Vwẹ 2022, igọmẹti vwẹ akpọneje da ghwọrọ igho ro bun te $2.24 trillion (U.S.) phiyọ ituofovwin rayen, rọ dia igho ro bun vrẹ oborẹ ayen ghwọrọ jovwo, ọnana phiare fikirẹ ofovwin ri Russia kpare kpo Ukraine. Vwo nene iyẹnrẹn ri Stockholm International Peace Research Institute (SIPRI) vwọphia vwẹ April 2023, ọnana yen obo re phiare vwẹ ukpe ri

•   Igho ra ghwọrọ phiyọ ituofovwin ri Europe “vwẹ ẹkẹn 13 rẹ ujorin vwo kpenu ukpe yena, ọnana yen igho ro me kpenu rẹ igọmẹti ghwọrọre rhanvwe ukpe ri 1991.”

•   “Eghwaghwọrọ ri Russia…vwẹ ẹkẹn 9.2 rẹ ujorin vwo kpenu vrẹ obo ri jovwo, ọ da nẹrhẹ ayen nẹ ẹdia iyorin vwo kpo ẹdia erha vwẹ usun rẹ ihwo re ma ghwọrọ igho phiyọ ituofovwin rayen vwẹ akpọneje.”

•   United States jehẹ ẹdia rẹsosuọ vwẹ usun rẹ ẹkuotọ re ma ghwọrọ ighọ phiyọ ituofovwin rayen vwẹ akpọneje, “ayen vwẹ ẹkẹn 39 rẹ ujorin vwo kpenu.”

 Dr. Nan Tian, rọ dia ọvo usun rẹ ihwo rehẹ ukoko rẹ SIPRI da ta: “Igho ra ghwọrọ phiyọ ituofovwin ro kpenu phiyọ vwẹ ikpe evo rhire na, ọyen odjephia nẹ avwanre yerẹn akpọ rọ vọnre vẹ oshoshọ.”

 Baibol na mraro rọyen phiyotọ nẹ ẹgba rẹ usuon ri me vwo ẹgba vwẹ akpọ na cha da họnra je so okpetu kẹ omoma rayen, ọ je vuẹ avwanre obo re cha ghwa obọdẹn rẹ ufuoma rhe.

•   Baibol na se ọke avwanre de yerẹn na “ọke rẹ obo oba.”​—Daniẹl 8:19.

•   Ọbe ri Daniẹl tarọ phiyotọ nẹ ẹgba rẹ usuon cha họnre omoma rayen vwẹ ọke yena. Ẹgba rẹ usuon nana cha “họnre,” yẹrẹ sivwin ọrho. Ohọnre yena cha nẹrhẹ ayen ghwọrọ “efe” vẹ igho buebun.​—Daniẹl 11:​40, 42, 43.

 Wo se vwo yono kpahen aroẹmrẹ ri Baibol nana kpobarophiyọ, ni ividio na, Fulfilled Prophecy​—Daniel Chapter 11.

•   Baibol na tare nẹ Ọghẹnẹ che wene usuon rẹ ihworakpọ. Ọ “cha vwẹ uvie ọvo mu, ra sa guọghọ-ọ eyẹ e che siobọ nẹ ekete rọye kẹ ihwo ọfa-a. Ọ cha guọghọ ivie nana ejobi ibribro ọ me vwẹ ayen te oba, ke mudia bẹdẹ.”​—Daniẹl 2:44.

•   O rhe che kri-i, Jihova a Ọghẹnẹ che ru oborẹ ihworakpọ se ru-u​—ọ cha ghwa obọdẹn rẹ ufuoma rọ cha tọn rhe. Mavọ yen o che ruo wan? Usuon rọyen rọhẹ odjuvwu na che si ekuakua rẹ ofovwin ejobi no, ji phioba phiyọ koka koka rẹ ozighi.​—Une rẹ Ejiro 46:​8, 9.

 Wo se vwo yono erọnvwọn efa rẹ Uvie rẹ Ọghẹnẹ che ru kpobarophiyọ, se uyovwinrota na, “Under God’s Kingdom ‘Peace Will Abound.’”