HÅKAN DAVIDSSON | IKUEGBE RẸ AKPEYEREN
Avwanre Bicha Iruo rẹ Aghwoghwo Na
Sweden yen e de vwiẹ vwẹ, etiyin me je dia ghwanre. Kerẹ eghene, ihwo ri vwo esegbuyota kpahen Ọghẹnẹẹ yen mi vwo mu igbeyan. Ọtiọyena, ọke rẹ ọsẹ vẹ oni mẹ kugbe oniọvo mẹ ọmọtẹ vwọ ton uyono ri Baibol phiyọ vẹ Iseri ri Jihova, mi vwo owenvwe mi vwo yono Baibol naa.
Ẹkẹvuọvo ọke rẹ ọsẹ mẹ vwo dje uvwe ededurhie, mi de brorhiẹn me vwọ vwomaba uyono ri Baibol na. O gbevwunu me vwọ mrẹ obo ri Baibol na vẹ isayẹnsi vwọ rhọnvwephiyọ ohwohwo. Ọke vwọ yanran na, o de muvwẹro nẹ Baibol na ota rẹ Ọghẹnẹ, nẹ Iseri ri Jihova reyọ vwo yono ihwo vwẹ idjerhe ọgbagba ji yeren akpọ nene iwan rọyen. Mi bromaphiyame vwẹ 1970, ẹdẹ yena yen ọsẹ mẹ ji vwo bromaphiyame. Ikpe evo vwọ wan nu, oni mẹ vẹ iniọvo mẹ emetẹ ivẹ de ji bromaphiyame.
Akpọẹriọ ọvo yen edje mẹ buebun mu akpeyeren rayen kpahen. Oka rẹ akpọ rẹ ayen yerẹn na de ji si vwe urhuru ọke me vwọ hẹ ẹgbukpe 17. Ẹkẹvuọvo, ẹga rẹ ọkieje na nẹrhẹ oma vwerhen Iseri re me vẹ ayen gbe yono kuẹgbe na, ọ da nẹrhẹ mi vwo ẹwẹn me vwọ vwomaba ayen. Mi vwo te ẹgbukpe 21, me da rhe vwomaba ayen.
Ẹdẹ vuọvo yen mẹ vẹ ọsẹ mẹ (rọhẹ obohwẹre) vwo bromaphiyame
Iruo rẹ ọkobaro rẹ ọkieje na nẹrhẹ mi vwo uvi rẹ omavwerhovwẹn, ọ da vwẹ nẹ me fobọ tuọnphiyọọ. Ọ vwerhen ovwẹ oma mi vwo ghwoghwo vwẹ unuerhuru ri Göteborg, rọ dia asan mi de ghwoghwo uyota ri Baibol na vwọ kẹ erhorha rehẹ evunrẹ ikuna na.
Vwẹ ikpe 50 re wanre na, mi vwo uphẹn rẹ oghẹresan mi vwo ghwoghwo iyẹnrẹn esiri na vwọ kẹ ihwo sansan. Ju vwe vuẹ ovwan oborẹ ọ wan tonphiyọ.
A Vwọ Reyọ MEPS Vwo Ruiruo
Me wian owian rẹ ubrọke kerẹ ohwo rọ teyen ẹbe rere me sa vwọ vwẹrote oma mẹ vwẹ iruo rẹ ọkobaro mẹ na. Vwẹ ọke yena, ewene kọ vwomaphia vwẹ oborẹ ihwo teyen ọbe wan. A vwẹ imẹshini vwo muẹ ihoho rẹ eta vwo nẹ asan ọvo vwo kpo ọfa, ukperẹ lẹd ra ghranre re vwo ruẹ ibieta sansan. Mi de yono obo ra reyọ ikọmputa re ruru obọ na vwo muegbe rẹ ipleti vwọ kẹ imẹshini rọ teyen ẹbe na.
Ẹdẹ avwanre vwọ rọvwọn
Vwẹ 1980, me da rọvwọn Helene rọ dia ọkobaro rẹ ọkieje, rọ dia ohwo oma vwerhan o de yono ẹkuruemu kpokpọ je vwa ihwo ri nẹ ẹbẹre sansan rẹ akpọ na rhe. Ọdavwẹ rẹ avwanre ọyen avwanre vwo kpo isikuru ri Giliẹd je ga kerẹ imishọnare.
Ẹkẹvuọvo, fikirẹ erianriẹn ri mi vwori vwẹ asan ra da teyen ẹbe, e de durhie uvwe vẹ Helene nẹ avwanre rhe ga vwẹ Bẹtẹl ri Sweden. Ukoko na guọnọ reyọ ekuakua rẹ ena kpokpọ vwo ruiruo rere a sa vwọ sẹro rẹ igho siẹrẹ e de printi. Ọtiọyena, vwẹ 1983, e de ji avwanre kpo Wallkill Bethel vwẹ New York rere e vwo yono avwanre obo ra reyọ Electronic Phototypesetting System (MEPS) a rẹ iniọvo na wian kpahan na vwo ruiruo.
