Vwẹ obọrẹsosuọ, iniọvo rẹ akpọeje che ni ọrhuẹrẹphiyotọ rẹ ọghwẹkoko ri 2020 na ọke vuọvo vwẹ July vẹ August 2020. Re se vwo ru ọnana, ko fori nẹ a fan eta vẹ ividio rẹ ọghwẹkoko na kpo ephẹrẹ re vrẹ 500. Vwẹ ọke buebun na, ọ sa reyọ ẹgbukpe ọvo yẹrẹ tobọ vrẹ otiọyen e ki se muegbe rẹ owian tiọyen ji ruo re. Ẹkẹvuọvo, fikirẹ ukọn rẹ ọga rẹ coronavirus na, ihwo rẹ fan eta vẹ ividio rẹ ọghwẹkoko ri 2020 rẹ Ghọghọ Ọkieje na, rha tobọ vwo tẹ emeranvwe iyori rẹ ayen vwo ruiruo na re-e.

 Umẹ Rọvwẹrote Iruo rẹ Efanfan vẹ Akon Iruo rọ Dẹ Erọnvwọn kẹ Ukoko na Vwẹ Akpọeje Rọhẹ Esiri Ukoko da vwẹ ukẹcha phia vwẹ iruo rode nana. Umẹ Rọvwẹrote Iruo rẹ Efanfan da rhe mrẹvughe nẹ efeta na buebun cha guọnọ ekuakua re vwo ruiruo efa, marho kẹ omamọ imakrifonu rẹ ayen se vwo ruiruo na. Akon Iruo rọ Dẹ Erọnvwọn kẹ Ukoko na de ru ọrhuẹrẹphiyotọ ra vwọ dẹ imakrifonu 1,000 ji mu ayen kpo ekogho ri joma te 200.

 A dẹ imakrifonu na eje ẹsiẹvo rere a sa vwọ sẹro igho, a da ka ghwẹ ayen eje phiyọ asan ọvo tavwen, a ke rhe ghwẹ ayen vwo rhe efeta sansan re guọnerọ. Kidie nẹ a dẹ ayen ẹsiẹvo, igho ra vwọ dẹ kugbe efan rayen de rhi kpotọ. A da ghare igho na utute, imakrifonu ọvuọvo kọ cha dia idọla $170 U.S.

 Akon Iruo rọ Dẹ Erọnvwọn kẹ Ukoko na ru ọrhuẹrẹphiyotọ rẹ ẹdẹ rẹ ekuakua nana vwẹ uvwre rẹ April fiẹ May 2020, ọnana ọke rẹ ekiẹchuọ vwo doghobọ fikirẹ ọga rẹ coronavirus na. Ẹkẹvuọvo, besiẹ rẹ May ki rhi vwoba jẹ ekuakua na te obọ rẹ efeta na vwẹ iwevwin re de ruiruo rẹ efanfan, eghọn ukoko kugbe asan efa re.

 “Jay Swinney rọ dia oniruo rẹ Akon Iruo rọ Dẹ Erọnvwọn kẹ Ukoko na da ta: “Orukugbe nabọ herọ vwẹ uvwre rẹ ihwo re shẹ ekuakua na kugbe akon iruo sansan vwẹ Bẹtẹl. Ẹwẹn ọfuanfon ri Jihova yen cha avwanre uko a sa vwọ mrẹ ekuakua nana dẹ phẹrephẹre je vwẹ unu igho ro kpotọ, e rhe muẹ igho ukoko na ghwọrọ-ọ.”

 Nicholas Ahladis rọ wian vwẹ Umẹ Rọvwẹrote Iruo rẹ Efanfan da ta: “Oma vwerhen efeta ra kanre ẹchẹ gbe fikirẹ coronavirus na mamọ ọke rẹ ekuakua na vwo te ayen obọ. Dede nẹ ayen sa vwẹ oma ba ẹko rẹ efeta rẹ ayen nene wia-an, jẹ ayen je nabọ wiankugbe a sa vwọ fan ji rekọdu rẹ eta, eha rudje kugbe ine vwẹ ephẹrẹ re vrẹ 500.”

 Ọnana ọvo usunrẹ ewian ra wianre, iniọvo rẹ avwanre vwẹ akpọeje sa vwọ riavwerhen rẹ ọghwẹkoko ri 2020 rẹ Ghọghọ Ọkieje na. Utoro ri ghwologhwolo wẹn ru wo ruẹ vwẹ donate.pr418.com kugbe idjerhe efa yen a sa vwọ dẹ ekuakua nana.