Vwo nene iyẹnrẹn ri United Nations vwọphia:

•   Vwo nẹ October 7 ri te October 23, 2023, ofovwin re phiri vwẹ Gaza-Israel hwe ihwo re vrẹ 6,400, ofovwin na da je so omaẹwan vwọ kẹ ihwo rẹ vrẹ 15,200, buebun rayen ihwo ghevweghe. Vwọba, ihwo uriorin ujorin buebun vrẹn nu uwevwin rẹ obọ rayen.

•   Vwẹ September 24, 2023, ofovwin rọhẹ uvwre ri Russia vẹ Ukraine hwe ihwo ghevweghe ri te 9,701, ọ da rha so omaẹwan vwọ kẹ ihwo ri te 17,748 vwẹ Ukraine.

 Iphiẹrophiyọ vọ yen Baibol na vwọ kẹ ihwo re rioja fikirẹ ofovwin?

 Baibol na mraro rọyen nẹ Ọghẹnẹ cha “nẹrhẹ ofovwi fue re te oba rẹ akpọ na.” (Une rẹ Ejiro 46:9) Ọ cha reyọ usuon yẹrẹ uvie rẹ odjuvwu vwo wene usuon rẹ ihworakpọ eje. (Daniẹl 2:44) Uvie rẹ Ọghẹnẹ cha nẹrhẹ ẹwẹn rẹ ihworakpọ te otọ.

 Vwo oniso oborẹ Jesu Kristi rọ dia Ovie rẹ Uvie rẹ Ọghẹnẹ che ru:

•   “O sivwi ọ rẹ akpọ bẹn vwẹ ọke ro de kperi se, ovwiogbere kugbe ohwo ro vwo ọchuko-o. Ọ re ehrọre rẹ ọvwiẹrẹ vẹ ọ rẹ akpọ bẹn, o mi sivwi arhọ rẹ ọ rẹ akpọ bẹn. Nẹ oshenyẹ vẹ ogbarogba ọ tan arhọ rayen nurhe.”​—Une rẹ Ejiro 72:​12-14.

 Ọghẹnẹ cha womarẹ Uvie rọyen vwo si ojaẹriọ ejobi vẹ erọnvwọn efa rẹ ofovwin vẹ ozighi-egbe soro vwo no.

•   “Ko che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”​—Ẹvwọphia 21:4.

 O rhe che kri-i, Uvie rẹ Ọghẹnẹ ko che ru ewene vwẹ otorakpọ na. Baibol na mraro rẹ “ofovwi kugbe edo rẹ ofovwi” rẹ avwanre mrẹ re phia nonẹna. (Matiu 24:6) Enana vẹ efa re phia rẹ avwanre mrẹ na djephia nẹ avwanre yerẹn vwẹ “ẹdẹ re koba” vwẹ usuon rẹ ihworakpọ.​—2 Timoti 3:1.