Avwanre eje guọnọ omamọ rẹ ame. UN Secretary-General António Guterres tare nẹ “ihworakpọ mrẹ bẹnbẹn rẹ ayen vwọ mrẹ omamọ rẹ ame da kidie ihwo re guọnọ omamọ rẹ ame vwẹ akpọneje buẹn phiyọ buẹn phiyọ.” Ọ lọhọ vwọ kẹ iduduru rẹ ihwo vwẹ akpọ na eje rẹ ayen vwọ mrẹ omamọ rẹ ame da-a.

 E se ghini vwo ame ro te vwọ kẹ ihwo eje? Gbanẹ omamọ rẹ ame cha rha kanra avwanre ọkieje? Die yen Baibol na tare?

Ive ri Baibol vwọ kpahen ame

 Baibol na tare nẹ ọke cha, ame gbe kanre akpọ na-a. Vwọrẹ uyota, omamọ rẹ ame cha vọn akpọ na.

 “Ame cha varhe vwẹ evun rẹ aghwa, ito ke cha djẹ nẹ aton rhe; ehavwo re rhorha ki hirhe phihọ oku, igbugbu rẹ ame ke van nẹ otọ oyaya rhe.”​—Aizaya 35:​6, 7.

 Diesorọ e se vwo vwo imuẹro kpahen ive ri Baibol yena? Mrẹ obo ri Baibol na ta vwọ kpahen obo ra ma otọrakpọ na wan.

Obo ri Baibol na ta kpahen akpọ na vẹ okinriariẹ rẹ ame rọyen

 “[Ọghẹnẹ ma otọrakpọ na] ra vwọ dia.”​—Aizaya 45:18.

 “[Ọghẹnẹ] si eghwẹghwẹ rẹ ame kpenu, o chere evwru rọye vwẹ evun rẹ osio rẹ enu hwe phihọ otọ, o mi she teye ohwo patapata.”​—Job 36:​27, 28.

 “Ke me vwẹ osio kẹ ovwan vwẹ ọke rọye, otọ na kọ mọ emamọ buebu, irhe rẹ aghwa na ke mọ ibi rayen.”​—Livitikọs 26:4.

 Ọghẹnẹ veri nẹ o che bruba kẹ ihwo rẹ Izrẹl awanre re dia eghwẹrẹ, nẹ otọ na che yovwin emu womarẹ ọ cha vwọ kẹ ayen ame ọkieje. Ọ riẹnre nẹ emu ke sa djẹ, a guọnọ ame vwẹ ọke ro fori.

 O rhe che kri-i, Ọghẹnẹ che ru obo ro ru vwọ kẹ Izrẹl awanre kẹ akpọ na ẹje. (Aizaya 30:23) Enẹna, ame rọ kanre akpọ na rhoma ganphiyọ vwẹ asan buebun, jẹ ọvo usun rẹ erọnvwọn re so ebẹnbẹn nana yen osio rọ fobọ rhọ-ọ. Die ọfa yen Baibol na ta kpahen obo re cha rhuẹrẹ ebẹnbẹn nana phiyọ?

Oborẹ ebẹnbẹn rẹ ame che vwo vwoba

 Baibol na tare nẹ Ọghẹnẹ cha womarẹ Uvie rọyen vwọ rhuẹrẹ ebẹnbẹn ri djobọte otọrakpọ na, ji te ame rọ kanre akpọ na. (Matiu 6:​9, 10) Uvie rẹ Ọghẹnẹ ọyen usuon rẹ odjuvwu ro che sun otọrakpọ na eje. (Daniẹl 2:44; Ẹvwọphia 11:15) Vwọba, Uvie rẹ Ọghẹnẹ che ru oborẹ usuon rẹ ihworakpọ che se ru-u​—o che si obo re nẹrhẹ ame kanre akpọ na no.

 Ebẹnbẹn: Aruọke ri wene djobọte okinriariẹ rẹ ame vwẹ idjerhe rhuarho. Ọnana kọ nẹrhẹ otọ na dia yaya je so oghwe rode fikirẹ osio ọgangan yẹrẹ ame rẹ abadi re vọn mwavwa hwẹ.

 Obo ra cha rhuẹrẹ ebẹnbẹn na wan: Uvie rẹ Ọghẹnẹ che si kemu kemu re guọghọ otọrakpọ na no rere akpọ na sa vwọ rhuẹrẹ oma rọyen phiyọ. Ọghẹnẹ de ve: “Nighere! Mi ruẹ erọnvwọn eje phiyọ ekpokpọ.” (Ẹvwọphia 21:5) Otọ ọyaya che vwo omamọ rẹ ame buebun, ọ me nẹrhẹ ekankọn djẹ, tobọ vwẹ asan rẹ ihwo dia enẹna-a. (Aizaya 41:​17-20) Jesu Kristi rọ dia Ovie rẹ Uvie rẹ Ọghẹnẹ che sun aruọke na vwẹ obaro obọ.

 Ebẹnbẹn: Ihwo ri roro kpahen obo ri nẹ obuko oborẹ ayen ruẹ cha-a kugbe ikọmpini evo re dia ivwurhurhu miovwo urhie, ẹtẹrhe-ame, vẹ asan ra sẹro rẹ ame phiyọ vwẹ otọ, enana ke nẹrhẹ ọ bẹn a vwọ mrẹ omamọ rẹ ame.

 Obo ra cha rhuẹrẹ ebẹnbẹn na wan: Ọghẹnẹ cha rhuẹrẹ akpọ na womarẹ o che vwo ru urhie, ẹtẹrhe-ame, abadi vẹ otọ na fon. Otọrakpọ na che hirhephiyọ iparadaisi. Baibol na da ta: “Aghwa na kugbe otọ ọyaya na ke cha ghọghọ, aton na cha ghọghọ ro de di ẹbe gbidigbidi; kerẹ igbodigbo.”​—Aizaya 35:1.

 Ebẹnbẹn: Ame rẹ ihworakpọ ghwọrọ kuẹfia bun vrẹ ame rẹ otọrakpọ na sa vwọphia.

 Obo ra cha rhuẹrẹ ebẹnbẹn na wan: Uvie rẹ Ọghẹnẹ cha nẹrhẹ e ruẹ ọhọre rẹ Ọghẹnẹ “vwẹ otọrakpọ na.” (Matiu 6:​9, 10) Uvie na cha vwẹ uyono ro me yovwin kparobọ vwọ kẹ ihworakpọ. Aizaya 11:9 tare nẹ “akpọ na cha vọn vẹ erianriẹn rẹ Ọrovwohwo.” Vẹ erianriẹn ọgbagba yena kugbe ẹguọnọ okokodo kpahen Ọghẹnẹ vẹ emama rọyen eje, ihworakpọ ke cha nabọ vwẹrote otọrakpọ oyoyovwin na vẹ erọnvwọn rehẹ evun rọyen.

•    Wo se vwo yono erọnvwọn efa kpahen oborẹ Uvie rẹ Ọghẹnẹ che ru, ni uyovwinrota na “What Will God’s Kingdom Accomplish?”

•    Rhie Baibol wẹn kpo ọbe rẹ Aizaya, uyovwin 35, wo se kpahen oborẹ otọrakpọ na che vwo hirhephiyọ iparadaisi.

•    Wo vwo yono kpahen ọhọre rẹ Ọghẹnẹ vwọ kẹ akpọ na vẹ ihworakpọ kpobarophiyọ, ni ividio na Diesorọ Ọghẹnẹ Vwọ Ma Akpọ Na?