Kirobo ri Baibol na tare, Ovie rẹ Izrẹl re se Devid diarọ vwẹ ẹgbukpe ujorin uhwọvo a ke rhe mrẹ ọke ri Kristi, uvwiẹ rọyen sunrun vwẹ ikpe ujorin buebun vwẹ Izrẹl. Ihwo evo phrọ aphrọ nẹ ikuegbe ri Devid ghwa hẹ ikuegbe rẹ osia ghevweghe rọ dia uyota-a, re mu nẹ asan ọvo rhe. Ovie re se Devid ghini ohwo ro yererin dẹvure?

 Vwẹ 1993, ọgba erianriẹn ro gbugbo rẹ ekuakua rẹ awanre re se Avraham Biran kugbe usun rọyen da mrẹ ẹbẹre rẹ ikuta vwẹ Tel Dan, vwẹ obọrhen ọnre rẹ ẹkuotọ rẹ Izrẹl ro vwo isiesi rọ rionbọ phiyọ “Uwevwin ri Devid.” Ibieta rẹ ephẹrẹ ra riẹn phiyẹ Semitic ọyen e vwo si phiyọ ẹbẹre rẹ ikuta na, rọ herọ re rhavwẹn ẹgbukpe ujorin irhirin a ke rhe mrẹ ọke ri Kristi. Ọyen ọvo usun rẹ isiesi ihwo rẹ Aram siri vwọ yoma kpahen ihwo rẹ Izrẹl rẹ ayen phi kparobọ.

 Iyẹnrẹn ọvo rọhẹ Bible History Daily tare nẹ: “Ihwo evo vwo imuẹro kpahen ukuta re si ‘uwevwin ri Devid’ phiyọ na-a . . . Ẹkẹvuọvo, buebun rẹ ihwo ri yono kpahen Baibol na kodo kugbe egba erianriẹn ri gbugbo ekuakua rẹ awanre vwo imuẹro nẹ obo re si phiyẹ ẹbẹre rẹ ukuta ra mrẹre vwẹ Tel Dan stela na dje ikuegbe rẹ Ovie re se Dẹvid rọhẹ Baibol na phiyọ uyota. Ọnana ọvo vwẹ usun rẹ ikuegbe re ma ghanre ra hiẹ mrẹ je nẹ iyẹnrẹn rọyen vwẹ BAR [Biblical Archaeology Review].”