“O rhe che kri-i, akpọ na che hirharoku oghwọrọ rode. Irere ride che shu ro ame. Oheri ọgangan ra je mrẹ dẹvo-o. Ogiribo ro muoshọ che bunphiyọ. Ame cha kanre vwẹ akpọeje. Eka rẹ eranvwe vẹ ekankọn sansan buebun che ghwu nẹ akpọ na. Ena dia ikuegbe rẹ esia yẹrẹ eta re bruba-a. Ọna yen oborẹ egberianriẹn vuẹ avwanre nẹ e cha phia fikirẹ oborẹ ihworakpọ reyọ evwri re se nẹ otọ na cha vwo ruiruo wan nonẹna.”​—António Guterres rọ dia secretary-general rẹ United Nations yen ta ota nana ọke rọ vwọ ta ota kpahen iyẹnrẹn rẹ Intergovernmental Panel on Climate Change vwọphia vwẹ April 4, 2022.

 “Egberianriẹn vwẹ orhọesio phia nẹ vwẹ ikpe re cha vwẹ obaro na, oghwọrọ rẹ ewene rẹ aruọke ghwa cha cha phia vwẹ asan sansan kerẹ egbo, igbenu vẹ asan efa tiọyen rẹ ihworakpọ rhuẹrẹphiyọ yoyovwin vwọ kẹ omaeronvwon re joma te 423 [vwẹ United States]. Enana asan rẹ oheri da gan mamọ. Erọnvwọn ebrabra re sa phia na ghwa họhọ erọnvwọn re sua oghwọrọ re se mrẹ vwẹ Baibol na: erhanre vẹ oghwe, ame ro djeri re ghran, ame rẹ abadi ro buẹnphiyọ vẹ oheri ọgangan.”​—“Oborẹ Oghwe ro Kuru Soro Vwẹ Yellowstone, rọ Dia Oka rẹ Okpetu rọ Cha Vwẹ Obaro,” The New York Times, June 15, 2022.

 E se si ebẹnbẹn rẹ aruọke ro wene ghwa cha nẹ otọrakpọ na? Ọ da dia ọtiọyen, ono yen se ruo? Roro kpahen oborẹ Baibol na tare.

 Baibol na tare nẹ Ọghẹnẹ cha “ghwọrọ” ihwo re ghwọrọ akpọ na. (Ẹvwọphia 11:18) Etinẹ ri Baibol na yono avwanre erọnvwọn erha:

1.  1. Irueru rẹ ihworakpọ cha so umiovwon kẹ otọrakpọ na.

2.  2. Ẹghwọrọ rẹ otọrakpọ na che vwoba.

3.  3. Ọghẹnẹ yen che phioba phiyọ ebẹnbẹn rẹ aruọke ro wene ghwa cha, ọ dia ihworakpọ-ọ.

 Baibol na tare nẹ “akpọ na herọ bẹdẹ.” (Aghwoghwo 1:4) O vwo ọke rẹ ihworakpọ cha vwọ kanrọ-ọ.

•   “Ọvwata cha re ughwẹ rẹ otọ na, kọ dia enu rọye bẹdẹ.”​—Une Rẹ Ejiro 37:29.

 A cha rhuẹrẹ oborẹ ihworakpọ miovwirin vwẹ akpọ na kakare.

•   “Aghwa na kugbe otọ ọyaya na ke cha ghọghọ, aton na cha ghọghọ ro de di ẹbe gbidigbidi; kerẹ igbodigbo.”​—Aizaya 35:1.