Vwẹ May 19, 2022, United Nations Security Council nyo iyẹnrẹn mie ihwo ride 75 rayen nẹ, “ọkanrovwẹ rẹ emuọre rẹ Ọga rẹ akpọeje ra riẹn phiyọ COVID-19 vẹ obẹnbẹn rẹ aruọke ru miovwinphiyọ, rhoma fru erhanre fikirẹ ofovwin rọhẹ Ukraine asaọkiephana.” A ta ọyena obọ, Ọbe na Economist da je tanẹ, “owẹnvwe hẹ akpọ obọ, ifovwin rhoma vwomaba, ọna rhe nẹrhe owẹnvwe na ganphiyọ.” Baibol na mraro rọyen jovwo re nẹ emuọre cha kanre vwẹ ọke rẹ avwanre na, ọ je vuẹ avwanre obo re se vwo yerin ghene.

•    Aroẹmrẹ ri Jesu: “Ẹgborho cha vwọ so ẹgborho, uvie cha vwọ so uvie, owẹvwe che fi.”​—Matiu 24:7.

•    Ọbe rẹ Ẹvwọphia dje kpahen iguiyesi ẹne. Ọvo rayen mudiaphiyọ ofovwin. Ọ rọ vwọ kpahọn mudiaphiyọ owẹnvwe, ọke ra cha vwo vwanvwen emuọre kẹ ihwo je cha dia. “Me mrẹ iyesi obiebi, ohwo rọ gua vwo ovwanvwọn vwẹ obọ. Mi de nyo obo re họhọ urhuru. . . Rọ tare nẹ, ‘uche osa ra hwa phiyọ owian rẹ ukpẹdẹ kọyen a cha vwo dẹ ovwanvwọn rẹ iwiti! Ovwanvwọn rẹ ibali erha kọ je dia uche osa ra hwa phiyọ owian rẹ ukpẹdẹ.’”​—Ẹvwọphia 6:​5, 6, Contemporary English Version.

 A mrẹ orugba rẹ aroẹmrẹ ri Baibol nana asaọkiephana rọ dia ọke rẹ Baibol na seri nẹ “oba rẹ ẹdẹ na.” (2 Timoti 3:1) Wọ da guọnọ riẹn phiyọ kpahen “oba rẹ ẹdẹ na” kugbe iguiyesi ẹne rehẹ Ẹvwọphia na, wo se ni ividio na Akpọ na Wenere Rhanvwe Ukpe ri 1914 wo ji se uyovwinrota na “Iguiyesi Ẹne Na​—Die Yen Ayen Mudiaphiyọ?”

•    Baibol na vwo uchebro rọ sa wian kẹ wẹ, uchebro rọ sa chọn avwanre uko vwo hirharoku egbabọse sansan, kugbe emuọre rọ kanra je tobọ ghanranphiyọ. Wọ sa mrẹ udje rẹ ọnana vwẹ uyovwinrota na “How to Live on Less.”

•    Baibol na je kẹ avwanre iphiẹrophiyọ nẹ erọnvwọn che yovwin. O veri nẹ ọke cha rẹ “ọka buebu [cha vwọ] dia otọ na” rẹ kohwo kohwo cha vwọ mrẹ emu re tututu. (Une 72:16) Wọ vwọ riẹn phiyọ kpahen iphiẹrophiyọ rẹ Baibol na vwọ kẹ avwanre kpahen obaro na vẹ oboresorọ wo se vwo vwo imuẹro kpahọn, biko se uyovwinrota na “A Real Hope for a Better Tomorrow.”