwin rẹ ẹga na nu, irherẹn ride na kugbe ekpako rẹ ihwo na de bro rhe vwẹ ọke ro vwo yono, ayen da tanẹ: “Ogangan vọ yen wo vwo ruẹ erọnvwọn nana? Ono yen kẹ wẹ ogangan nana?”
24 Jesu da kpahen kẹ ayen nẹ: “Me je cha nọ ovwan onọ ọvo. Ovwan da kpahen kẹ vwẹ, ke me je cha vuẹ ovwan ogangan ri mi vwo ruẹ erọnvwọn nana:
25 Omaebrophiyame ri Jọn ruru, tivọ yen o nurhe? Obodjuvwu, gbanẹ obọ rẹ ihworakpọ?” Ẹkẹvuọvo kẹ ayen ta kẹ omoma rayen nẹ: “Avwanre da tanẹ, ‘Obodjuvwu,’ kọ cha ta kẹ avwanre nẹ, ‘Kẹ diesorọ ovwan rhe se gbuyota-a?
26 Ẹkẹvuọvo avwanre da tanẹ, ‘Obọ rẹ ihworakpọ,’ oshọ rẹ otu na muẹ avwanre, kidie ayen eje ni Jọn kerẹ ọmraro.”
27 Ọtiọyena ayen da kpahen kẹ Jesu nẹ: “Avwanre riẹnre-e.” Ọ da je ta kẹ ayen nẹ: “Me je cha vuẹ ovwan ogangan ri mi vwo ruẹ erọnvwọn nana-a.
28 “Die yen ovwan rorori? Ọshare ọvo vwo emọ ivẹ. O de bru ọrẹsosuọ na ra, ọ da tanẹ: ‘Ọmọ mẹ, ra wian vwevunrẹ ogba rẹ ivaini na nonẹna.’
29 Ọmọ na da kpahen nẹ, ‘Me cha ra-a,’ ẹkẹvuọvo ọke vwọ yan obaro, o de wene ẹwẹn, ọ da yanran.
30 O de bru ọrivẹ na ra, ọ da vuẹ ota vuọvo na. Ọnana da kpahen nẹ, ‘Me cha ra, Ọsẹ,’* ẹkẹvuọvo ọ rare-e.
31 Ọvọ vwẹ usun rẹ ivẹ na yen ru ọhọre rẹ ọsẹ na?” Ayen da tanẹ: “Ọrẹsosuọ na.” Jesu da ta kẹ ayen nẹ: “Uyota me ta kẹ ovwan nẹ, ihwo ri phi osa uyovwin kugbe igberadja na cha kare ovwan ro Uvie rẹ Ọghẹnẹ na.
32 Kidie Jọn bru ovwan rhe vwẹ idjerhe rẹ ọsoso, jẹ ovwan sere gbuyota-a. Ẹkẹvuọvo ihwo ri phi osa uyovwin kugbe igberadja na sere gbuyota, ọke rẹ ovwan vwọ tobọ mrẹ ọnana, ovwan kurhẹriẹ rẹ ovwan de se gbuyota-a.
33 “Ovwan kerhọ rẹ udje ọfa: O vwo ọshare ọvo ro vwo otọ, ọ da kọn ogba rẹ ivaini phiyọ, ọ da gbogba riariẹ phiyọ, ọ da tọn asan re de mie iwaini phiyọ, ọ da bọn uwevwin ọvo ro kpenu phiyọ; o de siobọno vwọ kẹ eghwẹrẹ, o de kpo isiorho.
34 Ọke ra cha vwọ kọrọ emamọ na vwo te re, o de ji idibo rọyen bru eghwẹrẹ na ra, ra reyọ emamọ rọyen.
35 Ẹkẹvuọvo eghwẹrẹ na de mu idibo na, ayen de hwe ọvo vwievwie, ayen de hwe ọfa ghwu, ayen de rhe phi ọfa hwe.
36 Ọ da rhoma ji idibo efa ri bun vrẹ ẹko rẹsosuọ na, ẹkẹvuọvo ayen de ji ru erọnvwọn vuọvo na kẹ ayen.
37 Ukuotọ rọyen o de ji ọmọ rọyen bru ayen ra, ọ da ta kẹ oma rọyen nẹ, ‘Ayen che muọghọ kẹ ọmọ mẹ.’
38 Ọke rẹ ayen vwọ mrẹ ọmọ na, eghwẹrẹ na da ta kẹ ohwohwo nẹ, ‘Ọnana yen ọriuku na. Yanrhe, e jẹ avwanre hwe rere a reyọ uku rọyen!’
39 Ọtiọyena ayen de muo, ayen de do phiyọ otafe rẹ ogba rẹ ivaini na, ayen da teyọn hwe.
40 Ọtiọyena, ọke rẹ ohwo ro vwo ogba rẹ ivaini na da rhe, die yen o che ru vwọ kẹ eghwẹrẹ na?”
41 Ayen da ta kẹ nẹ: “Kidie nẹ ayen ihwo umwemwu, ọ cha ghwọrọ ayen karekare, ọ me vwẹ ogba rẹ ivaini na kẹ eghwẹrẹ efa, re cha vwẹ emamọ rọyen vwọ kẹ vwẹ ọke ro fori.”
42 Jesu da ta kẹ ayen nẹ: “Ovwan ji rhi se vwẹ Isiesi Ọfuanfon na dẹvo nẹ, ‘Ukuta rẹ ihwo re bọn uwevwin na senre, kọyen rhoma rhe dia osusu vwẹ ubienyẹ?* Obọ ri Jihova* yen ọnana nurhe, ọ da je dia igbevwunu vwẹ ẹro rẹ avwanre’?
43 Ọnana yen sorọ me vwọ vuẹ ovwan nẹ, a cha reyọ Uvie rẹ Ọghẹnẹ na mie ovwan, a me vwọ kẹ ẹgborho rọ mọ emamọ rọyen.
44 Vwọba, ohwo ro she teyen ukuta nana cha guọghọ chẹghẹchẹghẹ. Ohwo ro rhe she teyen, ọ cha guọghọ vworovworo.”
45 Ọke rẹ irherẹn ride na kugbe ihwo ri Farisi na vwo nyo idje rọyen na, ayen da riẹn nẹ ayen yen ọ ta ota kpahan.
46 Dede nẹ ayen guọnọ shabọ phiyọ,* jẹ oshọ rẹ otu na muẹ ayen, kidie otu na niro kerẹ ọmraro.
Eta rehẹ obotọ na
^ O muẹro nẹ “ayen” shekpahen iwun rẹ obotafe na.
^ Ni Eta re Vwomaphia.
^ Vwẹ Grik, “Ọga.”
^ Vwẹ Grik, “dia uyovwin vwẹ ubienyẹ.”
^ Ni Eta re Vwomaphia.
^ Yẹrẹ “muo.”