IRUERU AVWANRE VWẸ ỌKE OBUKO
Ayen ru Asan rẹ Ẹgba Rayen Teri
Germany guọghọ totọ ọke rẹ Ofovwin Akpọeje II vwo vwoba nu vwẹ 1945. Irere buebun guọghọre, isikuru hirhephiyọ ifefe, họsipito buebun guọghọ totọ, ibombu re je sa-a jehẹ asan eje. Vwọba, emu kanre, fikirẹ ọtiọyena ke rhe ghanre. Kerẹ udje, vwẹ eki rẹ obọmiekobọ, ibọta ro vwo ọnyẹ te 0.5kg (1 lb) rhe ghanre te uchunu rẹ igho ra hwa vwọ kẹ ọwiowian vwẹ udughwrẹn esan!
Iseri ri Jihova buebun rehẹ uwodi vẹ e rehẹ ọko roja jovwo fikirẹ esegbuyota rayen, oghwọrọ nana ji te ayen oma. Vwẹ 1945, e de siobọnu ayen vẹ abọ fefe, ewun rẹ ayen kuphiyọ ọvo yen rhe ayen. Iseri efa, ekuakua rẹ eyuwevwin rayen va ayen abọ. Owẹnvwe na gan vwọ kẹ ayen mamọ vwẹ ọke yena te asan rẹ evo da tobọ shero vwẹ uyono.
Iseri Rehẹ Ẹkuotọ Efa Vwẹ Ukẹcha Phia Kpakpata
Iseri ri Jihova vwẹ ẹkuotọ efa da kpahenphiyọ use rẹ iniọvo nana vwọ kẹ ukẹcha rẹ emu vẹ iwun kpakpata. Iniọvo rehẹ esiri ukoko vwẹ United States da vwẹ ovuẹ vwo rhe iniọvo rehẹ oghọn ukoko rọhẹ Bern vwẹ Switzerland nẹ ayen vwẹ ukẹcha phia vwọ kẹ iniọvo rehẹ Germany. Esiri ukoko de ji oniọvo Nathan H. Knorr, vwo kpo Europe ra vwẹrote irueru na rere ọ sa vwọ phẹre.
Nathan H. Knorr ta ota vwọ kẹ iniọvo rẹ Wiesbaden vwẹ Germany vwẹ ukpe ri 1947. Uyovwinrota enukpe na vwẹ ejajẹ ri Germany yen si phiyọ ophapha ra vwọ ya igbehẹn na vwẹ obuko rọyen: “Praise Jehovah, All Nations”
Iseri rehẹ Switzerland da kokẹ ri ghwologhwolo rẹ ayen vwọ vwẹ emu, iwun kugbe igho vwọ kpahotọ. E ke mu ekuakua na vwo kpo Bern rọ dia asan ra da nabọ sane ayen je rhuẹrẹ ayen phiyọ e ki mu ayen kpo Germany. Iseri rehẹ ẹkuotọ efa kerẹ Sweden, Canada, kugbe United States je vwẹ ukẹcha phia vwẹ iruo nana. Ọ dia ihwo ri Jihova rehẹ Germany ọvo yen ọnana fierere vwọ kẹ-ẹ, o ji fierere vwọ kẹ ihwo rehẹ ẹkuotọ efa rẹ ofovwin na je guoghọ totọ vwẹ Europe vẹ Asia.
Iyẹnrẹn Rẹ Igbevwunu Ri Nẹ Obuko Rọyen Rhe
Vwẹ uvwrẹ rẹ emeravwen evo, oghọn ukoko rọhẹ Switzerland de mu kọfi, imiki, iyubu, eka, emamọ, ifọ, eranvwe, erin vẹ erọnvwọn efa ọtiọyen vwo rhe ayen. Ayen ji toro igho vwọba.
Vwọba, Iseri ri Jihova de krun eghwa ri vwo ọnyẹ vrẹ ekpu rẹ cimeti 90 rẹ iwun, kugbẹ emwa rẹ eya vẹ eshare vwo rhe iniọvo na. Uwevwin orhẹrẹ ri January 15, 1946 da ta: “Ọ dia emwa rẹ akpọ bẹnre yen iniọvo na krun vwo rhe aye-en, ẹkẹvuọvo obọdẹn rẹ ayen. Emamọ re erọnvwọn yen iniọvo na vwo ze vwọ kẹ iniọvo rayen rehẹ Germany.”
Iseri ri Switzerland ji toro isabatu re joma bun vwo te 1,000 vwo rhe iniọvo na, ra vwọ nabọ fuẹrẹn ayen ni, ejobi na je nabọ yovwin dẹn, e dia e re guọghọre-e. O gbe iniọvo rehẹ Wiesbaden vwẹ Germany nu rẹ ayen vwo rhie ekuakua na, rẹ ayen vwọ mrẹvughe nẹ e pha yoyovwin. Oseri ri Jihova ọvo da ta: “Ọ cha bẹn ra vwọ mrẹ ushogha ra da she emwa ri vwo ekuakua iyoyovwin tiọna vwẹ Germany.”
Iseri na krun eghwa vwo rhe iniọvo rehẹ Germany ri duvwun August 1948. E de si erọnvwọn ejobi rẹ Iseri rehẹ Switzerland krun vwo rhe iniọvo rehẹ Germany, i bun vwo te ekpeti rẹ eghwa 444 ri vwo ọnyẹ vrẹ ekpu rẹ cimeti 453. Kirobo re djunute vwẹ ẹsosuọ, ọ dia iseri ri Jihova rẹhẹ Switzerland ọvo yen vwobọ vwẹ iruo rẹ ukẹcha nana-a, ẹkẹvuọvo, ayen usun rẹ ihwo re ma hanvwe ri vwobọ vwẹ iruo rẹ ukẹcha nana. Vwẹ ọke yena, Iseri ri te 1,600 yehẹ Switzerland!
“Ovwan Guọnọ Ohwohwo”
Jesu da ta: “Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.” (Jọn 13:34, 35) Ẹguọnọ yen muẹ ihwo ri Jihova vwọ kokẹ rẹ obo ri me yovwin rẹ ayen vwori, ọ dia e rẹ ayen vwo chekọ-ọ. (2 Kọrẹnt 8:1-4) Ileta rẹ Zurich siri tare nẹ, “buebun rẹ inọvo na ghwe vwo ekuakua rẹ ayen che toro-o, ẹkẹvuọvo, ayen je guọnọ vwẹ ukẹcha phia, evo rayen da vwẹ ration card [ọbe ra vwọ de emu] rayen vẹ igho vwo rhe iniọvo rayen na.”
O kriri ihwo ri Jihova rehẹ Germany ki phi ebẹnbẹn rẹ oghwọrọ na soro na kparobo-ọ. Ọrhuẹrẹphiyotọ ro nabọ ghwotọ vẹ ukẹcha ri ghwologhwolo vẹ ẹwẹn rẹ omaevwoze rẹ iniọvo rayen na yen chọn ayen uko.
Iseri vwẹ oghọn ukoko rọhẹ Bern vwẹ Switzerland sanọ iwun rẹ iniọvo na toro vwo rhe iniọvo rayen rehẹ Germany
Ekpeti rẹ ekuakua rẹ iniọvo na tori re muẹ phiyọ imoto vwẹ oghọn ukoko rọhẹ Bern
Imoto rọ vọnre vẹ ekpeti re si phiyọ nẹ “Relief Program Jehovah’s Witnesses”
Ekpeti rẹ ekuakua rẹ iniọvo na tori re krẹn phiyọ itreni re che mu vwo kpo Germany