Kerẹ Iseri ri Jihova, avwanre davwẹngba vwọ bọn erua rẹ avwanre kugbe irivẹ rẹ avwanre gan. Avwanre muọghọ kẹ Ọghẹnẹ kerẹ Ohwo rọ ton ọrhuẹrẹphiyotọ rẹ orua phiyọ. (Jẹnẹsis 2:21-24; Ẹfesọs 3:14, 15) Vwevunrẹ Baibol na, Ọghẹnẹ yono ihwo uchebro re chọn ayen uko vwo vwo orọnvwe rọ ganre rọ je vọn vẹ omavwerhovwẹn re.

 Avwanre davwẹngba vwo ruẹ nene uchebro ri Baibol na, kidie ọnana nẹrhẹ avwanre dia omamọ rẹ eshare, eya kugbe emiọvwọn. (Isẹ 31:10-31; Ẹfesọs 5:22–6:4; 1 Timoti 5:8) Aghwanre rehẹ Baibol na tobọ chọn erua ri kpo ẹga sansan uko ayen se vwo phiẹkparobọ. (1 Pita 3:1, 2) Roro kpahen eta nana rẹ ihwo re dia Iseri ri Jihova-a rẹ irivẹ rẹ orọnvwe rayen dia Iseri ri Jihova tare:

•   “Ikpe esan rẹsosuọ rẹ avwanre ghwọrọ kugbe vọnre vẹ ẹghwọ kugbe ofudjevwe. Ọke rẹ Ivete rhe vwọ dia Oseri ri Jihova re, ẹguọnọ vẹ edirin rọyen da rhe ganphiyọ. Ewene ro ruru sivwin orọnvwe rẹ avwanre.”—Clauir, ro nẹ Brazil rhe.

•   “Me vwọso ọshare mẹ, Chansa, ọke rọ vwọ tọn uyono ri Baibol phiyọ vẹ Iseri ri Jihova, kidie mi rorori nẹ ayen hra erua. Rhanvwe ọke yena rhe, me da rhe mrẹ nẹ Baibol na ghene chọn orọnvwe rẹ avwanre uko.”—Agness, ro nẹ Zambia rhe.

 Vwẹ iruo rẹ aghwoghwo na, avwanre dje kẹ irivẹ rẹ avwanre oborẹ aghwanre rehẹ Baibol na sa vwọ chọn ayen uko

•   Vwọ vwẹ aghwanre vwọ sane omamọ rẹ ọrivẹ rẹ orọnvwe

•   Vwo phikparobọ vwẹ ukpe rẹsosuọ a da rọvwọn nu

•   Vwo yerin vẹ egọ rayen

•   Vwọ nabọ riẹn obo ra ghwọrọ igho wan

•   Vwọ kẹnoma kẹ aphro

•   Vwo yono obo re vwo ghovwo ohwohwo

•   Vwo yono emọ

 Vwọrẹ uyota, ọkiọvo ọ suọ ẹghwọ. Kerẹ udje, vwẹ 1998 iyẹnrẹn rẹ ikọpini ọvo ro ruẹ ehiahiẹ re se Sofres djephia nẹ 1 usun rẹ erọnvwe 20 vwẹ ọke yena vwo ebẹnbẹn buebun vwẹ ọke rẹsosuọ rẹ ohwo ọvo vwẹ orọnvwe na de kurhẹrie re dia Oseri.

 Jesu tarọ phiyotọ nẹ ihwo ri nene iyono rọyen che hirharoku eghrẹn vwẹ evunrẹ orua rayen ọkievo. (Matiu 10:32-36) Ogbikuegbe re se Will Durant jokaphiyọ nẹ vwẹ otọ rẹ usuon ri Rom, “A tare nẹ Inenikristi hra orua,” a ẹro tiọyen yen ihwo ji vwo nẹ Iseri ri Jihova nonẹna. Ọnana ko mudiaphiyọ nẹ Iseri na yen ghene so ohra na?

 Ọke rẹ aguare na vwọ ta ota kpahen Iseri ri Jihova nẹ ayen hra erua, European Court of Human Rights da tanẹ ihwo re dia Iseri ri Jihova-a yen sua ẹghwọ womarẹ ayen vwọ reyọ vwọso “ugbomọphẹ rẹ ẹga rẹ ihwo rẹ orua rayen, ọtiọyena ayen rha rhọnvwa nẹ ayen vwobọ vwẹ irueru rẹ ẹga raye-en.” Aguare na da je ta: “Ọnana ghwa obo ra mrẹ vwẹ orọnvwe rẹ ihwo ivẹ ri kpo ẹga sansan, jẹ Iseri ri Jihova fẹnẹre-e.” b Ọke rẹ ayen de hirharoku ẹvwọsuọ fikirẹ ẹga rayen dede, Iseri ri Jihova davwẹngba vwọ yan nene uchebro ri Baibol nana: “Wọ vwẹ umwemwu hwa osa rẹ umwemwu-u, . . . Udu wẹn da gba, wọ vẹ ohwo ọvuọvo ghwọ-ọ.”—Rom 12:17, 18.

 Iseri na nene uchebro ri Baibol na ra vwọ rọvwọn vwevunrẹ “odẹ rẹ Ọrovwohwo,” kọyen a vwọ rọvwọn ohwo ra vẹ ọyen gbe vwo esegbuyota vuọvo. (1 Kọrẹnt 7:39) Baibol yen urhi nana nurhe, o ji vwo erere re rhiẹromrẹ dede. Kerẹ udje, vwẹ uyovwinrota ọvo rọ vwomaphia vwẹ Journal of Marriage and Family ri 2010 tare nẹ, “eya gbe eshare ri kpo ẹga vuọvo, ri ji vwo ẹkuruemu vẹ esegbuyota vuọvo” yen vwo omamọ rẹ oyerinkugbe. c

 Ẹkẹvuọvo, Iseri na jiro kẹ ihwo rehẹ ẹga rayen na nẹ ayen fan orọnvwe rayen kidie nẹ ọrivẹ rayen dia Oseri-i. Baibol na tare nẹ, “Oniọvo koniọvo ro vwo aye ro segbuyota-a, rẹ aye na da rhọvwe nẹ ọye rọvwọ, e jẹn ọshare na siobọ no-o. Ọ da dianẹ aye kaye vwo ọshare ro segbuyota-a, rẹ ọshare na da rhọvwe nẹ ọye rọvwọ, e jẹn aye na siobọ no-o.” (1 Kọrẹnt 7:12, 13) Iseri ri Jihova yan nene urhi nana.