Matiu 3:1-17
3 Vwẹ ọke yena Jọn ro Brẹ Ihwo Phiyame na da rhe, ko ghwoghwo vwevunrẹ aton ri Judia,
2 kọ tanẹ: “Ovwan kurhẹriẹ, kidie Uvie rẹ idjuvwu na sikẹre re.”
3 Vwọrẹ uyota, ohwo nana yen ọmraro Aizaya vwẹ eta nana vwọ ta ota kpahen nẹ: “Urhuru rẹ ohwo ọvo ro kperẹ vwevunrẹ aton na nẹ: ‘Muegbe rẹ idjerhe ri Jihova!* Ru idjerhe rọyen phiọn.’”
4 Asaọkiephana ewun ra vwẹ ẹton rẹ ikamẹl ru yen Jọn kuphiyọ, ọ vwẹ umuehun rẹ ophiẹn vwo mu ehun rọyen. Ebaka* kugbe ame ọnyọn rẹ aghwa yen emu rọyen.
5 Ọtiọyena ihwo ri Jerusalẹm kugbe Judia ejobi kugbe irere na eje re riariẹ Jọdan phiyọ ki bro ra,
6 ko brẹ* ayen phiyame vwẹ Urhie ri Jọdan, jẹ ayen fan imwemwu rayen vwẹ azagba.
7 Ọke rọ vwọ kparo mrẹ buebun rẹ ihwo ri Farisi vẹ Sadiusi na re cha asan ro de brẹ ihwo phiyame na, ọ da ta kẹ ayen nẹ: “Ovwan emọ rẹ eredekọ na, ono yen vwẹ orhọesio kẹ ovwan nẹ ovwan djẹ vwọ kẹ ophu rọ cha na?
8 Ọtiọyena ovwan gba mọ omamọ ro dje okurhẹriẹ phia.
9 Ovwan nama ta kẹ oma rẹ ovwan nẹ, ‘Ebraham yen ọsẹ rẹ avwanre-e.’ Kidie me ta kẹ ovwan nẹ Ọghẹnẹ sa vwẹ emọ kẹ Ebraham vwo nẹ ikuta nana rhe.
10 Ushurhe na hẹ esiri rẹ irhe na re. Ọtiọyena kurhe kurhe rọ mọ omamọ esiri-i, ka gbọ she, e mi do phiyọ erhanre.
11 Vwọ kẹ vwẹ, mi brẹ ovwan phiyame kidie ovwan kurhẹriẹ, ẹkẹvuọvo ọ rọ cha vwẹ obuko mẹ na gan nọ vwẹ, mi muwan mi vwo ku isabato rọyen no-o. Ohwo yena cha vwẹ ẹwẹn ọfuanfon vẹ erhanre vwo bru ovwan phiyame.
12 Isaboro rọ vwọ frẹ ibi ekankọn hẹ obọ rọyen, o che ru asan rọ da frẹ ibi ekankọn na fon karekare, ko koko iwiti rọyen phiyọ uwevwin rọ da sẹro rẹ erọnvwọn, ẹkẹvuọvo ọ cha vwẹ erhanre re che se fu-un vwọ torhẹ ehọrọ na.”
13 Ọyena vwọ wan nu, Jesu de nẹ Galili bru Jọn rhe vwẹ Jọdan na, rere o vwo brophiyame.
14 Ẹkẹvuọvo Jọn da davwẹngba rọ vwọ dobọ rọyen ji, rọ vwọ tanẹ: “Wẹwẹ ro fori nẹ o bru vwe phiyame, kọyen rhoma bru vwe cha?”
15 Jesu da kpahen kẹ nẹ: “Jẹ ọ dia ọtiọyen enẹna, kidie vwẹ idjerhe nana yen avwanre se vwo ru erọnvwọn eje re dia ọsoso.” Ọtiọyena ọ rha davwẹngba rọ vwọ dobọ rọyen ji ọfa-a.
16 E vwo brophiyame nu, Jesu de nẹ evunrẹ ame na rhe vwẹ ugege yena; nighere! idjuvwu na de rhiephiyọ, ọ da mrẹ ẹwẹn rẹ Ọghẹnẹ ro wontọ cha enu rọyen kerẹ ilekuku.
17 Nighere! Urhuru ọvo de ji nẹ odjuvwu rhe rọ tare nẹ: “Ọnana Ọmọ mẹ, ri mi vwo ẹguọnọ rọyen, ri mi rhiabọreyọ.”