Matiu 26:1-75
-
Irherẹn jiroro rẹ ayen vwo hwe Jesu (1-5)
-
E ku ori ro gbon phaphapha ku Jesu (6-13)
-
Ọwanvrẹ rọ koba na kugbe ẹshẹ (14-25)
-
Ẹtuọnphiyọ rẹ Emu Ovwọnvwọn rẹ Ọrovwori na (26-30)
-
A mraro rọyen nẹ Pita cha sen Jesu (31-35)
-
Jesu nẹrhovwo vwẹ Gẹtsimani (36-46)
-
E mu Jesu (47-56)
-
A vwerọ vwo guẹdjọ vwẹ obaro ri Sanhẹdrin (57-68)
-
Pita sen Jesu (69-75)
26 Asaọkiephana ri Jesu vwọ ta eta nana eje nu, ọ da ta kẹ idibo rọyen nẹ:
2 “Ovwan riẹnre nẹ ẹdẹ ivẹ da wan nu ke che ru Orẹ rẹ Ọwanvrẹ na, ka cha vwẹ Ọmọ rẹ ohwo vwọ kpahotọ rere e hwe mu urhe.”
3 Irherẹn ride na kugbe ekpako rẹ ihwo na de siomakoko vwẹ otegodo rẹ orherẹn rode na re se Kaifas,
4 ayen da jiroro kugbe rere ayen sa vwọ vwẹ aghwanre vwo mu* Jesu ji hwe.
5 Ẹkẹvuọvo kẹ ayen tanẹ: “Ọ dia ọke rẹ orẹ na-a, rere edo vwo je muo vwẹ ohri rẹ ihwo na.”
6 Ọke ri Jesu vwọ hẹ Bẹtani vwẹ uwevwin ri Saimọn ọhọnvwoti na,
7 aye ọvo ro mu ọgọ* rẹ ori ro gbon phanphanphan rọ ghanre mamọ de bro rhe, ko kuo kuẹ uyovwin rọyen rọ vwọ riemu na.*
8 Ọke rẹ idibo na vwọ mrẹ ọnana, ophu de mu ayen gangan, kẹ ayen tanẹ: “Diesorọ ọ vwọ ghwọrọ kuẹfia?
9 Mane a rha sa shẹ okpigho rere a vwẹ igho na kẹ ivwiogbere.”
10 Rọ vwọ dianẹ Jesu riẹn ọnana na, ọ da ta kẹ ayen nẹ: “Diesorọ ovwan vwo kpokpo aye na? O ru emu esiri kẹ vwẹ.
11 Kidie ovwan vẹ ivwiogbere na yen gba herọ ọkieje, ẹkẹvuọvo ọ dia ọkieje yen me vẹ ovwan cha vwọ dia-a.
12 Ọke ro vwo ku ori nana ro gbon phanphanphan na ku ugboma mẹ, o ruro rere o vwo muegbe mẹ vwọ kẹ esho.
13 Uyota me ta kẹ ovwan nẹ, kasan kasan re de ghwoghwo iyẹnrẹn esiri nana vwẹ akpọ na eje, a je cha ta oborẹ aye nana ruru na vwọ karophiyọ.”
14 Ọyena vwọ wan nu, ọvo vwẹ usun rẹ Ihwivẹ na re se Judas Iskariọt de bru irherẹn ride na ra
15 ọ da tanẹ: “Die yen ovwan cha kẹ vwẹ rere me shẹ kẹ ovwan?” Ayen da vuẹ nẹ idọnọ efuanfon 30.
16 Ọtiọyena ghwe vwo nẹ ọke yena yanran, kọ guọnọ ọke ro shephiyọ rọ sa vwọ shẹ.
17 Vwẹ ẹdẹ rẹsosuọ rẹ orẹ rẹ Ibrẹdi ro Jephuo na, idibo na de bru Jesu rhe, ayen da tanẹ: “Tivọ yen wọ guọnọre nẹ avwanre muegbe rọyen kẹ wẹ ru wọ da re Orẹ rẹ Ọwanvrẹ na?”
18 Ọ da tanẹ: “Ovwan kpo evunrẹ orere na bru ohwo tiọna tiọna ra, rere ovwan ta kẹ nẹ, ‘Oyono na tare nẹ: “Ọke re bruphiyọ kẹ vwẹ sikẹre re; mẹ vẹ idibo mẹ cha re Orẹ rẹ Ọwanvrẹ na vwevunrẹ uwevwin wẹn.”’”
19 Ọtiọyena idibo na de ru oborẹ Jesu vuẹ ayen na, ayen de muegbe vwọ kẹ Orẹ rẹ Ọwanvrẹ na.
