Iseri ri Jihova vwo ona oyoyovwin rẹ wo se vwo yono obo ri Baibol na yonori. Ọrhuẹrẹphiyotọ rẹ uyono ri Baibol avwanre sa vwẹ ukẹcha kẹ wẹ:

•   Vwo yerin akpọ rẹ omavwerhovwẹn

•   Vwọ dia ugbeyan rẹ Ọghẹnẹ

•   Vwo yono obo ri Baibol na veri kpahen obaro na

Vwẹ aruọbe nana

•  Mavọ yen e ruẹ uyono ri Baibol wan?

•  Me cha hwosa phiyọ uyono na?

•  Brọke yen uyono na cha reyọ?

•  Mavọ me sa vwọ tuọnphiyọ?

•  Me sa davwọn ni obọ ọvo tavwen?

•  Mi de rhiabọreyọ uyono ri Baibol, a cha gba vwẹ vwọ dia Oseri ri Jihova?

•  Me sa reyọ Baibol romobọ mẹ vwo ruiruo?

•  Mi se durhie ihwo efa nẹ ayen vwomaba uyono na?

•  Kẹ ọ da dianẹ me vẹ Iseri ri Jihova yono Baibol vwẹ ọke rọ wanre vwo? Me sa rhoma ton uyono na phiyọ?

•  Ovwan vwo ọrhuẹrẹphiyotọ rẹ uyono ri Baibol rẹ omẹvwẹ ọvo se ru ababọ rẹ oyono?

 Ohwo ro che yono uwe na cha cha wẹ uko vwọ riẹn obo rehẹ Baibol na vwo nẹ uyovwinrota ọvo kpo ọfa. Womarẹ ọbe ri Vwo Omavwerhovwẹn Bẹdẹ! re vwo yono Baibol na, wo che yono ovuẹ ri Baibol na ememerha, ọtiọyen ji te obo rọ sa vwọ cha wẹ uko.​ Wọ vwọ riẹn kpobarophiyọ, ni ividio nana.

 Ẹjo. Iseri ri Jihova nene odjekẹ ri Jesu vwọ kẹ idibo rọyen nẹ: “Ọphẹ ovwan mrẹrẹ, ọphẹ ovwan je vwọ kẹ rhe.” (Matiu 10:⁠8) Vwọba, wọ cha hwosa phiyọ erọnvwọn re che vwo ru uyono na-a, erọnvwọn kerẹ Baibol na kugbe ọbe ro vwo uyovwinrota na Vwo Omavwerhovwẹn Bẹdẹ!

 Iyono 60 yehẹ ọbe re che vwo ru uyono na. Wẹ yen che brorhiẹn rẹ uche ru wo che yono, ẹkẹvuọvo ihwo buebun re yono vwo omavwerhovwẹn rẹ ayen vwo yono uyono ọvo re yẹrẹ tobọ vrẹ ọtiọyen kudughwrẹn kudughwrẹn.

1.  1. Fili ifọmu rọhẹ intanẹti na. Ọdavwẹ wọ vwẹ fiki rọyen vwo phi evuẹ romobọ wẹn phiyọ na ọvo yen a cha reyọ evuẹ na vwo ru rẹ Oseri ri Jihova ọvo vwo bru we rhe.

2.  2. Ohwo ro che yono uwe na che bru we rhe yẹrẹ se we. Ohwo ro che yono uwe na che dje obo wo se rhẹro rọyen vwẹ uyono ri Baibol wẹn na fiotọ kẹ wẹ je kpahenphiyọ enọ ru wo se vwo.

3.  3. Wẹ vẹ ohwo ro che yono uwe na cha rhuẹrẹ ọke na phiyọ. Ohwo rẹ wẹ vẹ ọyen che ru uyono na se bru we rhe yẹrẹ nene uwe ruo womarẹ ifonu, ividio kọl, ileta, yẹrẹ imeli. Ọke buebun omarẹ unọke ọvo yen uyono na reyọ, ẹkẹvuọvo ọ sa krẹ yẹrẹ gron vrẹ ọtiọyen vwo nene oborẹ ọke wẹn hepha.

 E. Wo se vwo ru ọtiọyen, fili ifọmu rọhẹ intanẹti na. Oyono na de bru we rhe yẹrẹ se we, jẹ ọ riẹn nẹ wọ guọnọ davwen uyono na ni obọ ọvo tavwen sẹ o che je we. Ọ cha reyọ ibroshọ na Vwo Omavwerhovwẹn Bẹdẹ! ro vwo iyono erha ra vwọ tuẹn uyono ri Baibol phiyọ vwọ cha wẹ uko vwọ riẹn sẹ uyono na che je we.

 Ẹjo. Oma vwerhen Iseri ri Jihova ayen vwo yono ihwo Baibol na, ẹkẹvuọvo o vwo ọke vuọvo avwanre cha vwọ gba ohwo nẹ ọ rhe vwomaba ẹga avwanre-e. Ukperẹ ọtiọyen, avwanre dje obo ri Baibol na tare kẹ ihwo vwẹ idjerhe rẹ ọghọ, kidie avwanre riẹnre nẹ ohwo ọvuọvo vwo uturhi rọ vwọ jẹ obo ro che segbuyota.​—⁠1 Pita 3:⁠15.

 E, wọ sa reyọ efanfan ri Baibol ro je we vwo ruiruo. Dede nẹ oma vwerhen avwanre rẹ avwanre vwọ reyọ New World Translation of the Holy Scriptures rọ dia efanfan ro phẹnre rọ je gba vwo ruiruo, avwanre riẹnre nẹ ihwo buebun guọnọ reyọ efanfan ri Baibol rẹ ayen vwori vwo ruiruo.

 E. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre.

 E. Vwọrẹ uyota, wọ sa riavwerhen rẹ uyono na enẹna vrẹ obo ri jovwo kidie a rhoma rhuẹrẹ phiyọ rere o se vwo shephiyọ vẹ edavwẹ rẹ ihwo asaọkiephana. O vwo ihoho vẹ ividio buebun, o ji rhie uphẹn rẹ otaẹtakuẹgbe phiyọ vrẹ ọrhuẹrẹphiyotọ rẹ uyono ri Baibol ri jovwo na.

 E. Dede nẹ uyono na nabọ rua ihwo buebun re yono womarẹ ukẹcha rẹ oyono, evo guọnọ ke yono komobọ. Vwẹ ẹbẹre rẹ Erọnvwọn re Vwo Yono Baibol Na vwẹ wẹbsaiti avwanre, wọ cha mrẹ erọnvwọn ọphẹ re phi phiyọ re sa vwẹ ukẹcha kẹ wẹ vwẹ uyono ri Baibol wẹn. Enana erọnvwọn evo re sa cha wẹ uko:

•   Ividio rẹ Iyono rẹ Baibol. Ividio nana re pha kprẹn na dje iyono ri Baibol re pha ghanghanre fiotọ.

•   Ẹkpahọnphiyọ rẹ Enọ rẹ Baibol Na. Iyovwinreta nana kpahenphiyọ enọ ri Baibol na buebun.