Uweren Ọgangan se Ghini nẹ Akpọ Na?
Nẹ ẹkuotọ kpo ẹkuotọ, ihwo ki nudje nene irhuvwun kidie ayen no nẹ uweren akpọ na rhoma ganphiyọ. Ọga rẹ akpọeje ra riẹn phiyọ COVID-19 rhoma nẹrhẹ erọnvwọn braphiyọ kidie ọ nẹrhẹ a kanre ihwo djuwevwin, erọnvwọn kanre, ọ je rhe nẹrhẹ ebẹnbẹn rẹ omaesivwo rhe dia. Ofẹnẹ rode rọ herọ vwẹ uvwre rẹ edafe vẹ ivwiogbere da rhe teyenphia.
Uweren ọgangan ro nene akpọeje na che ghini vwoba? E. Baibol na djisẹ rẹ oborẹ Ọghẹnẹ che ru vwo phioba phiyọ ebẹnbẹn sansan re hirharokuẹ.
Ebẹnbẹn uweren sansan rẹ Ọghẹnẹ che phioba phiyọ
Ebẹnben Na: Ihworakpọ ji se rhi ru ọrhuẹrẹphiyotọ vuọvo rẹ oborẹ ayen se vwo ru ọdavwẹ rẹ ihworakpọ eje vwọ kẹ aye-en.
Obo ri Che Phioba Phiyọ Ebẹnbẹn Na: Ọghẹnẹ cha reyọ usuon rọyen rọ dia Uvie rẹ Ọghẹnẹ vwo wene ọ rẹ ihworakpọ. O che sun otọrakpọ na eje vwo nẹ odjuvwu rhe—Daniẹl 2:44; Matiu 6:10.
Obo ri Che nẹ Obuko Rọyen Rhe: Uvie rẹ Ọghẹnẹ cha nabọ vwẹrote ọdavwẹ rẹ ihwroakpọ eje gbagba, kidie o che sun otọrakpọ na eje. Ihworakpọ ra cha dia ivwiogbere yẹrẹ ru ẹnwan sẹ uweren cha rhoma gan vwẹ obaro na-a. (Une Rẹ Ejiro 9:7-9, 18) Ukperẹ ọtiọyen, ayen cha riavwerhen rẹ iruo rẹ ayen ruru ji yerẹn omamọ rẹ akpọ rọ vọnre vẹ omavwerhovwẹn vẹ orua rayen. Baibol na veri nẹ, “ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye. Ayen gbe bọn rẹ ohwo ọfa da dia-a; ayen gbe kọn re ohwo da rio-ọ.”—Aizaya 65:21, 22.
Ebẹnbẹn Na: Ihworakpọ cha sa vrabọ rẹ erọnvwọn re sua ojaẹriọ-ọ, ọ je dia ọkieje ayen cha sa vwọ mrẹ oborẹ ayen guọnọre vwẹ akpeyerẹ-ẹn.
Obo ri Che Phioba Phiyọ Ebẹnbẹn Na: Womarẹ Uvie rọyen, Ọghẹnẹ che si kemu kemu rọ nẹrhẹ oshọ muẹ ihwo no.
Obo ri Che nẹ Obuko Rọyen Rhe: Vwẹ otọ rẹ ẹroevwote rẹ Ọghẹnẹ, korọnvwọn korọnvwọn rẹ ihworakpọ guọnọre ayen vwo yerin vwẹ akpeyeren cha dia. Kerẹ udje, ifovwin, ọkanrovwẹ rẹ emu kugbe ega cha dia emu rẹ awanre. (Une Rẹ Ejiro 46:9; 72:16; Aizaya 33:24) Ọghẹnẹ da ta: “Ihwo mẹ ke cha dia asan rẹ ufuoma, asan rẹ egbemọphẹ, edia rẹ omaerovwo fuefu.”—Aizaya 32:18.
Ebẹnbẹn Na: Ọkieje yen ihwo ri vwo urhuru vwo shenyẹ ihwo efa.
Obo ri Che Phioba Phiyọ Ebẹnbẹn Na: Ihwo rehẹ otọ rẹ Usuon rẹ Ọghẹnẹ che djephia nẹ ayen vwẹ ẹguọnọ rẹ ihwo efa kobaro vwọ kẹ ọrayen.—Matiu 22:37-39.
Obo ri Che nẹ Obuko Rọyen Rhe: Vwẹ otọ rẹ Uvie rẹ Ọghẹnẹ, ihwo ejobi cha vwẹrokere ẹguọnọ rẹ Ọghẹnẹ, ro “ghwe churu obọ muẹ ọrọye ọvo-o.” (1 Kọrẹnt 13:4, 5) Baibol na da ta: “Ayen cha wan ohwohwo oma-a vwẹ ugbenu ọfuanfon mẹ-ẹ; kidie akpọ na cha vọn vẹ erianriẹn rẹ Ọrovwohwo kirobo rẹ ame vọn urhie na.”—Aizaya 11:9.
Baibol na djerephia nẹ ẹdẹ oba rẹ eyeren nana yen avwanre de yerẹn na, eriyina o rhe che kri-i, Ọghẹnẹ che phioba phiyọ ebẹnbẹn uweren ọgangan sua eje. a (Une Rẹ Ejiro 12:5) Tavwen ọyena ke phia. Uchebro ri Baibol sa chọn avwanre uko vwo yerin ghene kebẹnbẹn kebẹnbẹn rẹ uweren ọgangan sua enẹna. Kerẹ udje, ni iyovwinreta na “How to Live on Less” vẹ “A Balanced View of Money.”
a Jihova ọyen odẹ rẹ Ọghẹnẹ kirobo rẹ Baibol na tarọ.—Une Rẹ Ejiro 83:18, NW.
b Wo se vwo yono kpahen oborẹ wọ sa vwọ vwẹroso Baibol na, ni uyovwinrota na, “Baibol Na—Ọbe rẹ Uyota, ra sa Vwẹroso.”
Wọ je sa Fuẹrẹn
UWEVWIN ORHẸRẸ
Die yen Uvie rẹ Ọghẹnẹ Che Ru?
Jesu riẹnre nẹ Uvie rẹ Ọghẹnẹ ọvo yen sa rhuẹrẹ ebẹnbẹn akpọ na phiyọ. Die yen Uvie na rure ro se ru imuẹro avwanre gan?