20 Ovwọnvwọn vwo te, ọ vẹ idibo 12 na chidia imẹjẹ rẹ ayen vwọ riemu.
21 Ọke rẹ ayen vwọ riemu na, ọ da tanẹ: “Uyota me ta kẹ ovwan nẹ, ọvo vwẹ usun rẹ ovwan na cha shẹ vwẹ.”
22 Ayen de muomaphiyọ gangan fikirẹ ọnana, ayen ohwo ọvuọvo ke ta kẹ nẹ: “Ọrovwori, ọ dia omẹvwẹ rẹ, gbanẹ omẹvwẹ?”
23 Ọ da kpahen nẹ: “Ohwo rọ vẹ ovwẹ gbe duvwun obọ phiyọ omoze na yen cha shẹ vwẹ.
24 Uyota, Ọmọ rẹ ohwo na yanran kirobo re siro kpahọn, ẹkẹvuọvo okpetu rode vwọ kẹ ohwo ra wan oma rọyen shẹ Ọmọ rẹ ohwo na! O rhe yovwin kẹ ohwo yena ọ da dianẹ e vwiẹrẹ-ẹ.”
25 Judas rọ dia ohwo rọ cha shẹ kẹrẹkpẹ na da kpahen nẹ: “Ọ dia omẹvwẹ rẹ, gbanẹ omẹvwẹ Rabbi?” Jesu da ta kẹ nẹ: “Wẹwẹ komobọ yen tarọ.”
26 Rẹ ayen je vwọ riemu na, Jesu da reyọ ibrẹdi, rọ vwọ nẹrhovwo nu, o de bro, ọ da vwọ kẹ idibo na, ọ da tanẹ: “Ovwan mie rere ovwan re. Ọnana mudiaphiyọ ugboma mẹ.”
27 Ọ da reyọ uko, ọ da nẹrhovwo, ọ da vwọ kẹ ayen, ọ da tanẹ: “Ovwan eje da vwọ,
28 kidie ọnana mudiaphiyọ ‘ọbara mẹ rẹ ọphọ na,’ re che ku kuotọ fikirẹ ihwo buebun vwọ kẹ evwoghovwo rẹ imwemwu.
29 Ẹkẹvuọvo me ta kẹ ovwan nẹ: O vwo ọke vuọvo me cha vwọ rhoma da oka rẹ udi nana ra vwẹ ivaini vwo ru na-a, bẹsiẹ rẹ ẹdẹ yena che vwo te, re me vẹ ovwan cha vwọ da ọkpokpọ vwevunrẹ Uvie rẹ Ọsẹ mẹ na.”
30 Ukuotọ rọyen, ọke rẹ ayen vwọ so ine rẹ ejiro nu, ayen de kpo Ugbenu rẹ Oliv.
31 Jesu da ta kẹ ayen nẹ: “Ovwan eje cha kprowọ fikirẹ obo re cha phia kẹ vwẹ vwẹ ason nana, kidie e siro nẹ: ‘Me cha ghwiẹ osuigodẹ na, igodẹ na ke cha hrabọ.’
32 Jẹ ọke ra da kpare ovwẹ vrẹn nu, me cha kobaro kẹ ovwan kpo Galili.”
33 Ẹkẹvuọvo Pita da kpahen kẹ nẹ: “Ọ da tobọ dianẹ ihwo ri chekọ na eje kprowọ fikirẹ obo re cha phia kẹ wẹ, me cha kprowọ bẹdẹ-ẹ!
34 Jesu da ta kẹ nẹ: “Uyota me ta kẹ wẹ nẹ, vwẹ ason nana tavwen ọhọ* ki bo, wọ cha sen vwẹ abọ erha.”
35 Pita da ta kẹ nẹ: “Ọ da tobọ dianẹ me vẹ owẹ che ghwu dede, o vwo ọke vuọvo me cha vwọ sen wẹ-ẹ.” Idibo ri chekọ na eje da je ta ota vuọvo na.
36 Ọyena vwọ wan nu, Jesu vẹ ayen de kpo asan re se Gẹtsimani, ọ da ta kẹ idibo na nẹ: “Ovwan chidia etinẹ rere mi kpo oboyin ra nẹrhovwo.”
37 Ọ da reyọ Pita vẹ emeshare ri Zẹbẹdi ivẹ nene oma, o de muomaphiyọ, ẹwẹn rọyen ko kpokpo gangan.
38 Ọ da ta kẹ ayen nẹ: “Mi* muomaphiyọ gangan tobọ te ẹdia rẹ ughwu. Ovwan daji etinẹ rere ovwan nene uvwe rhẹrẹ ọkieje.”
39 Rọ vwọ yan kpo obaro emerha, o de she bọvwọn opharo rhuotọ, ọ da nẹrhovwo nẹ: “Ọsẹ mẹ, ọ da dia oborẹ wo se ru, jẹ uko nana wan vwẹ vrẹ. Dedena ọ dia vwo nene ọhọre mẹ-ẹ, ẹkẹvuọvo vwo nene ọhọre wẹn.”
