Idin ri te omarẹ oduduru 70 yehẹ evun rẹ akpọ na nonẹna, buebun rayen reyọ ọvo usun rẹ ejajẹ rẹ idin re vrẹ 200 vwo ruiruo. Ọ da ohwo mamọ nẹ ọke buebun na, a vwẹ ẹro okueku vwo nẹ ayen, kerẹ udje:

•   “Vwẹ akpọ na eje, ihwo kuẹrofia vwọ kẹ uturhi rẹ idierhọ vẹ ihwo nyẹme te-e vwori.”​—National Association of the Deaf (U.S.).

•   “Vwẹ ẹkuotọ buebun rẹ obọ yovwẹn cha, idierhọ yen ihwo re ma dia igbere, ayen mrẹ bẹnbẹn rẹ ayen vwo kpo isikuru, mrẹ iruo ji nyo ovuẹ rẹ ayen guọnọre.”​—World Federation of the Deaf.

 Mavọ yen oma ruẹ Ọghẹnẹ kpahen idierhọ? Die yen Baibol na ta kpahen idierhọ? Kẹ mavọ yen Iseri ri Jihova vwọ vwẹ ukẹcha kẹ ayen nonẹna?

Ẹro rẹ Ọghẹnẹ Vwo nẹ Idin

 Baibol na tare nẹ Jihova a Ọghẹnẹ vwo ọdavwẹ rẹ idierhọ. Ọghẹnẹ guọnọre nẹ e vwo ọdavwẹ rayen, ọ je guọnọ nẹ ayen mrẹ erere vwo nẹ uyono rọyen.

 Ẹkpo ri Baibol: “Ovwan harha odierhọ-ọ.”​—Levitikọs 19:14.

 Ẹkpo ri Baibol: “Ọghẹnẹ ghwomaphiyọ ẹbẹre ọvo jẹ ọvo vwo-o.”​—Iruo rẹ Iyinkọn Na 10:34.

 Ẹkpo ri Baibol: “Jesu da tuẹn ekion . . . phiyọ, . . . ji ghwoghwo iyẹnrẹn esiri rẹ Uvie na.”​—Matiu 9:35.

 Ẹkpo ri Baibol: Jesu tobọ “nẹrhẹ idierhọ nyẹme, ihwo re sa ta ota-a da ta ota.”​—Mak 7:37.

 Ẹkpo ri Baibol: “Erhọn rẹ odierhọn ko phe ghwroro.”​—Aizaya 35:5.

 Obo ro mudiaphiyọ: Jihova tarọ phiyotọ nẹ idierhọ che nyẹme.​—Aizaya 29:18.

Mavọ Yen Iseri ri Jihova Vwọ Vwẹ Ukẹcha kẹ Idin Nonẹna?

 Iseri ri Jihova ghwoghwo ovuẹ rẹ iphiẹrophyọ vwọ kẹ idierhọ rehẹ akpọ na eje. Mavọ yen avwanre ruo wan? Avwanre vwo Baibol vẹ ividio sansan re vwo yono Baibol na vwẹ ejajẹ rẹ idin re vrẹ 100. Avwanre ji vwo ọrhuẹrẹphiyotọ rẹ uyono ri Baibol vẹ emẹvwa rẹ Inenikristi vwẹ ejajẹ rẹ idin. Avwanre ruẹ enana eje ọphẹ vwọ kẹ kohwo kohwo rọ guọnọ ukẹcha rẹ Ọghẹnẹ. Diesorọ? Kidie Jesu jẹ iji nana kẹ avwanre, rọ vwọ ta: “Ọphẹ yen a vwerọ kẹ ovwan, ovwan je vwọ kẹ ihwo ọphẹ.”​—Matiu 10:8.

 Wọ sa mrẹ erọnvwọn nana vwẹ intanẹti yẹrẹ danlodu rayen phiyọ ifonu wẹn womarẹ wọ che vwo kpo:

 JW.ORG. Djobọte ẹbẹre rẹ ejajẹ rọhẹ obenu rẹ wẹbsaiti na, wọ cha mrẹ evuẹ sansan vwẹ ejajẹ rẹ idin.

 Aplikeshọni ri JW Library Sign Language. Wo de vwo aplikeshọni nana vwẹ ifonu wẹn, wọ sa danlodu yẹrẹ hworo ividio rẹ idin sansan vwẹ evun rọyen.

Erọnvwọn re Vwo Yono Baibol na vọ Yen Avwanre Vwọphia?

