Vwo Rhe Ihwo ri Rom 11:1-36
11 Ọtiọyena me da nọ: Ọghẹnẹ sen ihwo rọyen? Ẹjo kakaka! Kidie mẹvwẹ jẹ ohwo rẹ Izrẹl, ọmọ* rẹ Ebraham, ro nẹ uvwiẹ ri Bẹnjamin rhe.
2 Ọghẹnẹ sen ihwo rọyen rọ ka jẹreyọ-ọ. Ovwan rha riẹn oborẹ isiesi ọfuanfon na ta kpahen Ilaija ọke ro vwo brenu kẹ Ọghẹnẹ kpahen ihwo rẹ Izrẹl?
3 “Jihova,* ayen hwe emraro wẹn, ayen guọghọ egbada wẹn totọ, mẹvwẹ ọvo kọyen chekọ, jẹ ayen je guọnọ ovwẹ hwe* asaọkiephana.”
4 Ẹkẹvuọvo, die yen Ọghẹnẹ kpahen kẹ? “Mi ji vwo ihwo 7,000 ri ji shiguẹ kẹ Baal dẹvo-o.”
5 Ọtiọyen ọ je hepha vwẹ ọke nana, o ji vwo uchekotọ rẹ ihwo rẹ Ọghẹnẹ jẹreyọ fikirẹ ẹse re muwan rọye-en.
6 Ọ da dia fikirẹ ẹse re muwan rọye-en, kọyen ọ dia womarẹ iruo-o; ọ rha dia ọtiọye-en, ẹse na rha dia ẹse re muwan rọye-en.
7 Die kọyen avwanre cha ta? Oborẹ ihwo rẹ Izrẹl guọnọ na te ayen obọ-ọ, ẹkẹvuọvo ihwo ra jẹre na yen o teri obọ. Iroro rẹ otu ri chekọ na ghwodirhẹn,
8 kirobo re siro: “Ọghẹnẹ kẹ ayen ẹwẹn rẹ ovwerhẹn okokodo, ẹro re mrorẹ-ẹ kugbe erhọ ri nyẹme-e, rhi te nonẹna.”
9 Devid je ta: “E jẹ imẹjẹ rayen hirhephiyọ ufi kugbe ekprowọ kugbe ojaẹriọ vwọ kẹ ayen.
10 Jẹ ẹro rayen muebri rere ayen jẹ orẹ ẹmrẹ, rere ugbuko rayen turu* phia ọkieje.”
11 Ọtiọyena me nọre, ọke rẹ ihwo rẹ Izrẹl vwọ kprowọ na, ayen she totọ? Ẹjo kakaka! Ẹkẹvuọvo, owọ rẹ ayen jẹ chọ na nẹrhẹ usivwin dia vwọ kẹ ihwo rẹ ẹgborho na, rere ihwo rẹ Izrẹl vwọ rioma.
12 Ọ da dianẹ owọ rẹ ayen jẹ chọ na nẹrhẹ akpọ na mrẹ ebruphiyọ, ukeri rayen ro shekpotọ je ghwa ebruphiyọ rhe ihwo rẹ ẹgborho na, kẹ mavọ yen ọ cha dia siẹrẹ unu rayen da gba nu!
13 Asaọkiephana, me ta ota kẹ ovwan ihwo rẹ ẹgborho na. Rọ vwọ dianẹ mẹvwẹ ọyinkọn kẹ ẹgborho na, ki mi titi ẹga re me vwọ kẹ Ọghẹnẹ
14 sẹ me sa nẹrhẹ ihwo mẹ rioma vwẹ idjerhe evo, rere mi se vwo sivwin evo vwẹ usun rayen.
15 Ẹdjẹ ra djẹ ayen de mudiaphiyọ arhuẹrẹ vwọ kẹ akpọ na, ẹreyọ rayen rhe mudiaphiyọ arhọ vwo nẹ ughwu?
16 Vwo kpobarophiyọ, ẹbẹre ọvo rẹ egun rẹ ibrẹdi ra reyọre kerẹ emamọ rẹsosuọ da dia fuanfon, kọyen ọsoso rẹ egun na je pha fuanfon; owọ rẹ urhe da dia fuanfon, kọyen eghọn rọyen je pha fuanfon.
17 Ẹkẹvuọvo, ọ da dianẹ e vwirhin eghọn rẹ urhe na evo no, ra da vwẹ ovwan re dia eghọn rẹ urhe rẹ oliv rẹ aghwa vwọ tamuo,* rẹ ovwan da vwẹ ame rẹ urhe rẹ oliv na vwọ ghẹrẹ oma rẹ ovwan,
18 ovwan rha yonma kẹ eghọn rẹ urhe na-a. Ovwan da yonma kẹ ayen, ovwan gba karophiyọ nẹ ọ dia ovwan yen nẹrhẹ owọ rẹ urhe na dia-a, ẹkẹvuọvo owọ rẹ urhe na yen nẹrhẹ ovwan mudia.