40 O de rhivwin bru idibo na ra, ọ da mrẹ ayen re vwerhẹn, ọ da ta kẹ Pita nẹ: “Ovwan se nene uvwe rhẹrẹ vwẹ unọke ọvo?
41 Ovwan rha rhẹrẹ rere ovwan je nẹrhovwo ọkieje, rere ovwan vwo jẹ ọdavwini ẹruọ. Vwọrẹ uyota, ẹwẹn na guọnọre,* ẹkẹvuọvo ugboma na vwiẹrẹre.”
42 Ọ da rhoma yanran vwẹ obọ rivẹ ra nẹrhovwo nẹ: “Ọsẹ mẹ, ọ da dianẹ ọnana cha sa wanvrẹ-ẹ jokpanẹ ke me darọ, gbe jẹ ọhọre wẹn rugba.”
43 Ọ da rhoma rhivwin rhe, ọ da mrẹ ayen re vwerhẹn kidie ovwerhẹn vọn ẹro rayen.
44 Ọtiọyena ọ da yanjẹ ayen vwo, ọ da rhoma yanran ra nẹrhovwo vwọrẹ obọ rerha, ọ da je vwanriẹn eta vuọvo na.
45 O de rhivwin bru idibo na rhe, ọ da ta kẹ ayen nẹ: “Vwẹ oka rẹ ọke tiọnana ovwan vwerhẹn ji rovwoma! Nighere! Unọke ra cha vwọ shẹ Ọmọ rẹ ohwo na kẹ irumwemwu na sikẹre re.
46 Ovwan vrẹn rere a yanran. Nighere! Ohwo rọ cha shẹ vwẹ na te etinẹ re.”
47 Rọ je vwọ ta ota na, nighere! Judas, ọvo vwẹ usun rẹ Ihwivẹ na, vẹ ihwo buebun rẹ irherẹn ride na kugbe ekpako rẹ ihwo na jiri, re yọnrọn elọkọ kugbe ibiurhe da rhe.
48 Asaọkiephana ohwo rọ cha shẹ na vwẹ oka kẹ ayen jovwo re nẹ: “Kohwo kohwo re me fiọnfiọnre, ọyen yen ohwo na; we muo yanran.”
49 Ọ da yanran phiọngun bru Jesu ra, ọ da tanẹ: “Mi yeren uwe, Rabbi! ọ da fiọnfiọn.
50 Ẹkẹvuọvo Jesu da ta kẹ nẹ: “Oko, diesorọ wọ vwọ rhe etinẹ?” Ayen da yanrhe, ayen de shabọ phiyọ Jesu, ayen de muo yanran.
51 Ẹkẹvuọvo nighere! ọvo vwẹ usun rẹ ihwo re vẹ Jesu gba herọ na de yoro ọlọkọ rọyen phia, ọ da nyavwe orhọ rẹ odibo rẹ orherẹn rode na no.
52 Jesu da ta kẹ nẹ: “Phi ọlọkọ wẹn phiyọ ẹdia rọyen, kidie ihwo eje re vwẹ ọlọkọ họnre cha ghwọrọ womarẹ ọlọkọ.
53 Gbanẹ wo rorori nẹ me cha sa rẹ Ọsẹ mẹ nẹ ọ kẹ vwẹ emekashe ri bun vrẹ lijọn 12 nananana-a?
54 Ọ da dia ọtiọyen, kẹ mavọ yen Isiesi Ọfuanfon na se vwo rugba, rọ tare nẹ ọ cha phia vwẹ idjerhe nana?”
55 Vwẹ unọke yena Jesu da ta kẹ otu na nẹ: “Ovwan rhere rhi mu vwe vẹ elọkọ kugbe ibiurhe kerẹ oji? Kẹdi kẹdẹ yen mi chidia uwevwin rẹ ẹga na ri mi vwo yono, jẹ ovwan mu vwe-e.
56 Ẹkẹvuọvo enana eje phiare rere oborẹ emraro na siri se vwo rugba.” Idibo na eje da yan jovwo, ayen da djẹ.
57 Ihwo ri mu Jesu na da reyọ kpo uwevwin ri Kaifas orherẹn rode na, asan rẹ isiẹbe kugbe ekpako na de siomakoko.
58 Ẹkẹvuọvo Pita ko nene vwẹ ugboko re te otegodo rẹ orherẹn rode na, ọke rọ vwọ ro evun rọyen nu, o de nene idibo re vwẹrote uwevwin na chidia rere ọ mrẹ obo re cha phia.
