OVWAN RA RHẸRẸ!
Egberianriẹn Bru Ọke rẹ Akpọ na Cha Vwọ Ghwọrọ Krẹn—Die Yen Baibol na ta Kpahọn?
Vwẹ January 24, 2023, egberianriẹn da rhoma si Doomsday Clock a [ọke rẹ oghwọrọ rẹ akpọ na] kẹrẹ uherevie rẹ ason, ro mudiaphiyọ oba rẹ akpọ na.
“Doomsday Clock mudiaphiyọ imuoshọ rẹ, ihworakpọ cha vwọ so oghwọrọ kẹ oma rayen. Vwẹ Tuesday, egberianriẹn da rhoma si ọke rẹ oghwọrọ na kẹrẹ uherevie rẹ ason vwọ vrẹ obo ri jovwo. Ayen ru ọnana fikirẹ ofovwin rẹ Ukraine vẹ ofovwin ra da sa ibọmbu re sa guọghọ asan buebun ẹsiẹvo kugbe aruọke rẹ akpọ na ro miovwẹn phiyọ.”—AFP International Text Wire.
“Egberianriẹn tare vwẹ Tuesday nẹ e bru ọke rẹ oghwọrọ rẹ akpọ na krẹn kpo aroẹbrẹ 90 tavwen ọke ki te ughọjọ ihwivẹ rẹ ason, rọ dia ọke rẹ ihworakpọ cha vwọ so oghwọrọ kẹ oma rayen.”—ABC News.
“Ẹko rẹ egberianriẹn evo vwẹ orhọesio phia nẹ, imuoshọ rẹ ihworakpọ sa vwọ so oghwọrọ kẹ oma rayen enẹna rhe gan vrẹ obo ri jovwo.”—The Guardian.
Oba rẹ akpeyeren rẹ ihworakpọ vẹ otọrakpọ na sikẹre re? Ofori nẹ a djoshọ rẹ obo re cha phia vwẹ obaro na? Die yen Baibol na tare?
Obo re cha phia vwẹ obaro na
Baibol na tare nẹ “akpọ na herọ bẹdẹ,” nẹ o ji vwo ihwo re cha “dia enu rọye bẹdẹ.” (Aghwoghwo 1:4; Une rẹ Ejiro 37:29) Ọtiọyena ihworakpọ cha sa ghwọrọ otọrakpọ na yẹrẹ hirhephiyọ asan ra cha sa dia-a.
Ẹkẹvuọvo, Baibol na ghene ta ota kpahen oba. Kerẹ udje, ọ tare nẹ “akpọ na rha wanvrẹ.”—1 Jọn 2:17.
Wọ sa vwọ riẹn obo ri Baibol na mudiaphiyọ rọ vwọ ta ota kpahen oba rẹ akpọ na, se uyovwinrota na, “Is the World Coming to an End? What Is the Apocalypse?”
Wo se vwo yono obo ri Baibol na tare kpahen obo re cha phia vwẹ obaro na, se uyovwinrota na, “When Will the World End?”
Vwo omamọ rẹ uruemu
Baibol na sa chọn avwanre uko vwo vwo omamọ rẹ uruemu dede nẹ ebẹnbẹn hẹ akpọ na asaọkiephana. Idjerhe vọ?
Baibol na kẹ avwanre uvi rẹ uchebro. (2 Timoti 3:16, 17) Kerẹ udje, se uyovwinrota na, “How to Control Worry” wọ mrẹ obo ri Baibol na sa vwọ chọn wẹ uko vwọ sẹro rẹ omamọ rẹ uruemu dede nẹ wo hirharokuẹ ebẹnbẹn rẹ akpeyeren.
Baibol vwẹ iphiẹrophiyọ ra sa vwẹroso vwọ phia kpahen obaro na. (Rom 15:4) Ọ nabọ dje obo re se rhẹro rọyen asaọkiephana kugbe obaro na, rọ chọn avwanre uko vwo fiudugberẹ siẹrẹ e de hirharokuẹ ebẹnbẹn re phia vwẹ akpọ na.
Wọ sa vwọ mrẹ erere vwo nẹ Baibol na rhe, avwanre durhie uwe nẹ wọ davwen uyono ri Baibol rẹ avwanre ni nonẹna.
a “Doomsday Clock ọyen orọnvwọn rọ vwẹ orhọesio vwọ kẹ ihwo kpahan oborẹ ihworakpọ cha vwọ ghwọrọ otọrakpọ na kẹrẹkpẹ, womarẹ ekuakua ri muoshọ rẹ ayen vwẹ obọ rayen vwo ru. Ọyen obo re vwo ru udje, rọ vwẹ ẹkarophiyọ phia kpahen imuoshọ ro fori nẹ a rhuẹrẹphiyọ siẹrẹ a da guọnọ dia akpọ na.”—Bulletin of the Atomic Scientists.