Vwo Rhe Ihwo ri Rom 7:1-25
7 Iniọvo, kẹ a sa tanẹ ovwan riẹnre-e, (kidie me ta ota kẹ otu re riẹn urhi na) nẹ Urhi na yen onini rẹ ohwo vwẹ uche ọke rọ dia akpọ kri te?
2 Kerẹ udje, aye rọ rọvwọnre hẹ otọ rẹ urhi rẹ ọshare rọyen vwẹ ọke rọ vwọ hẹ akpọ; ẹkẹvuọvo ọshare na de ghwu, jẹ e siro vwo nẹ otọ rẹ urhi rẹ ọshare rọyen.
3 Ọtiọyena, ọke rẹ ọshare rọyen vwọ hẹ akpọ na, e che se igberadja siẹrẹ ọ da rọvwọn ọshare ọfa. Ẹkẹvuọvo, ọshare rọyen de ghwu, jẹ o nẹ otọ rẹ urhi rọyen, ọ rha cha dia igberadja siẹrẹ ọ da rọvwọn ọshare ọfa-a.
4 Ọtiọyena iniọvo mẹ, ovwan ji ghwu vwo nẹ otọ rẹ Urhi na womarẹ ugboma ri Kristi, rere ovwan sa vwọ dia ọ rẹ ohwo ọfa, ohwo ra kpare vrẹn vwo nẹ ughwu, avwanre sa vwọ mọ emamọ kẹ Ọghẹnẹ.
5 Ọke rẹ avwanre vwo yerẹn vwo nene ugboma na, Urhi na da nẹrhẹ avwanre riẹn urhurusivwe rẹ umwemwu ro ruiruo vwẹ ugboma rẹ avwanre, jẹ ughwu ọvo yen ọnana ghwa cha.
6 Ẹkẹvuọvo, e si avwanre nẹ otọ rẹ Urhi na asaọkiephana re, kidie avwanre ghwuru vwọ kẹ orọnvwọn rọ dobọ rẹ avwanre ji, rere avwanre sa vwọ dia eviẹn vwẹ ọhọ kpokpọ womarẹ ẹwẹn na, ọ dia vwẹ ọhọ rẹ awanre womarẹ urhi na-a.
7 Kẹ die yen avwanre cha ta? Urhi na umwemwu? Ẹjo kakaka! Vwọrẹ uyota, ọ rha dia Urhi na-a, me a rha riẹn obo re se umwemwu-u. Kerẹ udje, ọ rha dianẹ Urhi na tare nẹ, “Wo vwo urhuru-u,” me a rha riẹn obo re se urhuru evwo-o.
8 Ẹkẹvuọvo, fikirẹ iji na umwemwu da nẹrhẹ koka koka rẹ urhuru evwo vwomaphia vwẹ oma mẹ, kidie urhi rha herọ-ọ, jẹ umwemwu ghwuru.
9 Vwọrẹ uyota, mi vwo arhọ ọke rẹ urhi je rhe dia-a, jẹ ọke rẹ iji na vwọ rhe nu, umwemwu da rhoma rhe dia, ọtiọyena mi de ghwu.
10 Iji ro fori nẹ o sun vwe kpo arhọ, kọyen me rhoma mrẹ nẹ o sun vwe kpo ughwu.
11 Kidie umwemwu reyọ iji na vwọ riẹriẹ ovwẹ, ji hwe vwe.
12 Urhi na komobọ pha fuanfon, iji na je pha fuanfon, ọsoso, ọ je pha yoyovwin.
13 Kẹ, urhi na rọ dia obo ri yoma yen so ughwu mẹ? Ẹjo kakaka! Umwemwu yen sorọ, rere e se vwo djephia nẹ umwemwu yen sua ughwu vwẹ oma mẹ womarẹ urhi na rọ dia obo ri yoma. Ọtiọyena, iji na nabọ dje oborẹ umwemwu bra te.
14 Kidie avwanre riẹnre nẹ Urhi na nẹ obọ rẹ Ọghẹnẹ rhe,* ẹkẹvuọvo mẹvwẹ ohwo rẹ ugboma ra shẹ kẹ umwemwu.
15 Mi vwo ẹruọ rẹ obo ri mi ruẹ-ẹ. Kidie ọ dia obo re me guọnọ ru yen mi ruẹ-ẹ, ẹkẹvuọvo obo ri mi vwo utuoma kpahen kọyen mi ruẹ.
16 Me rhọnvwere nẹ Urhi na yoma, jẹ, mi se ruẹ obo ri yoma re me guọnọ ru-u.
17 Ọ rha dia omẹvwẹ yen ruo-o, ẹkẹvuọvo umwemwu rọhẹ oma mẹ na.
18 Kidie me riẹnre nẹ emu vuọvo ro yoma hẹ ugboma* mẹ-ẹ; mi vwo owenvwe mi vwo ru obo ri yovwirin, ẹkẹvuọvo mi vwo ẹgba mi vwo ruo-o.
19 Kidie mi ruẹ emu esiri re me guọnọ ru-u, ẹkẹvuọvo umiovwo re me guọnọ ru-u kọyen me rhoma ruẹ.
20 Ọ da dianẹ mi ruẹ oborẹ me guọnọ ru-u, kọyen ọ rha dia omẹvwẹ yen ruo-o, ẹkẹvuọvo umwemwu rọhẹ oma mẹ.
21 Ọtiọyena, me da rhe mrẹ urhi nana vwẹ oma mẹ: Ọke me da guọnọ ruẹ obo ri yovwirin, obo re brare kọyen ro ẹwẹn mẹ.
22 Vwọrẹ uyota, oma rẹ urhi rẹ Ọghẹnẹ vwerhen ovwẹ vwẹ obevun mẹ,
23 ẹkẹvuọvo me mrẹ urhi ọfa vwevunrẹ oma mẹ rọ họnra vwọsua urhi ro suẹn iroro mẹ, rọ vwẹ ovwẹ ruẹ ọviẹn vwọ kẹ urhi rẹ umwemwu rọhẹ oma mẹ.
24 Me dia ohwo rẹ emuọvo-o! Ono yen che sivwin uvwe vwo nẹ ugboma nana ro ghwẹ na?
25 Me kpẹvwẹ Ọghẹnẹ womarẹ Jesu Kristi Ọrovwavwanre! Ọtiọyena, vwevunrẹ iroro mẹ, mẹvwẹ ọviẹn vwọ kẹ urhi rẹ Ọghẹnẹ, ẹkẹvuọvo ugboma mẹ ke rha ọviẹn vwọ kẹ urhi rẹ umwemwu.