Matiu 8:1-34
8 O vwo wontọ nẹ ugbenu na rhe nu, ihwo buebun de nene.
2 Nighere! ọhọnvwoti ọvo da rhe, ọ da vwẹ uyovwin kpotọ kẹ, ọ da tanẹ: “Ọrovwori, wọ da guọnọ, wo se ru vwe fon.”
3 Ọtiọyena ọ da rionbọ rọyen phia, o de djobọte, ọ da tanẹ: “Me guọnọre! Gba fon.” Ugege yena oti na de ghwe no oma.
4 Jesu da ta kẹ nẹ: “Mrẹvughe nẹ wọ vuẹ ohwo vuọvo kpahen ọnana-a, ẹkẹvuọvo yanran re dje oma wẹn kẹ orherẹn na, rere wọ vwẹ okẹ ri Mosis tare vwọ kpahotọ, rọ vwọ dia oseri kẹ ayen.”
5 Ọke rọ vwọ ro Kepanọm, onotu rẹ isodje ọvo de bro rhe, kọ rẹ
6 rọ vwọ tanẹ: “Ọga, odibo mẹ sherhẹn vwẹ obo uwevwin, ọ sa kpara abọ vẹ awọ-ọ, ọ je rioja mamọ.”
7 Ọ da ta kẹ nẹ: “Mi de te oboyin, mi che sivwon.”
8 Onotu rẹ isodje na da kpahen nẹ: “Ọga, mi fo ohwo ru wọ ro uwevwin rọye-en, ẹkẹvuọvo ghwa ta ota na, oma rẹ odibo mẹ na kọ cha gan.
9 Kidie mẹvwẹ jẹ ohwo rọhẹ otọ rẹ ogangan rẹ usuon, ro vwo isodje vwẹ obotọ rọyen, me ta kẹ ọnana nẹ, ‘Yanran!’ ọ me yanran, vwọ kẹ ọfa nẹ, ‘Yanrhe!’ ọ me yanrhe, vwọ kẹ ọviẹn mẹ nẹ, ‘Ru ọnana!’ o mi ruo.”
10 Ọke ri Jesu vwo nyo ọyena, o de gbe unu, ọ da ta kẹ ihwo ri nene nẹ: “Uyota me ta kẹ ovwan nẹ, me je rhe mrẹ ohwo vuọvo ro vwo oka rẹ esegbuyota ọgangan ọtiọna vwẹ Izrẹ-ẹl.
11 Ẹkẹvuọvo me ta kẹ ovwan nẹ, ihwo buebun che nẹ ẹbẹre ọnre va nẹcha vẹ ẹbẹre ọnre shera rhe rhi nene Ebraham kugbe Aizik kugbe Jekọp chidia imẹjẹ vwẹ Uvie rẹ idjuvwu na;
12 ẹkẹvuọvo e che do emọ rẹ Uvie na phiyọ otafe vwevunrẹ ebri. Etiyin kọyen ayen da cha rha viẹ je ria akon rayen.”
13 Ọtiọyena Jesu da ta kẹ onotu rẹ isodje na nẹ: “Yanran. Kirobo ru wo dje esegbuyota phia na, e jẹ ọ phia kẹ wẹ ọtiọyen.” Oma rẹ odibo na de kpo vwẹ unọke yena.
14 Jesu vwọ ro uwevwin ri Pita, ọ da mrẹ oni aye rọyen rẹ ọga rẹ odo* mu gbere otọ.
15 Ọtiọyena ọ da yọnrọn obọ rọyen, odo* na de no oma, o de vrẹn ko gbodibo kẹ.
16 Ẹkẹvuọvo ọke rẹ ovwọnvwọn vwo te, e de mu ihwo buebun rẹ ẹwẹn rẹ Idẹbono kpokpo bro rhe; ọ da vwẹ ota rẹ unu vwọ djẹ ẹwẹn na phia, o de sivwin ihwo eje re rioja,
17 rere o se vwo ru orugba rẹ obo ra tare womarẹ ọmraro Aizaya nẹ: “Ọyen komobọ reyọ ega rẹ avwanre, o de mu emiavwe rẹ avwanre.”
