Vwo Rhe Ihwo ri Rom 6:1-23
6 Kẹ die yen avwanre cha ta? E gbe muomaphiyọ umwemwu eruo rere ẹse re muwan rọye-en vwo bunphiyọ?
2 Ẹjo kakaka! Ọ vwọ dianẹ avwanre ghwu kẹ umwemwu eruo nure na, kẹ mavọ yen avwanre vwọ rhoma yerin vwẹ evun rọyen?
3 Gbanẹ ovwan rha riẹn nẹ avwanre eje re bruphiyame vwevunrẹ Kristi Jesu ji bromaphiyame vwevunrẹ ughwu rọyen?
4 Ọtiọyena, e shi avwanre vẹ ọyen womarẹ omaebrophiyame rẹ avwanre vwevunrẹ ughwu rọyen, rere kirobo ra kpare Kristi vwo nẹ ughwu womarẹ urinrin rẹ Ọsẹ na, ọtiọyen o ji fo nẹ avwanre yeren akpeyeren kpokpọ.
5 Avwanre vẹ ọyen da dia ọvo vwevunrẹ oka rẹ ughwu ro ghwuru, imuẹro herọ nẹ avwanre vẹ ọyen je cha dia ọvo vwevunrẹ oka rẹ evrẹnushi rọyen.
6 Kidie avwanre riẹnre nẹ a kanre uruemu awanre rẹ avwanre vẹ ọyen mu urhe, rere ugboma rẹ umwemwu rẹ avwanre na vwo jẹ ẹgba evwo, rere avwanre vwo jẹ eviẹn rẹ umwemwu ẹdia ọfa.
7 Kidie ohwo ro ghwuru, jẹ a rhanrọ* nẹ umwemwu rọyen re.
8 Vwọba, avwanre vẹ Kristi de ghwu kugbe, avwanre vwo imuẹro nẹ avwanre vẹ ọyen je cha rhọ kugbe.
9 Kidie avwanre riẹnre nẹ a vwọ kpare Kristi vwo nẹ ughwu nure na, o rhe che ghwu ọfa-a, ughwu rhe vwo ogangan vwẹ enu rọye-en.
10 Kidie o ghwuru fikirẹ umwemwu* ẹsiẹvo goi, ẹkẹvuọvo akpọ ro yerẹn, o yeren vwọ kẹ Ọghẹnẹ.
11 Ọtiọyena, ovwan ji ni oma rẹ ovwan kerẹ ihwo ri ghwuru vwọ kẹ umwemwu, ẹkẹvuọvo ri yerẹn vwọ kẹ Ọghẹnẹ womarẹ Kristi Jesu.
12 Ọtiọyena, ovwan rhe jẹ umwemwu suẹn kerẹ ovie vwevunrẹ ugboma rẹ ovwan ro ghwẹ na-a. Ovwan ruẹ nene urhurusivwe raye-en,
13 yẹrẹ vwẹ ugboma rẹ ovwan vwọ kpahotọ kẹ umwemwu kerẹ ekuakua ofovwin re vwo ruẹ orukuruku-u, ẹkẹvuọvo ovwan vwẹ oma rẹ ovwan kpahotọ kẹ Ọghẹnẹ kerẹ ihwo ri vrẹn nẹ ughwu rhe, ovwan me rha vwẹ ugboma rẹ ovwan vwọ kẹ Ọghẹnẹ kerẹ ekuakua ofovwin re vwo ruiruo rẹ ophiọnphiọn.
14 We jẹ umwemwu dia onini rẹ ovwa-an, rọ vwọ dianẹ ovwan rha hẹ otọ rẹ urhi-i, ẹkẹvuọvo otọ rẹ ẹse re muwan rọye-en.
15 Kẹ die yen a sa ta? E gbe ru umwemwu kidie nẹ avwanre nẹ otọ rẹ urhi vwo kpo otọ rẹ ẹse re muwan rọye-en? Ẹjo kakaka!
16 Ovwan rha riẹn nẹ ohwo rẹ ovwan vwomakpahotọ kẹ ji nyupho rọyen, ovwan kẹ eviẹn rẹ ohwo yena, owenẹ ọ dia umwemwu ro suẹn kpo ughwu yẹrẹ ẹmienyo ro suẹn kpo ophiọnphiọn?
17 Ẹkẹvuọvo, akpẹvwẹ kẹ Ọghẹnẹ, kidie dede nẹ ovwan ka dia eviẹn kẹ umwemwu, ovwan da rhe vwẹ ubiudu rẹ ovwan eje vwo nene uyono re yono ovwan.
18 E, rọ vwọ dianẹ e si ovwan nẹ obọ rẹ umwemwu nure na, ovwan kẹ eviẹn vwọ kẹ ophiọnphiọn.
19 Me ta ota kerẹ ohworakpọ fikirẹ ovwiẹrẹ rẹ ugboma rẹ ovwan; kidie kirobo rẹ ovwan vwomakpahotọ kerẹ eviẹn vwọ kẹ jẹfuọn kugbe jurhi ẹyọnrọn ro suẹn kpo jurhi ẹyọnrọn na, ovwan gba je vwomakpahotọ kerẹ eviẹn vwọ kẹ ophiọnphiọn ro suẹn kpo ẹfuọn.
20 Kidie ọke rẹ ovwan vwọ hẹ eviẹn vwọ kẹ umwemwu, ovwan nenesi rẹ ophiọnphiọ-ọn.
21 Kẹ die yen omamọ rẹ ovwan mọre ọke yena? Erọnvwọn re nẹrhẹ oma vo ovwan asaọkiephana. Kidie ukuotọ rẹ erọnvwọn yena ughwu.
22 Ẹkẹvuọvo, re vwo si ovwan nẹ obọ rẹ umwemwu rhe dia eviẹn rẹ Ọghẹnẹ nure na, kẹ ovwan mọ emamọ vwẹ idjerhe rẹ ẹfuọn, ukuotọ rọyen kẹ arhọ ri bẹdẹ.
23 Kidie osa rẹ umwemwu ọyen ughwu, ẹkẹvuọvo okẹ rẹ Ọghẹnẹ ke rha arhọ ri bẹdẹ womarẹ Kristi Jesu Ọrovwavwanre.