Vwẹ May 24, 2022, emu ra ghẹmrẹ ọvo da phia vwẹ omorere ọvo vwẹ Uvalde, Texas, U.S.A. Vwo nene obo rẹ The New York Times tare, “ọshare ọvo sa emọ rẹ isikuru 19 vẹ iyono ivẹ hwe . . . vwẹ Robb Elementary School.”

 Ọ da ohwo mamọ nẹ emu ri muoshọ tiọyena phia vwẹ asan buebun enẹna. USA Today tare nẹ vwẹ United States, “ohwekufia ri te 249 yen phiare vwẹ isikuru sansan vwẹ ukpe rọ wanre na ọvo, rhavwẹn 1970 rhe na, a je rhe mrẹ ohwekufia ro bun te ọtiọyen vwẹ ukpe vuọvo dẹvo-o.”

 Diesorọ ogbiru nana vwọ phia? Mavọ yen e se vwo yerin ghene iruemu rẹ ọkon tiọyena? Iphiẹrophiyọ herọ nẹ ohwekufia tiọyena che vwoba? Baibol na kpahenphiyọ enọ nana.

•    Baibol na dje ọke rẹ avwanre na phiyọ “oba rẹ ẹdẹ” na rẹ ihwo rhe che “vwo omaeririo-o” ayen “ke djoma,” ro mudiaphiyọ nẹ ayen che gboja kẹ ihwoefa ji ru obo re brare. Ihwo ri dje oka rẹ iruemu tiọyena phia che rhe “miovwẹ phihọ.” (2 Timoti 3:​1-5, 13) Wo vwo yono kpobarophiyọ, se uyovwinrota na “Did the Bible Predict the Way People Think and Act Today?”

 Ihwo evo ki roro, ‘Diesorọ Ọghẹnẹ rha dobọ rẹ imuoshọ kerẹ ihwunu re muẹ vwọ sa ihwo vwe isikuru na jẹ-ẹ?’ Wo sa vwọ mrẹ ẹkpahọnphiyọ rẹ Baibol na vwọ kẹ onọ yena, se uyovwinrota na “Bad Things Happen to Good People​—⁠Why?”

•    “Kemu kemu re siri phihọ otọ rhabae rhe, e si ayen phihọ otọ kẹ eyono rẹ avwanre, rere vwẹ . . . uchebro ro nẹ ẹbe ọfuanfon na rhe avwanre se vwo iphiẹrohọ.”​—⁠Rom 15:⁠4.

 Odjekẹ ri Baibol sa chọn wẹ uko vwo yerin ghene ohwekufia rọ vọn akpọ na. Wọ da guọnọ evuẹ efa, ni Awake! ro vwo uyovwinrota na, “Will Violence Ever End?”

 Vwọ kẹ iroroẹjẹ kpahen oborẹ emiọvwọn sa vwọ chọn emọ rayen uko vwo yerin ghene erharhe rẹ iyẹnrẹn re nyo, se uyovwinrota na, “Disturbing News Reports and Your Children.”

•    “Nẹ oshenyẹ vẹ ogbarogba ọ tan arhọ rayen nurhe.”​—⁠Une Rẹ Ejiro 72:14.

•    “Ayen ki che duvwu elọkọ rayen phihọ ighwro, ibiri rayen phihọ egbage re vwo fru odi; ẹgborho gbe kpare ọlọkọ vwọ so ẹgborho-o, ayen gbi che nyo umri rẹ ofovwi ọfa-a.”​—⁠Maika 4:⁠3.

 Ọghẹnẹ che ru oborẹ ihworakpọ se ru-u. Uvie Rọyen ro che sun nẹ odjuvwu rhe cha guọghọ ekuakua rẹ ofovwin eje no ji phioba phiyọ ozighi egbe. Wo sa vwọ riẹn kpobarophiyọ kpahen oborẹ Uvie rẹ Ọghẹnẹ che ru, se uyovwinrota na, “Under God’s Kingdom ‘Peace Will Abound.’ ”