Vwo Rhe Ihwo ri Rom 10:1-21
10 Iniọvo, obo re me ghene guọnọ kẹ ayen vẹ obo re me nẹrhovwo kẹ Ọghẹnẹ kpahan, ọyen ayen vwo vwo usivwin.
2 Mi soseri rọyen nẹ ayen vwo oruru rẹ ayen vwọ ga Ọghẹnẹ, ẹkẹvuọvo ọ dia vwo nene erianriẹn ọgbagba-a.
3 Kidie nẹ ayen riẹn obo re nẹrhẹ Ọghẹnẹ kere ohwo phiyọ ọvwata-a, kẹ ayen ruẹ oborẹ ayen rorori nẹ ọ sa nẹrhẹ ayen dia evwata, ayen rha vwomakpotọ kẹ uwan ọsoso rẹ Ọghẹnẹ-ẹ.
4 Kristi yen oba rẹ Urhi na, ọtiọyena kohwo kohwo ro vwo esegbuyota kọ dia ọvwata.
5 Mosis si kpahen obo ra sa vwọ dia ọvwata womarẹ Urhi na: “Ohwo ro ru erọnvwọn nana cha wan oma rayen rhọ.”
6 Isiesi Ọfuanfon na je tanẹ ohwo sa dia ọvwata womarẹ esegbuyota, ọ da tanẹ: “Wọ ta vwevunrẹ ubiudu wẹ-ẹn nẹ, ‘Ono yen che kpo obodjuvwu?’ kọyen, ra reyọ Kristi rhe otọ,
7 yẹrẹ, ‘Ono yen che kpo evunrẹ ukpotọ ro jẹ oba evwo?’ kọyen, ra kpare Kristi nẹ ughwu.”
8 Ẹkẹvuọvo, die yen isiesi ọfuanfon na tare? “Ota na kẹrẹ owẹ, ọ hẹ evunrẹ unu wẹn vẹ ubiudu wẹn”; kọyen, “ota” rẹ esegbuyota rẹ avwanre ghwoghwo na.
9 Kidie wọ da vwẹ unu wẹn vwo ghwoghwo nẹ Jesu yen Ọrovwori, wo de ji segbuyota vwẹ ubiudu wẹn nẹ Ọghẹnẹ kparerọ nẹ ughwu, ku wo vwo usivwin.
10 Ubiudu na yen ohwo vwo vwo esegbuyota rọ cha nẹrhẹ ọ dia ọvwata, ẹkẹvuọvo ugbunu na kọyen o vwo ghwoghwo vwẹ azagba rere o se vwo vwo usivwin.
11 Kidie isiesi ọfuanfon na tare nẹ, “o vwo ohwo vuọvo ro vwo esegbuyota kpahọn, ro che kuphiyotọ-ọ.”
12 Ofẹnẹ herọ vwẹ uvwre rẹ ihwo ri Ju vẹ ihwo ri Griki-i. Ọrovwori vuọvo yen ayen vwori, ro ruẹse kẹ ihwo ejobi ri kperẹ se.
13 Kidie “kohwo kohwo ro se odẹ ri Jihova* ko vwo usivwin.”
14 Ẹkẹvuọvo, mavọ yen ayen se vwo se odẹ rọyen, ọ da dianẹ ayen ji rhi vwo esegbuyota kpahọ-ọn? Mavọ yen ayen se vwo vwo esegbuyota kpahen ohwo rẹ ayen ji rhi nyo kpahe-en? Kẹ, mavọ yen ayen se vwo nyo kpahọn, jẹ ohwo vuọvo ghwoghwo kẹ aye-en?
15 Mavọ yen ayen se vwo ghwoghwo, jẹ ọ dianẹ ke ji aye-en? Kirobo re siro: “Mavọ yen awọ rẹ ihwo ri ghwoghwo iyẹnrẹn esiri rẹ erọnvwọn iyoyovwin vwo erhuvwu te!”
16 Dedena ọ dia ayen eje yen kerhọ rẹ iyẹnrẹn esiri na-a. Kidie Aizaya tare nẹ: “Jihova,* ono yen vwo esegbuyota kpahen obo ro nyo mie avwanre?”*
17 Ọtiọyena, obo re nyori yen esegbuyota nẹcha. Vwọba, obo re nyori na yen ota ro shekpahen Kristi.
18 Ọnana ko mudiaphiyọ nẹ ihwo rẹ Izrẹl nyo ota na-a? Ẹjo, kidie “e nyo umri rayen vwẹ akpọ na eje, ovuẹ rayen ji toba rẹ akpọ na.”
19 Ẹkẹvuọvo me nọ, kọyen ihwo rẹ Izrẹl vwo ẹruọ rọye-en? Ẹjo, ayen vwo ẹruọ rọyen. Ẹsosuọ Mosis tare nẹ: “Me cha nẹrhẹ ovwan rioma fikirẹ ẹgborho ro fiemu vuọvo-o; Ke me nẹrhẹ ophu mu ovwan gangan fikirẹ ẹgborho djidji.”
20 Aizaya de rhe fiudugberi gangan ta: “Ihwo re guọnọ ovwẹ-ẹ, keyen rhe mrẹ vwẹ; ihwo re nọ kpahen ovwẹ-ẹ, keyen rhi vughe uvwe.”
21 Vwọ kpahen ihwo rẹ Izrẹl, ọ da tanẹ: “Kẹdi kẹdẹ yen mi vwo rhiabọ kẹ ihwo ri jẹmienyo, ri ruẹ udu gangan.”