Vwo Rhe Ihwo ri Rom 9:1-33
9 Uyota yen me ta kẹ ovwan vwevunrẹ Kristi na; mi guẹn efia-an. Ẹwẹn obrorhiẹn mẹ soseri kẹ vwẹ womarẹ ẹwẹn ọfuanfon na
2 nẹ mi muomaphiyọ gangan, ọkieje ọ je vwọ da vwẹ vwẹ ubiudu mẹ.
3 Mane ke me sa hẹrioma mẹ nẹ Kristi na, kerẹ ohwo re duvwun iyorin kẹ fikirẹ iniọvo mẹ re dia ihwo rẹ ẹkuotọ mẹ,
4 ihwo rẹ Izrẹl. Ayen yen a reyọre kerẹ emọ, ra vwẹ urinrin kẹ, re nene re ọphọ, ra vwẹ Urhi na kẹ, re ga vwẹ uwevwin rẹ ẹga na, re ji ve ive na kẹ.
5 Ayen yen emọ rẹ esẹ ride na, uvwiẹ rayen yen Kristi je wan rhe akpọ. E jẹ ujiri dia kẹ Ọghẹnẹ ro vwo ogangan vwẹ enu rẹ erọnvwọn eje, rhirin bẹdi bẹdẹ. Isẹ.
6 Ọ dianẹ kẹ ota rẹ Ọghẹnẹ shefia-a. Kidie ọ dia ihwo eje ri nẹ uvwiẹ rẹ Izrẹl rhe yen ghene ihwo rẹ “Izrẹ-ẹl.”
7 Ọ je dia ayen eje yen ghene dia emọ* rẹ Ebrahamu-u, kidie “Ọ re che se ọmọ* wẹn na, oma rẹ Aizik yen o che nurhe.”
8 Kọyen emọ ri nẹ uvwiẹ rọyen rhe na ghene dia emọ rẹ Ọghẹnẹ-ẹ, ẹkẹvuọvo emọ re veri na yen e keri phiyọ emọ.*
9 Kidie ọnana yen ota rẹ ive na: “Vwẹ ọke ọtiọna, mi che rhivwin rhe, Sera ko che vwiẹ ọmọshare.”
10 Ọ dia ọke yena ọvo-o, ẹkẹvuọvo ji te ọke rẹ Rebeka vwọ mrevun rẹ emọ-ivẹ siẹvo vwọ kẹ ọshare ọvo, rọ dia ọsẹ rẹ avwanre rode, Aizik;
11 rere ọhọre rẹ Ọghẹnẹ kpahen ẹsanọ rayen vwọ dia obo ri nẹ obọ rẹ Ọghẹnẹ ro se ayen na rhe, ọ dia fikirẹ iruo-o; kidie ọke re ji rhi vwiẹ aye-en, rẹ ayen ji ru erhuvwu yẹrẹ umiovwo-o,
12 a da vuẹ nẹ, “Ọ rẹ ọkpako na cha dia ọviẹn vwọ kẹ ọ rẹ otete na.”
13 Kirobo re siro: “Mi vwo ẹguọnọ ri Jekọp, ẹkẹvuọvo mi vwo utuoma kpahen Isọ.”
14 Die kọyen avwanre cha ta? Ọghẹnẹ ruẹ chọ? Kaka vwo!
15 Kidie ọ ta kẹ Mosis: “Mi che gbe arodọnvwẹ kẹ ohwo ri mi che gbe arodọnvwẹ kẹ, me je cha re ehrọre rẹ ohwo ro je vwe.”
16 Ọtiọyena, ọ dia oborẹ ohwo guọnerọ te yẹrẹ obo rọ davwẹngba te-e, ẹkẹvuọvo fikirẹ arodọnvwẹ rẹ Ọghẹnẹ.
17 Kidie isiesi ọfuanfon na ta kẹ Fero: “Fikirẹ ọnana me vwọ yanjẹ uwe vwo: rere mi vwo dje ẹgba mẹ phia vwẹ oma wẹn, e ji vwo ghwoghwo odẹ mẹ vwẹ akpọ na eje.”
18 Ọtiọyena, o gbe arodọnvwẹ kẹ kohwo kohwo ro jere, ọ me rha vwẹ uphẹn kẹ kohwo kohwo ro jere nẹ o vwo udu ọgangan.