18 Ọke ri Jesu vwọ mrẹ otu buebun re riarierẹ phiyọ, ọ da tanẹ ayen vrẹn kpo ẹbẹre ochekọ na.
19 Osiọbe ọvo da rhe, ọ da ta kẹ nẹ: “Oyono, mi che nene uwe kpo kasan kasan ru wọ ra.”
20 Ẹkẹvuọvo Jesu da ta kẹ nẹ: “Irhirako vwo inu, emephran rẹ odjuvwu na vwo ẹho, ẹkẹvuọvo Ọmọ rẹ ohwo vwo asan vuọvo rọ cha vwẹ uyovwin kpahe-en.”
21 Ọfa vwẹ usun rẹ idibo na da ta kẹ nẹ: “Ọrovwori, kẹ vwẹ uphẹn rere me yanran re shi ọsẹ mẹ tavwen.”
22 Jesu da ta kẹ nẹ: “Rhe nene uvwe, jẹ irivwin na shi irivwin rayen.”
23 Ọke rọ vwọ ro okọ, idibo rọyen de nene.
24 Asaọkiephana nighere! ogiribo rode ko djuẹ vwẹ abadi na, te ẹdia rẹ ọgbogho rẹ ame na kọ mwavwa rua evunrẹ okọ na; ẹkẹvuọvo jẹ ọ vwerhẹn.
25 Ayen da rhe rhe rhọvwọn, ayen da ta kẹ nẹ: “Ọrovwori, sivwin avwanre, ughwu yen avwanre hepha na!”
26 Ẹkẹvuọvo ọ da ta kẹ ayen nẹ: “Diesorọ oshọ vwo mu ovwan te ọtiọna,* ovwan ri vwo esegbuyota tutuno na?” O de vrẹn, ọ da ghwọku odju na kugbe abadi na, asan ejobi da fọ riẹi.
27 Ọtiọyena o de gbe ihwo na unu, ayen da tanẹ: “Ọnana oka rẹ ohwo vọ? Odju na vẹ abadi na dede nyẹme rọyen.”
28 Ọke ro vwo te ẹbẹre ochekọ na, rọ vwọ ro ekogho rẹ ihwo ri Gadara na, eshare ivẹ rẹ ẹwẹn rẹ Idẹbono kpokpo ri nẹ ohri rẹ ishi* na cha da vwa. Ayen djoma mamọ, ọtiọyena o vwo ohwo vuọvo ro se fiudugberẹ wan idjerhe yena-a.
29 Nighere! ayen de kperi, rẹ ayen vwọ tanẹ: “Die yen avwanre vẹ owẹ vwo kugbe, Ọmọ rẹ Ọghẹnẹ? Wọ rhe etinẹ rhi gboja kẹ avwanre tavwen ọke re bruphiyọ na ki te?”
30 Ẹko rẹ isi buebun riemu vwẹ asan ọvo ro sheri kẹ ayen.
31 Ọtiọyena emekashe rẹ Idẹbono na ke rẹ nẹ: “Wọ da djẹ avwanre phia, jẹ avwanre ro evunrẹ oma rẹ ẹko rẹ isi na.”
32 Ọ da ta kẹ ayen nẹ: “Ovwan yanran!” Ọtiọyena ayen nẹ oma rayen, ayen da ra ro evunrẹ isi na, nighere! ẹko rẹ isi na da họrhọ nene ọghwrọrọ ro evunrẹ abadi na, ayen de ghwu phiyọ evunrẹ ame na.
33 Ẹkẹvuọvo ihwo ri suẹn isi na da djẹ, rẹ ayen vwọ ro evunrẹ orere na, ayen da niyẹnrẹn rẹ erọnvwọn ejobi, ji te iyẹnrẹn rẹ eshare rẹ ẹwẹn rẹ Idẹbono kpokpo na.
34 Nighere! orere na ejobi da rhe vwa Jesu, ayen vwọ mrẹ, ayen da vuẹ nẹ ọ vrẹn nẹ ekogho rayen.
Eta rehẹ obotọ na
^ Yẹrẹ “ifiva.”
^ Yẹrẹ “ifiva.”
^ Yẹrẹ “udu vwo nẹ ovwan awọ?”
^ Yẹrẹ “ushi rẹ ẹkarophiyọ.”