OVWAN RHA RHẸRẸ!
Ihwo ri Gbe Ozighi vẹ Ẹwẹn rẹ Ayen Vwo Wene Usuon—Die Yen Baibol na Tare?
Ihwo buebun gbe ozighi vẹ ẹwẹn rẹ ayen vwo wene usuon, ọnana kọ nẹrhẹ ihwo vwẹ akpọ na eje rọ ẹnwan.
Ihwo mrẹ bẹnbẹn rẹ ayen vwo votu vwẹ ukpe ri 2023-2024 na fikirẹ uruemu rẹ ozighi egbe sansan re phiare vẹ iyẹnrẹn ri shekpahen ihwo rẹ igọmẹti ri te 39 soso re hweri vwẹ Mexico ri bun vrẹ ukeri rẹ ihwo ra niyẹnrẹn rayen jovwo re.
O krinọ naa, a niyẹnrẹn rẹ ozighi egbe buebun vwẹ Europe, kerẹ udje, vwẹ May 15, 2024, e dino hwe prime minister ri Slovakia.
Vwẹ July 13, 2024, e dino hwe Donald Trump rọ dia iprẹsidẹnti ri United States jovwo, ọnana rọ phiare na kpogho ẹkuotọ na.
Diesorọ ihwo vwo gbe ozighi vẹ ẹwẹn rẹ ayen vwo wene usuon? Ozighi egbe na che vwoba? Die yen Baibol na tare?
A mrarọ rọyen phiyotọ nẹ ihwo cha hẹriẹ oma fikirẹ oseghe rẹ usuon
Baibol na tarọ phiyotọ nẹ vwẹ ọke rẹ avwanre na, rọ dia “ẹdẹ re koba na,” ihwo buebun che gbe ozighi ji vwo uruemu re vwo jẹ ohwohwo ẹruọ.
“Vwẹ ẹdẹ re koba na ọke ọgangan rọ bẹn eyeren cha rhe. Kidie ihwo . . . cha kpẹvwẹ ẹse-e, cha fuevu-un, . . . ota rẹ ohwo ọfa cha ro aye-en, . . . cha djoma, . . . cha shẹ ihwo, che ru uyovwin gangan, che ni oma rhuarho.”—2 Timoti 3:1-4.
Baibol na je ta nẹ oyanghan cha vọn asan eje, kerẹ ihwo vwo gbevwọsuẹ igomẹti vẹ uruemu ozighi egbe re cha dia vwẹ ọke rẹ avwanre na. (Luk 21:9, eta rehẹ obotọ na) Dedena, uruemu ozighi egbe vẹ ohẹriẹ cha dia bẹdẹẹ.
Oba rẹ ozighi egbe vwọ kpahen usuon
Baibol na djerephia nẹ Ọghẹnẹ cha reyọ usuon rọyen rọhẹ obodjuvwu vwo wene usuon rẹ ihworakpọ.
“Ọghẹnẹ rẹ odjuvwu na cha vwẹ uvie ọvo mu . . . Ọ cha guọghọ ivie nana ejobi ibribro ọ me vwẹ ayen te oba, ke mudia bẹdẹ.”—Daniẹl 2:44.
Uvie rẹ Ọghẹnẹ cha nẹrhẹ ufuoma vẹ okugbe dia otọrakpọ na.
E se Jesu Kristi rọ dia Osun rẹ Uvie rẹ Ọghẹnẹ “Ọmọ rẹ ovie rẹ Ufuoma, . . . ufuoma rọye se vwo oba-a.”—Aizaya 9:6, 7.
Enẹna, ihwo rẹ Uvie na suẹn yono vwọ kpahen oborẹ ayen se vwo yerin vwọrẹ ufuoma. Baibol na tare nẹ “ayen che duvwu oda rayen phihọ ighwro, ibiri rayen phihọ egbage; orere gbe cha kparọ oda vwọ so orere, eyẹ ayen gbe cha kpare ofovwi ọfa-a.”—Aizaya 2:3, 4.
Wo vwo yono kpobarophiyọ, se uyovwinrota na “Die yen Uvie rẹ Ọghẹnẹ Che Ru?” wo ji nẹ ividio na Die Yen Uvie rẹ Ọghẹnẹ?
Wọ je sa Fuẹrẹn
UWEVWIN ORHẸRẸ
Die yen Uvie rẹ Ọghẹnẹ Che Ru?
Jesu riẹnre nẹ Uvie rẹ Ọghẹnẹ ọvo yen sa rhuẹrẹ ebẹnbẹn akpọ na phiyọ. Die yen Uvie na rure ro se ru imuẹro avwanre gan?
OVWAN RHA RHẸRẸ!
Ihwo ra Vwẹrosuẹ Ihwo ri Suẹ-ẹn—Die Yen Baibol na Tare?
Baibol na jiriro kẹ avwanre nẹ a jomaotọ vwọ kpahen ihwo rẹ avwanre vwẹrosua, ọ da je vuẹ avwanre kpahen ohwo ro se si ebẹnbẹn rẹ avwanre no vwẹ obaro na.
OVWAN RHA RHẸRẸ!
Diesorọ Oseghe rẹ Usuon vwọ Hẹriẹ Ihwo?—Die Yen Baibol na Tare?
Oseghe rẹ usuon hẹriẹ ihwo vwẹ akpọeje. Baibol na ta ota kpahẹn osun rọ nabọ muwan ro se siẹ ebenben rẹ ihworakpọ no.
UWEVWIN ORHẸRẸ
Ono Yen Ovie rẹ Uvie rẹ Ọghẹnẹ?
SPECIAL CAMPAIGN
Davwen Uyono ri Baibol rẹ Avwanre Ni
Riavwerhen rẹ uyono ri Baibol rẹ ọphẹ vẹ oyono romobọ.