Ọke rẹ avwanre vwo muegbe rẹ ekuakua ri MEPS vwọ kẹ Hong Kong, Mexico, Nigeria, vẹ Spain
Avwanre rhe mrẹvughe nẹ MEPS ọyen isistẹmu rọ nẹrhẹ e se siẹ ibieta vwẹ ejajẹ buebun, e mi ji phi ihoho phiyọ ayen, je nabọ rhuẹrẹ ayen vwọ kẹ ijini ra vwọ teyen ẹbe. Ẹdia rẹ avwanre kare, ọyen avwanre vwọ reyọ MEPS vwo si ibieta kpokpọ rere a sa vwọ fan ẹbe avwanre vwo kpo ejajẹ buebun. Enẹna, Iseri ri Jihova teyen ẹbe rẹ iyẹnrẹn esiri na vwẹ ejajẹ re vrẹ uriorin ọvo ikpe buebun vwọ wan nu!
Ọke vwọ yanran na, a da vuẹ vwẹ vẹ Helene nẹ avwanre kpo Asia re phi ejajẹ efa buebun phiyọ MEPS. Avwanre muegbe rẹ avwanre vwọ vwẹ ukẹcha phia rere iyẹnrẹn esiri na sa vwọ dia vwẹ ejajẹ buebun!
Ẹkuruemu rọ Fẹnẹ ọ rẹ Avwanre
Mẹvwẹ vẹ Helene kpo India vwẹ 1986. Ẹkuruemu rọ fẹnẹ ọ rẹ avwanre kọyen avwanre che yono na! Avwanre vwo te Bombay re se Mumbai enẹna, ofu rẹ ekogho na de rhi dje avwanre hwe. Ẹkuruemu rẹ ihwo ri Sweden vẹ India fẹnẹre mamọ! Vwẹ udughwrẹn rẹsosuọ na, avwanre de vwo ẹwẹn rẹ avwanre vwo rhivwin kpo.
Udughwrẹn yena vwọ wan nu, mẹvwẹ vẹ Helene de vwo ẹwẹn ọvo: ‘Avwanre guọnọ dia imishọnare. Jẹ ẹnẹna iruo rẹ imishọnare vwo te avwanre obọ re na, kẹ avwanre cha dobọji? O vwo obo rọ wanree, avwanre che phi egbabọse nana kparobọ.’
Ọtiọyena, ukperẹ avwanre vwọ djẹ, avwanre de brorhiẹn avwanre vwo yono kpahen ẹkuruemu kpokpọ nana. O kririi, mẹvwẹ vẹ Helene de rhi vwo ẹguọnọ rẹ India. Avwanre tobọ yono ejajẹ rẹ India ivẹ, Gujarati vẹ Punjabi.
Vwo Kpo Myanmar
Ọke avwanre vwo ku ewun rẹ ihwo ri Myanmar phiyọ vwẹ Ọguan Ruvie
Vwẹ 1988, e de ji avwanre kpo Myanmar, ọyen ẹkuotọ rọhẹ uvwre ri China, India, vẹ Thailand. Ẹdia rẹ isuesun ri Myanmar vwẹ ọke yena brare mamọ, isodje yen ji suẹn ekoghọ evo vwẹ ẹkuotọ na. MEPS vwo ibieta re vwo si ejajẹ rayeen, o ji vwo isọftwẹ ọfa ro se ru owian naa. Ọtiọyena, ọdavwẹ rẹsosuọ rẹ avwanre ọyen e vwo si ibieta re che vwo ruiruo vwẹ ejajẹ na, ji mu ifai na kpo Wallkill re phio phiyọ MEPS.
Helene mu ibieta re siri na phiyọ ekpu rọyen ọke avwanre vwọ hẹ ẹpọtu na. E re mu avwanre phiyọ uwodin mane kẹ ayen mrẹ ẹbe re siri vwẹ ejajẹ ri Myanmar na, fikirẹ ẹdia rẹ isuesun ri Myanmar hepha vwẹ ọke yena. Jẹ ọke ra vwọ hiẹ Helene, ọ da yọnrọn ekpu na vwẹ abọ rọyen rọ kpare kpenu. Ohwo vuọvo re vwo oniso rẹ ekpu naa!
MEPS vwẹ ukẹcha kẹ avwanre vwo ru ẹbe ẹteyọn avwanre yovwẹn phiyọ
Vwọba ejajẹ kpokpọ na, a je vwẹ ilaptọpu vẹ ijini ra vwọ teyen ẹbe vwọ kẹ ihwo ri ruiruo rẹ efanfan vwẹ Myanmar, e de ji yono ayen vwọ kpahen obo ra reyọ MEPS vwo ruiruo wan. Evo usun rẹ ihwo ri ruiruo rẹ efanfan na je mrẹ ikọmputa dẹvoo, ẹkẹvuọvo, ayen vwo owenvwe rẹ ayen vwo yono ena kpokpọ. O rhe che krii, kẹ ayen che gbobọnyẹ ijini ra vwọ teyen ẹbe rẹ ayen reyọ vwo ruiruo jovwo. Ọnana kọ cha nẹrhẹ ọbe avwanre yovwin vrẹ obo ri jovwo.
