Ọmọke krẹn tavwen ẹgborho rẹ Izrẹl ke ro otọ rẹ ive na omarẹ ikpe ujorin 35 re wanre, Ọghẹnẹ da tanẹ ọ cha sẹro rayen vwọ vrabọ rẹ “Emiavwe omiomiovwi” rẹ ihwo rioja rọyen vwẹ otọ rẹ Ijipt. (Urhi Rivẹ 7:15) O ru ọnana womarẹ irhi rọ vwọ kẹ ayen kpahen oborẹ ayen sa vwọ fon oma je kẹnoma kẹ ega. Kerẹ udje:

•   Ọvo usun rẹ irhi ra vwọ kẹ ẹgborho rẹ Izrẹl tare nẹ ayen fọnrhọn emwa rayen je họ oma fon.—Livitikọs 15:4-27.

•   Vwọ kpahen isọn, Ọghẹnẹ da ta: “Wo mi vwo asan vwẹ obotafe rẹ erhọn na ru wọ vwẹriẹ; wọ me ghwa ubiurhe nene ekuakua wẹn; wo de tidia vwẹ uphephe re, wo me vwẹ ubiurhe na tọn unu ọvo, wo mi bekpẹn rhurhu isọn wẹn na.”—Urhi Rivẹ 23:12, 13.

•   Ihwo ri vwo ọga ri pho kpo asan ọfa ra dia, rere ọga na vwo jẹ ihwo efa emuo. Tavwen ayen ki rhivwin rhe, ihwo rẹ oma rayen kpo nure me fọnrhọn emwa rayen je họ vwevunrẹ ame tavwen a ke sa tanẹ oma rayen “kpo” nure.—Livitikọs 14:8, 9.

•   Kohwo kohwo rọ vwẹ obọ te eranvwe yẹrẹ ohwo ro ghwuru ko vrẹn nẹ asan rẹ ihwo dia.—Livitikọs 5:2, 3; Ukeri 19:16.

 Irhi ra vwọ kẹ ihwo rẹ Izrẹl shephiyọ vẹ omaesivwon kugbe ẹfuọn rẹ ihwo rhe riẹn kpahen enẹna re.

 Vwẹ asan efa, ihwo vwẹ ẹro okueku vwo nẹ omaẹfuọn. Kerẹ udje:

•   Ihwo don inuhu vwẹ irhuvwun. Ame ro gberi, emu ro si tutu, kugbe erọnvwọn igbegbe efa toroba ega re buẹnphiyọ, e je so ughwu kẹ emọ buebun.

•   Idọktọ rẹ ọke awanre ghwa riẹn obo ri so ega buebu-un. Ihwo rẹ Ijipt vwẹ erọnvwọn kerẹ ọbara rẹ oghoghori, isọn rẹ ephran, eranwevwin ri ghwure, ephẹ, kugbe ibrẹdi ri si tutu vwo “sivwin” ihwo. Ayen je reyọ isọn rẹ ihworakpo vẹ eranvwe vwo sivwin ihwo.

•   Ihwo rẹ ijipt rẹ ọke awanre họnvwọ ọga mamọ fikirẹ ame ogbegbe rehẹ urhie ri Nile, vẹ egọdọ rẹ ayen tọn riariẹ phiyọ. Eriyin evun-etue vẹ erharhe emu ji hwe emọ buebun.

 Ẹkẹvuọvo, ihwo rẹ Izrẹl vwo oma kpokpọ kidie ayen yeren akpọ vwo nene Urhi Ọghẹnẹ.