Obo ra ghwọrọ phiyọ ofovwin pha buebun.

•   “Vwẹ ukpe rọ wanre na, igọmẹti vwẹ akpọ na eje ghwọrọ igho ro te $2.2 trillion phiyọ ifovwin.”​—The Washington Post, February 13, 2024.

 Ọ dia igho ọvo yen ọnana churobọ si-i. Roro kpahen udje ọvo: Ofovwin rọhẹ Ukraine.

•   Isodje. Ihwo evo ri yono ẹbe kodo vwo imuẹro nẹ isodje re joma te 500,000 yen a wan oma yẹrẹ hweri rhanvwe ọke ofovwin na vwọ tonphiyọ vwẹ ẹgbukpe ivẹ re wanre na.

•   Ihwo ghevweghe. Vwo nene iyẹnrẹn rẹ United Nations vwọphia, ihwo re vrẹ 28,000 yen a wan oma yẹrẹ hweri. Ẹkẹvuọvo, ohwo rode ọvo vwẹ UN da ta: “E che se kere uche ihwo rẹ ofovwin nana hweri-i.” a

 Ojaẹriọ rẹ ofovwin soro vwẹ akpọ na eje rhoro mamọ.

•   Oduduru 114. Ọnana yen uchunu rẹ ihwo vwẹ akpọ na eje rẹ ofovwin djẹ nẹ uwevwin rayen vwo nẹ September 2023.

•   Oduduru 783. Ọnana yen uchunu rẹ ihwo rẹ owẹnvwe ọgangan hwe. “Ofovwin jẹ orọnvwọn ọvo kiriguo rọ so owẹnvwe, ẹkẹn 70 rẹ 100 rẹ ihwo rẹ owẹnvwe hwe vwẹ akpọ na dia asan rẹ ozighi vẹ ofovwin hepha.”​—World Food Programme.

 Ofovwin che ghini vwoba? Avwanre che ghini vwo ufuoma? O vwo ọke rọ cha rẹ ohwo vuọvo rha cha dia ogbere-e, rẹ emu cha vwọ vọn asan eje, ihwo ejobi me riavwerhen rẹ emu rẹ otọ na? Die yen Baibol na tare?

 Baibol na mraro rọyen nẹ ofovwin cha vọn asan eje, ro vwo djisẹ rọyen kerẹ ọguiyesi.

•   “Iyesi ọfa da yan phia, ọ vwara gbagbagba, a da rhọnvwe kẹ ohwo ro chidia enu rọyen nẹ ọ reyọ ufuoma vwo nẹ akpọ na rere ayen vwo hwe omoma rayen, a da vwẹ ọlọkọ rode vwọ kẹ.”​—Ẹvwọphia 6:4.

 Iguiyesi ivẹ efa ri mudiaphiyọ owẹnvwe rọ vọn asan eje vẹ ughwu fikirẹ ọtiekọ vẹ erọnvwọn efa vwọ kpahen iyesi ọ vwara gbagbagba na. (Ẹvwọphia 6:​5-8) Wo se vwo yono kpobarophiyọ kpahen aroẹmrẹ ri Baibol nana vẹ oboresorọ re vwo vwo imuẹro nẹ o che rugba vwẹ ọke avwanre na, se uyovwinrota na “Iguiyesi Ẹne Na​—Die Yen Ayen Mudiaphiyọ?”

 O rhe che kri-i, ofovwin ko che nẹ akpọ na. Ẹkẹvuọvo, ọ dia ẹgba rẹ ohworakpọ yen cha nẹrhẹ ọ phia-a. Baibol na da ta:

•   Ọghẹnẹ cha “nẹrhẹ ofovwi fue re te oba rẹ akpọ na.”​—Une rẹ Ejiro 46:9.

•   Ọghẹnẹ che si kemu kemu ofovwin soro no. “Ko che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”​—Ẹvwọphia 21:4.

•   Ọghẹnẹ che ruo rere ihwo eje vwọ dia vwọrẹ ufuoma. “Ihwo mẹ ke cha dia asan rẹ ufuoma, asan rẹ egbemọphẹ, ẹdia rẹ omaerovwo fuefu.”​—Aizaya 32:18.

 Vwo nene aroẹmrẹ ri Baibol na, ifovwin vẹ erọnvwọn efa re phia nonẹna djephia nẹ ọke rẹ ufuoma cha vwọ vọn asan eje sikẹre re.

 Mavọ yen Ọghẹnẹ che ruo wan ufuoma vwọ dia vwẹ obaro na? Ọ cha womarẹ usuon rọyen rọhẹ obodjuvwu vwo ru ọnana. (Matiu 6:10) Wọ vwọ riẹn oborẹ Uvie na hepha vẹ obo ro mudiaphiyọ kẹ wẹ, ni ividio ọkrẹkrẹ nana Die Yen Uvie rẹ Ọghẹnẹ?