19 Kẹ wọ cha ta kẹ vwẹ: “Diesorọ ọ je vwọ guọnọ oruchọ? Ono yen sa vwọso ọhọre rọyen?”
20 Ẹkẹvuọvo, kẹ ono yen owẹ, E ohwo, ru wọ vwọ kpahan kẹ Ọghẹnẹ? Obo ra mare sa ta kẹ ọ rọ marọ nẹ, “Diesorọ wọ vwọ ma vwẹ ọtiọna?”
21 Ọmechẹ rhe vwo ogangan vwẹ enu rẹ ọphiẹn, rọ da vwẹ ukori rẹ ọphiẹn vuọvo vwọ ma ochẹ ọvo ra vwẹ obọ tete kugbe ọfa re vwo gbe otọ?
22 Ọtiọyen ọ je hepha kẹ Ọghẹnẹ. O vwo owenvwe ro vwo dje ophu rọyen phia kpahen irumwemwu, ji dje ẹgba rọyen phia. Dedena, o vwo edirin rẹ ihwo* re nẹrhẹ ophu muo na, ihwo ri fo oghwọrọ.
23 O ru ọnana rere o vwo dje ọrho rọyen vwọ kẹ ihwo ro che gbe arodọnvwẹ kẹ, kidie o muegbe rayen phiyotọ rọ vwọ kẹ ayen urinrin,
24 kọyen avwanre ro seri, ọ dia vwo nẹ ohri rẹ ihwo ri Ju ọvo-o, ẹkẹvuọvo ji nẹ ohri rẹ ẹgborho na, kẹ die yen chọre vwẹ ọyena?
25 Kirobo rọ je ta vwẹ Hosia: “Otu re dia ihwo mẹ-ẹ yen mi che se ‘ihwo mẹ,’ aye re vwo ẹguọnọ kpahe-en kẹ ‘avwebọ’;
26 asan ra da ta kẹ ayen nẹ, ‘Ovwan dia ihwo mẹ-ẹ,’ etiyin kọyen e de se ayen ‘emọ rẹ Ọghẹnẹ ro jeghwo na.’”
27 Vwọba, Aizaya ghwoghwori kpahen Izrẹl: “Dede nẹ emọ rẹ Izrẹl sa dia buebun kerẹ ekpẹn rẹ abadi, imihwo krẹn ọvo yen e che sivwin.
28 Kidie Jihova* che guẹdjọ rẹ akpọ na ji brorhiẹn hwe, o che ru ọtiọyen kpakpata.”*
29 Vwọba, kirobo rẹ Aizaya mraro rọyen, “Ọ dianẹ kẹ Jihova* rẹ ituofovwin na yanjẹ emọ* rẹ avwanre evo vwo-o, mane avwanre rha dia kerẹ Sodọm, je họhọ Gomora.”
30 Die kọyen avwanre cha ta? Dede nẹ ihwo rẹ ẹgborho na davwẹngba rẹ ayen vwọ dia evwata-a, jẹ ayen rhe dia evwata fikirẹ esegbuyota;
31 ẹkẹvuọvo ihwo rẹ Izrẹl re davwẹngba rẹ ayen vwọ dia evwata womarẹ urhi na, se ru oborẹ urhi na guọnọre gba-a.
32 Diesorọ? Kidie ayen davwẹngba rẹ ayen vwọ dia evwata womarẹ iruo, ọ dia womarẹ esegbuyota-a. Ayen de she fikirẹ “ukuta rọ sua ekprowọ” na;
33 kirobo re siro: “Nighere! Me vwẹ ukuta rọ sua ekprowọ kugbe oragha rẹ ivun emiovwo vwo viẹ vwẹ Zayọn, ẹkẹvuọvo e che ku ohwo ro vwo esegbuyota kpahọn phiyotọ-ọ.”
Eta rehẹ obotọ na
^ Vwẹ Grik, “ubi.”
^ Vwẹ Grik, “ubi.”
^ Vwẹ Grik, “ubi.”
^ Vwẹ Grik, “echẹ rẹ ophu.”
^ Ni Eta re Vwomaphia.
^ Vwẹ Grik, “ọ cha reyọ vwo toba ji bro krẹ.”
^ Ni Eta re Vwomaphia.
^ Vwẹ Grik, “ubi.”