Oseghe rẹ Usuon so ohẹrie phiyọ uvwre rẹ ihwo vwẹ akpọneje. Pew Research Center rọ fuẹrẹn ota nana vwẹ 2022 tare nẹ, “65% rẹ imiragua rehẹ ẹkuotọ 19 rẹ ayen de ru ehiahiẹ na, yen a da mrẹ ohiẹriẹ ra gha ẹmrẹ vwẹ uvwre rẹ ihwo rehẹ ukoko rẹ oseghe rẹ usuon sansan.”

 Wo ji vwo oniso nẹ oseghe rẹ usuon je hẹriẹ ihwo vwẹ ekogho wẹn? Diesorọ? O vwo obo re se ru kpahọn? Je roro kpahen obo ri Baibol na ta kpahọn.

 Baibol na mraro kpahen ọke rẹ avwanre, rọ dia “oba rẹ ẹdẹ na,” nẹ ihwo buebun che vwo iruemu re cha nẹrhẹ oyerinkugbe bẹn.

•   “Vwẹ oba rẹ ẹdẹ na ẹdẹ ebrabra cha rhe. Kidie ihwo cha guọnọ omaobọ rẹ ayen nọ, . . . e gbi se fue ọhọre rẹ aye-en.”​—2 Timoti 3:​1-3.

 Dede nẹ ihwo buebun davwẹngba rere igọmẹnti se vwọ shephiyọ, a jẹ sa mrẹ erhuvwu rọye-en. Ihwo rẹ iroro rayen vwọ so ohwohwo cha mrẹ bẹnbẹn ayen sa vwọ wian kugbe vwo si ebẹnbẹn no. Ukuotọ rọyen, obo ri Baibol na mraro rọyen o̱ke grongron re, kọyen rhi rugba.

•   “Ohwo . . . tua ohwo muotọ kẹ umiovwo rọye.”​—Aghwoghwo 8:9.

 Ẹkẹvuọvo, Baibol na vuẹ avwanre obo ra sa vwọ mrẹ erhuvwu​—usuon rẹ ohwo ro vwo ẹgba ro se vwo si oja rẹ ihworakpọ ria nonẹna no.

 Baibol na ta ota kpahẹn osun rọ nabọ muwan ro se siẹ ebenben rẹ ihworakpọ no. Ọ yehẹ Jesu Kristi. Jesu vwo ogangan, ẹgba rẹ usuon kugbe owenvwe rọ wọ ghwa okugbe vẹ ufuoma rhe ihworakpọ.

•   “Vwẹ ọke rọye o jẹn ọvwata dia buebu, rere ufuoma bu.”​—Une rẹ Ejiro 72:7.

•   “Ẹgborho na ejobi ga.”​—Une rẹ Ejiro 72:11.

 Jesu yen osun ro muwan kidie o vwo ọdavwẹ rẹ ihwo, o ki ji vwo owenvwe rọ vwọ chọn ihwo uko, marho kẹ ihwo re shenyẹ.

•   “O [che] sivwi ọ rẹ akpọ bẹn vwẹ ọke ro de kperi se, ovwiogbere kugbe ohwo ro vwo ọchuko-o. Ọ re ehrọrẹ rẹ ọvwiẹrẹ vẹ ọ rẹ akpọ bẹn, o mi sivwi arhọ rẹ ọ rẹ akpọ bẹn. Nẹ oshenyẹ vẹ ogbarogba ọ tan arhọ rayen nurhe.”​—Une rẹ Ejiro 72:​12-14.

 Yono kpobaro phiyọ kpahen uvie rẹ odjuvwu rẹ Jesu che sun na. Wọ sa mrẹ erhuvwu rẹ usuon nana vẹ obo wo se vwo bicha.

•   Ni ividio na Die Yen Uvie rẹ Ọghẹnẹ?

•   Se uyovwinrota na “God’s Kingdom​—A Government With No Corruption.”