Vwẹ akpọneje, ihwo chirakon rẹ aruọke ro rhorha phiyọ vẹ oghwọrọ efa rọ soro. Vwo oniso rẹ iyẹnrẹn evo:

•   “Emeranvwe ri June yen ma rhorho kparobọ usun rẹ iyẹnrẹn rẹ ihwo nẹ phiyotọ vwọ kpahen aruọke re rhorha vwẹ akpọneje rhanvwe ikpe 174 re wanre na.”​—National Oceanic and Atmospheric Administration, U.S. Department of Commerce, July 13, 2023.

•   “Italy, Spain, France, Germany kugbe Poland hirharokuẹ aruọke rọ rhorha mamọ, e ji rhẹro rọyen nẹ o che kpenu te 48°C [118°F] vwẹ ekogho ame riariẹ phiyọ vwẹ Sicily vẹ Sardinia. Enana sa dia aruọke re ma rhorho kparobọ ra niyẹnrẹn rọyen vwẹ ẹkuotọ ri Europe.”​—European Space Agency, July 13, 2023.

•   “Akpọ na vwọ rhorha na, e se rhẹro rọyen nẹ ọkieje yen osio cha vwọ rhọ, ọ je cha rhọ gan tẹdia ọ da so oghwe.”​—Stefan Uhlenbrook ro yono kpahen ame vwẹ World Meteorological Organization, July 17, 2023.

 Iyẹnrẹn rẹ aruọke ri muoshọ ri kpenu phiyọ na kpokpo uwe ẹwẹn? Roro kpahen obo ri Baibol na ta kpahen ota ọghanghanre nana.

 E. Aruọke rọ rhorha vẹ efa re so oghwọrọ, ghwa orugba aroẹmrẹ ri Baibol vwẹ ọke avwanre na. Kerẹ udje, Jesu tarọ phiyotọ nẹ e che rhiẹromrẹ “obo ri muoshọ,” yẹrẹ “erọnvwọn ra je mrẹ dẹvo-o, re ghwa oshọ phiyọ ihwo oma.” (Luk 21:11; Good News Translation) Aruọke ro miovwẹnphiyọ na nẹrhẹ oshọ mu ihwo buebun nẹ ihworakpọ che miovwon akpọ na tẹdia a gbe sa dia ọfa-a.

 Ẹjo. Ọghẹnẹ ma akpọ na rere a vwọ dia bẹdi bẹdẹ; ọ cha vwẹ uphẹn kẹ ihworakpọ nẹ i miovwon vrẹ obo ra sa dia-a. (Une rẹ Ejiro 115:16; Aghwoghwo 1:4) Vwọrẹ uyota, o veri nẹ ọ cha “ghwọrọ ihwo re ghwọrọ akpọ na.”​—Ẹvwọphia 11:18.

 Baibol na djerephia nẹ Ọghẹnẹ cha sẹro rẹ akpọ na vrabọ rẹ oghwọrọ.

•   “[Ọghẹnẹ] ru ogiribo fọ, ọsẹghe rẹ abadi de rhurhu unu.” (Une rẹ Ejiro 107:29) Ọghẹnẹ vwo ẹgba ro vwo sun aruọke na. O vwo ẹgba ro vwo si ebẹnbẹn rẹ aruọke ri muoshọ soro vwo no.

•   “Wẹ ri nẹ akpọ na wọ me vwẹ ame ruọrhuọ, wẹ re nẹrhẹ oyovwi emu gangan.” (Une rẹ Ejiro 65:9) Vẹ ebruphiyọ ri Jihova, akpọ na cha rhe dia iparadaisi.

 Wo vwo yono kpobarophiyọ kpahen ive ri Baibol ri shekpahen obo ra sa vwọ rhuẹrẹ akpọ na, ni uyovwinrota na, “Who Will Save the Earth?”