Ihwo buebun vwẹ akpọ na yen oghwe rọ so oghwọrọ djobọte re. Vwo oniso rẹ iyẹnrẹn nana:

•   “Vwẹ ẹdẹ ibro re wanre na, otorere ri China da niyẹnrẹn osio rọ ma gan kparobọ vwẹ ẹkuotọ rayen, rọ vrẹ osio ọgangan rọ rhọre rhanvwe ikpe ri dino te 140 re wanre na. Vwẹ Saturday vẹ Wednesday, osio ro te . . . 744.8 millimeters (29.3 inches) yen rhọre.”​—AP News, August 2, 2023.

•   “Thursday yen ẹdẹ rivẹ ri Typhoon Khanun vwọ ghwa osio vẹ odju ọgangan ro southern Japan, ọnana da so ughwu kẹ omarẹ ihwo ivẹ. . . . E rhẹro rọyen nẹ osio rọ cha rhọ che te 0.6 meters (ichiyin 2) vwẹ igbenu ri central Taiwan.”​—Deutsche Welle, August 3, 2023.

•   “Obo re suẹ oghwe ro kuru vwẹ oba rẹ udughwrẹn na, [vwẹ Nova Scotia] yen osio rọ ma gan kparobọ rọ rhọre vwẹ ekogho ri Atlantic Canada, rọ vrẹ osio ọgangan rọ rhọre rhanvwe ikpe 50 re wanre na.”​—BBC News, July 24, 2023.

 Die yen Baibol na ta kpahen obo re phia na?

 Baibol na djerephia nẹ avwanre yerẹn vwẹ “ẹdẹ re koba na.” (2 Timoti 3:1) Jesu mraro rọyen nẹ avwanre cha mrẹ “obo ri muoshọ,” yẹrẹ erọnvwọn re ghwa oshọ ro ohwo oma vwẹ ọke avwanre na. (Luk 21:11) Aruọke ro wene yen emu rẹsosuọ rọ so aruọke ri muoshọ, rọ dia obo re vwomaphia vrẹ obo ri jovwo, jẹ a riẹn ọke rọ cha vwọphia-a.

 Baibol na vuẹ avwanre nẹ obo re phia re ghwa oshọ ro ihwo oma nonẹna kẹ avwanre iphiẹrophiyọ. Diesorọ? Jesu da ta: “Ọke rẹ ovwan da mrẹ erọnvwọn nana re phia, ovwan gba riẹn nẹ Uvie rẹ Ọghẹnẹ na sikẹre re.”​—Luk 21:31; Matiu 24:3.

 Oborẹ avwanre mrẹ re phia nonẹna djerephia nẹ Uvie rẹ Ọghẹnẹ che sun akpọ na kẹrẹkpẹ. Vwẹ otọ rẹ usuon rọyen na, aruọke ri wene ro ji churobọ si okinriariẹ rẹ ame gbe cha so oghwọrọ ọfa-a.​—Job 36:​27, 28; Une rẹ Ejiro 107:29.

 Wo vwo yono kpobarophiyọ kpahen oborẹ Uvie rẹ Ọghẹnẹ cha vwọ rhuẹrẹ akpọ na, ni uyovwinrota na, “Who Will Save the Earth?”