Vwo Rhe Ihwo ri Rom 12:1-21
12 Ọtiọyena iniọvo, me vwẹ arodọnvwẹ rẹ Ọghẹnẹ vwọ rẹ ovwan, nẹ ovwan vwẹ ugboma rẹ ovwan vwọ kpahotọ kerẹ izobo ọkpokpọ rọ pha fuanfon, rẹ Ọghẹnẹ se rhiabọreyọ, kọyen ovwan vwẹ ẹgba iroro rẹ ovwan vwo ruiruo, rẹ ovwan vwọ vwẹ ẹga ọfuanfon vwọ kẹ Ọghẹnẹ na.
2 Ovwan rhe gbe nene eyeren* nana-a, ẹkẹvuọvo ovwan wene iroro rẹ ovwan, rere ovwan se vwo vwo imuẹro rẹ ọhọre rẹ Ọghẹnẹ rọ pha yoyovwin, ro fo ẹreyọ, rọ je gba.
3 Womarẹ ẹse re muwan rọye-en ra vwọ kẹ vwẹ, me vuẹ kohwo kohwo vwẹ ohri rẹ ovwan nẹ o roro kpahen oma rọyen vrẹ obo ro fori nẹ o roro-o, ẹkẹvuọvo o vwo iroro ro fiotọ kirobo rẹ esegbuyota rẹ Ọghẹnẹ vwọ kẹ ohwo ọvuọvo hepha.
4 Kirobo rẹ ugboma na vwo ẹbẹre sansan, jẹ ọ dia iruo ọvuọvo yen ayen eje ruẹ na-a,
5 ọtiọyen avwanre eje je dia ugboma ọvo vwevunrẹ Kristi, dede nẹ avwanre pha buebun. Kerẹ ẹbẹre sansan rẹ ugboma ọvo, avwanre eje wian kuẹgbe.
6 Rọ vwọ dianẹ avwanre vwo okẹ sansan womarẹ ẹse re muwan rọye-en ra vwọ kẹ avwanre na, ọ da dia okẹ rẹ aroẹmrẹ yen avwanre vwori, e jẹ avwanre mraro kirobo rẹ esegbuyota avwanre hepha;
7 ọ da dia ọ rẹ odibo egbe, e jẹ avwanre muomaphiyọ odibo egbe na; ọ ro yono, e jẹ o muomaphiyọ eyono rọyen;
8 ọ ro phiuduphiyọ ihwo awọ, e jẹ o rhe ruẹ ọtiọyen; ọ rọ ghara,* e jẹ ọ kẹkẹ obọ-ọ; ọrọvwẹrote,* e jẹ ọ frẹkotọ ruo; ọ ro gbe arodọnvwẹ, e jẹ o ru ọtiọyen vẹ omavwerhovwẹn.
9 We jẹ ẹguọnọ rẹ ovwan dia ọ rẹ omeru-u. We vwo utuoma kpahen obo re brare; ovwan churu mu obo ri yovwirin.
10 Ovwan nabọ vwo uvi rẹ ẹguọnọ kpahen ohwohwo kerẹ ihwo rẹ orua ọvo. A da ta ota kpahan ọghọemuo, ovwan kobaro* rọyen.
11 Ovwan dia egbowian,* ọ dia evwiẹrẹ-ẹ.* Jẹ ẹwẹn ọfuanfon na phi oruru phiyọ ovwan oma. Ovwan dia eviẹn kẹ Jihova.*
12 Ghọghọ fikirẹ iphiẹrophiyọ na. Chirakon rẹ ukpokpogho. Muomaphiyọ ẹrhovwo ẹnẹ.
13 Ovwan nene ihwo efuanfon* na ghare oborẹ ovwan vwori, rere ayen se vwo vwo oborẹ ayen guọnọre. Ovwan vwo ẹkuruemu ra vwọ ghọ erhorha.
14 Ovwan rha nẹrhovwo kẹ otu ri muẹkpahan ovwan; nẹrhovwo kẹ ayen, ovwan duvwun iyorin kẹ aye-en.
15 Otu re ghọghọ, nene ayen ghọghọ; otu re viẹ, nene ayen viẹ.
16 We roro kẹ ihwo efa kirobo rẹ ovwan roro kẹ oma rẹ ovwan; ovwan kparoma-a,* ẹkẹvuọvo ovwan vwomakpotọ. Ovwan ghwanra vwẹ ẹro romobọ rẹ ovwa-an.
17 Ovwan vwẹ umwemwu vwọ hwosa rẹ umwemwu kẹ ohwo vuọvo-o. Ovwan ru obo ri shephiyọ vwẹ ẹro rẹ ihwo eje.
18 Ọ da dia oborẹ ovwan se ru, ọ da dianẹ obọ rẹ ovwan yen ọ hepha, ovwan nene ihwo eje yerin vwọrẹ ufuoma.
19 Iniọvo mẹ, ovwan ruẹ orukeri-i,* ẹkẹvuọvo we jẹ ophu vwo vwọ kẹ Ọghẹnẹ; kidie e siro: “‘Orukeri* ọmẹ, mẹvwẹ yen cha hwosa,’ ọtiọyen Jihova* tare.”
20 Ẹkẹvuọvo, “ọ da dianẹ owẹnvwe hwe ọvweghrẹn wẹn, vwẹ emu kẹ re; ọ da dianẹ urhuru rẹ ame sio, vwẹ ame kẹ da; ọnana ru wo ruẹ na, wo koko ẹkuerhanre phiyọ uyovwin rọyen.”*
21 Wo jẹ umiovwo phi we kparobọ-ọ, ẹkẹvuọvo rha vwẹ erhuvwu vwo phiẹ umiovwo kparobọ.
Eta rehẹ obotọ na
^ Yẹrẹ “akpọ.”
^ Yẹrẹ “ro toro.”
^ Yẹrẹ “ọ rọ kobaro.”
^ Yẹrẹ “jowọ rẹsosuọ.”
^ Yẹrẹ “dia ihwo re frẹkotọ wian.”
^ Yẹrẹ “we gbe eghẹrẹ-ẹ.”
^ Ni Eta re Vwomaphia.
^ Yẹrẹ “iniọvo.”
^ Yẹrẹ “vwo okpiroro-o.”
^ Yẹrẹ “ovwan reihri-i.”
^ Yẹrẹ “ihriẹriọ.”
^ Ni Eta re Vwomaphia.
^ Kọyen, wo ruẹ udu rẹ ohwo na lọhọ.