59 Asaọkiephana irherẹn ride na kugbe Sanhẹdrin na eje ke guọnọ ihwo ri che soseri rẹ efian hwe Jesu rere ayen se vwo hwe.
60 Ẹkẹvuọvo ayen mrẹ ohwo vuọvo-o, dede nẹ iseri rẹ efian buebun vwomaphia. Ọke vwọ yan obaro, ivẹ da vwomaphia
61 ayen da tanẹ: “Ọshare nana tare nẹ, ‘Me sa guọghọ uwevwin rẹ ẹga rẹ Ọghẹnẹ na, me me bọn vwẹ ẹdẹ erha.’”
62 Ọtiọyena orherẹn rode na de vrẹn mudia, ọ da ta kẹ nẹ: “Wọ cha kpahen ota vuọvo? Ọnana die yen eshare nana soseri rọyen kpahan owẹ na?”
63 Ẹkẹvuọvo Jesu ta ota vuọvo-o. Ọtiọyena orherẹn rode na da ta kẹ nẹ: “Me ta kẹ wẹ nẹ, reyọ Ọghẹnẹ ro jeghwo na vwo duvwun iyorin, rere wọ vuẹ avwanre sẹ owẹ yen Kristi, Ọmọ rẹ Ọghẹnẹ na!”
64 Jesu da ta kẹ nẹ: “Wẹwẹ komobọ yen tarọ. Ẹkẹvuọvo me ta kẹ wẹ nẹ: Vwo nẹ ọke nana yanran, ovwan cha mrẹ Ọmọ rẹ ohwo na ro chidia obọrhen rẹ ogangan, rọ cha vwẹ enu rẹ evwru rẹ odjuvwu na.”
65 Orherẹn rode na da bẹrẹ iwun rẹ obotafe rọyen, ọ da tanẹ: “Ọ ta ota rẹ ẹgua! Diesorọ a rhoma vwọ guọnọ iseri? Nighere! Ovwan nyo eta rẹ ẹgua na.
66 Die yen ovwan rorori?” Ayen da kpahen nẹ: “O fo ughwu.”
67 Ayen de dje enya kuo opharo, ayen de dje ubi. Efa da ghwiẹ opharo rọyen,
68 kẹ ayen tanẹ: “Mraro kẹ avwanre, wẹwẹ ri Kristi na. Ono yen ghwiẹ wẹ?”
69 Asaọkiephana Pita chidia otafe vwẹ otegodo na, odibo ọmọtẹ ọvo de bro rhe, ọ da ta kẹ nẹ: “Wẹwẹ vẹ Jesu rẹ ohwo ri Galili na jẹ usun!”
70 Ẹkẹvuọvo ọ da siọn vwẹ irharo rayen eje, rọ vwọ tanẹ: “Me riẹn oborẹ wọ ta ota kpahan na-a.”
71 Ọke ro vwo kpo anurhoro rẹ egodo na, ọmọtẹ ọfa de noso, ọ da ta kẹ ihwo rehẹ etiyin nẹ: “Ọshare nana vẹ Jesu rẹ ohwo ri Nazarẹt na hẹ usun.”
72 Ọ da rhoma siọn womarẹ iyorin eduvwon nẹ: “Me riẹn ọshare nana-a!”
73 Ọmọke vwọ wan nu, ihwo ri mudia etiyin da yanrhe, ayen da ta kẹ Pita nẹ: “Aphro herọ-ọ, wẹwẹ jẹ ọvo vwẹ usun rayen, kidie vwọrẹ uyota ejajẹ* wẹn na dje we phia.”
74 O de mu ekan vẹ iyorin eduvwon phiyọ nẹ: “Me riẹn ọshare na-a!” Ugege yena ọhọ* de bo.
75 Pita da karophiyọ oborẹ Jesu tare nẹ: “Tavwen ọhọ* ki bo, wọ cha sen vwẹ abọ erha.” Ọ da ro otafe, ọ da viẹ gangan.
Eta rehẹ obotọ na
^ Yẹrẹ “vwo shabọ phiyọ.”
^ Vwẹ Grik, “ọgọ rẹ alabasta.” Omochẹ ra vwẹ ukuta ra mrẹre vwẹ asan rọ kẹrẹ Alabastrọn vwẹ Ijipt vwo ru. Ni Eta re Vwomaphia.
^ Yẹrẹ “ro vwo chidia imẹjẹ na.”
^ Vwẹ Grik, “ogborhuane.”
^ Yẹrẹ “Erhi mẹ.” Ni Eta re Vwomaphia.
^ Vwẹ Grik, “ẹwẹn na vwo owenvwe.”
^ Yẹrẹ “ẹrẹnvwe.”
^ Vwẹ Grik, “ogborhuane.”
^ Vwẹ Grik, “ogborhuane.”