Ẹjo. Iseri ri Jihova vwọso ẹreyọ rọye-en. Avwanre niro nẹ a vwọ reyọ ivasini ọyen orhiẹn rẹ ohwo ọvuọvo che bru komobọ. Buebun rẹ Iseri ri Jihova brorhiẹn rẹ ayen vwọ reyọ ivasini.

 Avwanre guọnọ omaesivwo rọ nabọ shephiyọ, avwanre je vwẹ ẹro ọghanghanre vwo ni ẹyan obaro rẹ ona rẹ omaesivwo buebun vwọ kpahen obo re se vwo si imuoshọ rẹ ega ride kpotọ. Owian ọgangan rẹ ihwo re tẹn ona rẹ omaesivwo wian na je da avwanre aro, marho kẹ ọke rẹ ebẹnbẹn.

 Iseri ri Jihova nene odjekẹ rẹ ihwo ri sivwin oma vwọphia. Kerẹ udje, rhanvwe ọke rẹ ọga ri COVID-19 na, Iseri ri Jihova teyen iyovwinreta sansan phia vwẹ iwẹbsaiti nana vwẹ ejajẹ ujori buebun, rẹ ayen vwo jiro kẹ ihwo nẹ ayen nene odjekẹ ra vwọphia vwẹ ekogho ọvuọvo vwọ kpahen oborẹ ayen sa vwọ kẹnoma. Ọnana churobọ si ọghanrovwẹ re vwo tephe kẹ ihwo, re vwo nene odjekẹ ro shekpahen omaesiokoko, e vwo phi ohwo ro vwo ọga na phiyọ asan obọ rọyen, ra vwọ hworhẹ abọ, re vwo ku nose mask phiyọ, vẹ odjekẹ efa rẹ ihwo ri suẹn tare nẹ e nene.​—Rom 13:​1, 2.

 Vwẹ ikpe buebun rhire na, ẹbe rẹ Iseri ri Jihova teyanphia kanrunumuẹ odjekẹ nana:

•   E vwo brorhiẹn rẹ omaesivwo ọyen orhiẹn romobọ.​—Galesha 6:5.

   “[Imagazini nana] jiro kẹ ihwo nẹ oghẹre rẹ uhuvwun ọvo yovwin nọ ọfa-a, ọ je vwẹ uchebro phia kpahen omaesivwo-o. Ẹkẹvuọvo ọ reyọ ẹkpo eghanghanre evo vwọphia, ọ je vwẹ uphẹn kẹ ohwo ro sere vwo brorhiẹn romobọ.”​—Awake!, February 8, 1987.

   “Wẹ ọvo yen che brorhiẹn sẹ wẹ vẹ emọ wẹn cha reyọ ivasini.”​—Awake!, August 22, 1965.

•   Avwanre vwẹ ẹro ọghanghanre vwo nẹ omaesivwo kidie arhọ ghanre kẹ avwanre.​—Iruo rẹ Iyinkọn Na 17:28.

   “Iseri ri Jihova ri vwo ebẹnbẹn rẹ omakpokpọ bru ihwo re tẹn ona rẹ omaesivwo ra vwọ kẹ ukẹcha. Ayen guọnọ yerin, ọtiọyena, kẹ ayen davwẹngba rayen eje vwo ruẹ kemu kemu rọ vwọso oborẹ Baibol na tare-e, rere ayen sa vwọ sẹro rẹ arhọ rayen.”​—Uwevwin Orhẹrẹ ri July 1, 1975.

   “Iseri ri Jihova rhiabọreyọ omaesivwo je reyọ ihuvwun. Ayen guọnọ sẹro rẹ omakpokpọ vẹ arhọ rayen. Vwọrẹ uyota, Iseri ri Jihova evo idọktọ kirobo rẹ Luk rọ dia ọvo usun rẹ Inenikristi rẹ ẹgbukpe ujorin rẹsosuọ hepha. . . . O muẹro dẹn nẹ Iseri ri Jihova vwẹ ẹro ọghanghanre vwo nẹ owian ọgangan rẹ ihwo re vwẹ ukẹcha phia vwo sivwi ihwo wian. Oma je vwerhan ayen siẹrẹ ukẹcha tiọyena da nẹrhẹ oma rayen kpo.”​—Uwevwin Orhẹrẹ ri February 1, 2011.