Vwẹ Nepal
Vwẹ 1991, e de ji vwe vẹ Helene vwo kpo Nepal, ọyen ẹkuotọ vwẹ obọrhe ọnre ri Himalayas. Vwẹ ọke yena, ukoko ọvo yen ghwa hẹ ẹkuotọ na, ẹbe re je herọ vwẹ ejajẹ ri Nepali ji ghwe tumukuu.
O kririi, a da rhe fan ẹbe buebun je ghare ayen vwẹ ekogho na. Nonẹna, Nepal vwo omarẹ Iseri ri te 3,000 vwẹ ikoko re vrẹ 40, ihwo re vrẹ 7,500 de rhe kpo Ẹkarophiyọ rẹ ughwu ri Jesu re ruru vwẹ ukpe ri 2022!
Ibroshọ Vwẹ Lahu
Vwẹ uvwre rẹ ukpe ri 1994 fi 1996, imishọnare re dia orere ri Chiang Mai, Thailand da ton ota eghwoghwo phiyọ vwọ kẹ ihwo ri Lahu. Lahu ọyen ejajẹ rẹ ihwo re dia kerẹ ughwru ri China, Laos, Myanmar, Thailand, kugbe Vietnam jẹ. Ẹkẹvuọvo avwanre vwo ẹbe vuọvo vwẹ ejajẹ yenaa.
Eghene ọshare ọvo ro nene imishọnare na yono kuẹgbe fan ibroshọ na “Look! I Am Making All Things New” vwo nẹ ejajẹ ri Thai vwo kpo Lahu. Eghene ọshare na vẹ ihwo ri Lahu efa re dia ọko na de koko igho, ayen da vwẹ ibroshọ vẹ igho na vwo rhe oghọn ukoko. Vwẹ ileta rẹ ayen si nene, ayen tare nẹ ayen guọnọre nẹ ihwo re jẹ ephẹrẹ ri Lahu eje nyo uyota rẹ ayen komobọ mrẹre vwẹ ibroshọ na.
Imikpe evo re vwọ kpahọn, mẹvwẹ vẹ Helene de yono ihwo ri Lahu ri ruiruo rẹ efanfan vwọ kpahen oborẹ ra reyọ MEPS vwo ruiruo wan. Ọvo usun rẹ iniọvo ri ruiruo efanfan ro bromaphiyame obọ na ga vwẹ ọfisi re de ruiruo rẹ efanfan vwẹ Chiang Mai. O gbe avwanre unu mamọ avwanre vwọ mrẹvughe nẹ ọyen fan ibroshọ ri “Look!” vwo kpo ejajẹ ri Lahu!
Mẹvwẹ vẹ Helene da rhoma rhivwin kpo India vwẹ ukpe ri 1995, ra cha ayen uko vwo vwo ekuakua ri MEPS rẹ ayen guọnọ vwọ kẹ iruo rayen na. Nonẹna, ayen vwo ẹbe buebun vwẹ ejajẹ sansan rẹ ayen jẹ vwẹ etiyin, rere ọ sa vwọ cha ihwo uko vwo yono ji yerin tẹdia rẹ omaebrophiyame.
Akpeyeren rọ Vọnre vẹ Ebruphiyọ
Mẹvwẹ vẹ Helene gare vwẹ oghọn ukoko ri Britain rhanvwe ukpe ri 1999. Avwanre vẹ ihwo re wian kpahen MEPS vwẹ esiri ukoko yen gba wian kugbe. Oma vwerhen avwanre mamọ nẹ avwanre ghwọrọ ọke avwanre evo vwẹ London, rẹ avwanre vwo ghwoghwota vwẹ ekogho ri Gujarati vẹ Punjabi! Kọke kọke a da vwẹ ejajẹ kpokpọ vwọphia vwẹ jw.org, kẹ avwanre guọnọ idjerhe rẹ avwanre vwo ghwoghwota kẹ ihwo re jẹ ejajẹ yena vwẹ ekogho avwanre de ghwoghwota.
Oma vwerhen ovwẹ mamọ nẹ ghwe vwo nẹ ọke eghene mẹ rhe yen me vwọ vwẹ akpeyeren mẹ vwọ ga Jihova, ukperẹ mi vwo mu akpọ mẹ kpahen akpọẹriọ kirobo rẹ edje mẹ ruru. Avwanre vwo ni kpuko, avwanre viẹ idiekpọvwẹ kidie nẹ avwanre brorhiẹn rẹ avwanre vwọ ro ẹga rẹ ọkiejee. Avwanre riavwerhen rẹ uphẹn rẹ avwanre vwo kin ẹkuotọ re vrẹn 30, je mrẹ oborẹ iruo rẹ aghwoghwo na vwo djobọte ihwo ri nẹ kẹgborho kẹgborho, uvwiẹ kugbe ẹrẹnvwe rhe!—Ẹvwọphia 14:6.
a E se Multilanguage Electronic Publishing System enẹna. A je reyọ MEPS vwo ruẹ ẹbe re vwomaphia vwẹ intanẹti.