 Baibol na vwẹ ejajẹ rẹ idin. Baibol ri New World Translation of the Holy Scriptures vwẹ American Sign Language yen Baibol rẹsosuọ vwẹ ejajẹ rẹ idin vwẹ akpọ na eje. Ọsoso ri New World Translation yẹrẹ ẹbẹre ọvo rọyen herọ enẹna vwẹ ejajẹ rẹ idin buebun, ọtiọyen ji te ejajẹ efa buebun re phiẹ vwọba kukpe kukpe. (Wọ sa vwọ mrẹ ejajẹ buebun tiọyena yẹrẹ nughe ri Baibol na vwẹ intanẹti, kpo ekpeti na “ Baibol ri New World Translation Vwẹ Ejajẹ rẹ Idin.”)

•   Nughe rẹ ividio na The Complete New World Translation Is Available in ASL wọ mrẹ owian re ruru a ke sa vwẹ Baibol rẹ idin vwọphia.

•   Wọ sa vwọ riavwerhen rẹ isese ri Baibol wẹn, danlodu rẹ aplikeshọni ri JW Library Sign Language. Aplikeshọni nana nẹrhẹ a sa sanẹ awọreta ri Baibol evo rehẹ Baibol rẹ idin na.

•   Dmytro vẹ Vita re dia aye gbe ọshare idierhọ, jẹ emọ rayen dia idierhọ-ọ. Mrẹ oborẹ ughe ri Baibol vwẹ ejajẹ rẹ idin rẹ orua na nẹ kẹdi kẹdẹ vwo fierere kẹ ayen.

 Ividio re vwo yono Baibol na. Iseri ri Jihova vwo ividio sansan vwẹ ejajẹ rẹ idin re vwẹ ukẹcha kẹ ihwo vwo vwo ẹruọ rẹ uchebro ri Baibol na je reyọ vwo ruiruo, uchebro nana herọ vwọ kẹ . . .

•   Orua vẹ ihwo re rọvwọnre

•   Ighene

•   Emọ

 Uyono ri Baibol vẹ oyono romobọ. Vwẹ ejajẹ rẹ idin vwo yono Baibol na vwẹ ọke ro shephiyọ kẹ wẹ, womarẹ ukẹcha rẹ oyono romobọ. Nokpẹn rẹ obo re ruẹ uyono ri Baibol rẹ ọphẹ nana wan.

 Jeson Senajonon dia Philippines. Mrẹ oborẹ Baibol na vwọ vwẹ ukẹcha kẹ ọshare nana vwo sikẹrẹ Ọghẹnẹ.

 Mario Antúnez ọyen ipastọ vwẹ Honduras. Mrẹ oborẹ ọ vwọ mrẹ ẹkpahọnphiyọ rẹ enọ ri Baibol ro vwori vwẹ ikuegbe rọyen na “Enọ mi Vwori Bun Vrẹ Ẹkpahenphiyọ ra Vwọ kẹ Vwẹ.”

 Emẹvwa vẹ irueru sansan. Avwanre vwo ikoko vẹ ẹko sansan vwẹ ejajẹ rẹ idin vwẹ akpọ na eje, kudughwrẹn kudughwrẹn yen idin vwọ vwoma kuẹgbe rere ayen vwo yono je vwẹ ẹga kẹ Ọghẹnẹ. Avwanre ji vwo ọrhuẹrẹphiyotọ rẹ isikoko ride re de yono Baibol na vwẹ ejajẹ rẹ idin kukpe kukpe. Vwẹ emẹvwa rẹ avwanre vẹ isikoko ride tiọyena, avwanre ji vwo ọrhuẹrẹphiyotọ ri tanu meta vwọ kẹ ihwo ri rhuẹro ji dierhọ, womarẹ e vwo djobọte obọ rayen siẹrẹ a da jẹ ephẹrẹ rẹ idin na [tactile signing]. Avwanre ji vwo ẹbe vwẹ ejajẹ rẹ idin ra hwa osa phiyọ-ọ.

•   Guọnọ ukoko rọ kẹrẹ owẹ.

•   Yono kpahen eghwẹkoko vẹ isikoko rẹ avwanre re ruẹ kukpe kukpe.

•   Vwobọ vwẹ Ẹkarophiyọ rẹ ughwu ri Jesu, rọ dia irueru rọ ma ghanre kẹ avwanre.

 José Luis Ayala dia Mexico. E vwiẹrẹ kerẹ odierhọ, o de ji rhi rhuẹro. Mrẹ obo ra vwọ vwẹ ukẹcha kẹ vwọ dia omamọ rẹ oyono ri Baibol na.