19 Kẹ, wọ cha ta: “E vwirhin eghọn evo no rere a vwọ vwẹ ovwẹ tamuo.”
20 Ọyena uyota! E vwirhin ayen no kidie ayen vwo esegbuyota-a, ẹkẹvuọvo ovwan mudia fikirẹ esegbuyota. Ọtiọyena ovwan phuoma-a, ẹkẹvuọvo ovwan nomaso.
21 Kidie ọ da dianẹ Ọghẹnẹ yanjẹ eghọn rẹ urhe na vwo-o, kọyen ọ je cha yanjẹ ovwan vwo-o.
22 Ọtiọyena, gbe roro kpahen ẹse rẹ Ọghẹnẹ kugbe ọghwọku rọyen. Ọ ghwọku otu ri sheri, o de rhe ruẹse kẹ ovwan, takpe nẹ ovwan ru obo re cha nẹrhẹ ovwan muwan vwọ kẹ ẹse rọyen ọkieje. Ọ rha dia ọtiọye-en, ọ je cha nyavwe ovwan kufia.
23 Vwọ kẹ ayen, ọ cha rhoma vwẹ ayen tamuo siẹrẹ ayen rha daji ẹdia ri jẹ esegbuyota evwo rayen na-a, kidie Ọghẹnẹ sa rhoma vwẹ ayen tamuo.
24 Kidie a da sa vwẹ ovwan ra nyavwe vwo nẹ urhe rẹ oliv rẹ aghwa vwọ tamu urhe rẹ oliv ra kọnre na, rọ fẹnẹ oborẹ Ọghẹnẹ marọ wan, kọyen ọ cha lọhọ ra vwọ vwẹ eghọn rẹ oliv ra nyavwe no na vwọ rhoma tamuo!
25 Iniọvo, me guọnọre nẹ ovwan riẹn odjahọn ọfuanfon nana, rere we vwo je roro nẹ ovwan ghwanre: Ihwo rẹ Izrẹl evo rhọnvwe kerhọ-ọ, ọtiọyen ọ cha dia bẹsiẹ ukeri rẹ ihwo rẹ ẹgborho na cha vwọ gba.
26 Ọtiọna yen a cha wan sivwin Izrẹl ejobi. Kirobo re siro: “Osivwin na che nẹ Zayọn rhe, o mi si iruemu ri jẹ Ọghẹnẹ ẹriẹn vwo nẹ Jekọp.
27 Ọnana yen ọphọ re me vẹ ayen cha re, ọke mi de si imwemwu rayen no.”
28 Vwọrẹ uyota, vwọ kpahen iyẹnrẹn esiri na, ayen ivwighrẹn fikirẹ ovwan; ẹkẹvuọvo vwọ kpahen ihwo rẹ Ọghẹnẹ jẹreyọ, ayen kẹ ihwo re vwo ẹguọnọ kpahen fikirẹ esẹ rayen ride.
29 Kidie Ọghẹnẹ cha viẹ ija kpahen okẹ rọ kẹ ihwo kugbe use ro se ihwo-o.
30 Kidie ovwan ka dia ihwo ri jẹ ẹme rẹ Ọghẹnẹ enyo, e de gbe arodọnvwẹ kẹ ovwan fikirẹ jẹmienyo rẹ ihwo rẹ Izrẹl.
31 Enẹna, e gbe arodọnvwẹ kẹ ovwan fikirẹ jẹmienyo rayen, rere e ji se gbe arodọnvwẹ kẹ ayen kirobo re gbe arodọnvwẹ kẹ ovwan na.
32 Kidie Ọghẹnẹ ni ayen kerẹ ihwo re mu phiyọ uwodi fikirẹ jẹmienyo rayen, rere o se vwo gbe arodọnvwẹ kẹ ayen ejobi.
33 Gbe ni oborẹ ebruphiyọ rẹ Ọghẹnẹ bun te kugbe oborẹ aghwanre vẹ erianriẹn rọyen kodo te! A cha sa guọnọ otọ rẹ orhiẹn-ebro rọyen mrẹ-ẹ, idjerhe rọyen je vrẹ oborẹ avwanre sa hiẹ mrẹ!
34 “Ono yen riẹn iroro ri Jihova,* yẹrẹ kẹ ono yen rhe dia obruche rọyen?”
35 Yẹrẹ “Ono yen vwẹ orọnvwọn kẹ jovwo re, rọ da hwosa rọyen rhivwin kẹ?”
36 Kidie obọ rọyen yen erọnvwọn eje nurhe, ọyen re ma ayen, ọyen ji vwo ayen. Ọyen a vwẹ urinrin kẹ bẹdi bẹdẹ. Isẹ.
Eta rehẹ obotọ na
^ Vwẹ Grik, “ubi.”
^ Ni Eta re Vwomaphia.
^ Yẹrẹ “guọnọ reyọ arhọ mẹ.”
^ Yẹrẹ “vẹn.”
^ Kọyen, a vwọ vwẹ oghọn vwọ tamu urhe, a me gba, rere ọ vẹ urhe na sa vwọ tan kugbe, ọ me je mọ.
^ Ni Eta re Vwomaphia.