Ukoko rẹ Iseri ri Jihova ri nonẹna tonphiyọ vwẹ oba rẹ ẹgbukpe ujorin rẹ 19. Vwẹvunrẹ ọke yena, ẹmẹko rihwo ri yono Baibol na, re dia kẹrẹ Pittsburgh, Pennsylvania vwẹ United States, da tuẹn uvi rẹ ọrhuẹrẹphiyotọ rẹ ayen vwo yono Baibol na phiyọ. Ayen reyẹ iyono rẹ ishọshi na vwọ vwanvwẹn obo ri Baibol na ghine yono. Kẹ ayen si obo rẹ ayen yono na phiyẹ ẹbe, ẹbe re ghwa iyẹren, kugbe ọbe ọkiọke re se The Watchtower—Announcing Jehovah’s Kingdom asaọkiephana.

 Ọvo usun rẹ ihwo rehẹ ẹko yena rọ fuevun yono Baibol na, ọyen ọshare ọvo re se Charles Taze Russell. Dede vwo nẹ Russell yẹn ọkobaro rẹ iruo ruyono ri Baibol na vwẹ ọke yena kugbe ọyen ohwo rẹsosuọ rọ vwẹrote etenyọnphia rẹ The Watchtower na, jẹ ọdiẹ kọ reyẹ ẹga ọkpokpọ vwo mu-u. Ọdavwẹ ri Russell vẹ ihwo ri yono Baibol na efa, kirobo re se ẹko na ọke yena, ọyen rẹ ayen vwo titẹ iyono ri Jesu Kristi kugbe ayen vwo nene iruo rẹ ukoko rẹ Inene ri Kristi rẹ ẹgbukpe ujorin-rẹsosuọ. Ọ vwọ dianẹ Jesu vwẹ ẹga rẹ Inene –ri –kristi vwo mu na, avwanre ki niro nẹ ọyẹn vwẹ ukoko ravwanre na vwo mu.—Kọlose 1:18-20.