Die Yen Watch Tower Bible and Tract Society Na?

HWORO

Watch Tower Bible and Tract Society of Pennsylvania ọyen ukoko ra vwọ chueki-i re vwo mu vwẹ 1884 vwẹ otọ rẹ irhi rẹ Commonwealth of Pennsylvania, U.S.A. Iseri ri Jihova reyọ ukoko nana vwo bicha iruo rẹ akpọeje rayen, ro churobọ si ẹteyọn ri Baibol na vẹ ẹbe sansan re mu kpahen Baibol na.

Vwo nene urhi, ọdavwẹ rẹ ukoko na yen re “vwo yono, ga ẹga, je vwẹ ukẹcha phia,” ọ rọ ma rho kparobọ yen e vwo “ghwogwho ji yono ihwo kpahen iyẹnrẹn esiri rẹ Uvie rẹ Ọghẹnẹ vwẹ otọ ri Jesu Kristi.” Ọ diẹ me toro bun yen a vwọ dia evunrẹ ukoko na-a, ẹkẹvuọvo womarẹ edurhie ọvo. Ihwo rehẹ evunrẹ ukoko na vẹ idairẹtọs rọyen vwẹ ukẹcha kẹ Ẹko Rọvwẹrote Iruo rẹ Iseri ri Jihova.

Ikoko rẹ Irhi efa

Vwọ vrẹ Watch Tower Bible and Tract Society of Pennsylvania, Iseri ri Jihova reyọ ikoko rẹ irhi buebun vwo ruiruo vwẹ ẹkuotọ sansan. Evo usun rẹ ikoko nana reyọ edẹ kerẹ “Watch Tower,” “Watchtower,” yẹrẹ ọ ra fanre vwẹ ọvo usun rẹ ivẹ na vwo ruiruo.

Rhanvwẹ ọke ra vwọ reyọ ikoko rẹ irhi sansan nana vwo mu, e cha avwanre uko vwo ru erọnvwọn buebun re, kerẹ:

Esio vẹ ẹteyọn rẹ ẹbe. Avwanre teyen Baibol ri te omarẹ oduduru 220 vẹ ẹbe re vwo yono Baibol na ri te omarẹ oduduima 40 re. Ẹbe avwanre herọ vwẹ ejajẹ re vrẹ 900. Wẹbsaiti ri jw.org nẹrhẹ ihwo se se Baibol na vwẹ intanẹti ọphẹ vwẹ ejajẹ re vrẹ 160, je mrẹ ẹkpahọnphiyọ rẹ enọ ri Baibol kerẹ, “What is the Kingdom of God?”
Eyono. Avwanre vwo isikuru sansan re de yono Baibol na. Kerẹ udje, rhanvwẹ 1943 yen Iseri ri Jihova ri te 9,000 vwọ mrẹ erere vwọ nẹ iyono rẹ isikuru rẹ Watchtower Bible School of Gilead vwọ phia, isikuru nana vwẹ ukẹcha kẹ ayen vwọ ga kerẹ Imishọnare je nẹrhẹ Iruo rẹ Akpọeje na yovwẹn phiyọ. Jẹ kudughwrẹn kudughwrẹn yen iduduru rẹ ihwo buebun, ji te ihwo re diẹ Iseri ri Jihova-a, vwo yono vwẹ emẹvwa rẹ avwanre re ruẹ vwẹ ikoko sansan. Avwanre ji vwo iklasi re vwo mu vwọ kẹ ihwo re riẹn se-e vẹ ẹbe re ruru vwẹ ejajẹ ri te 120 ri yono ihwo obo re se vẹ obo re siẹ.
A vwọ vwẹ ukẹcha phia. Avwanre vwẹ ukẹcha kẹ ihwo rẹ emu phia kẹ—te ọ dainẹ ihworakpọ yen sorọ, kerẹ ohwekufia rọ phaire vwẹ Rwanda vwẹ ukpe ri 1994, yẹrẹ oghwọrọ ri kpregede kerẹ otọ ro kpoghori vwẹ Haiti vwẹ ukpe ri 2010.

Dede nẹ ikoko sansan nana vwẹ ukẹcha kẹ avwanre vwo ru emu buebun re, jẹ ọ dia ọyen avwanre mu iruo rẹ avwanre kpahe-en. Onenikristi vuọvo vwẹ oghwa ro vwo ghwoghwo ji yono iyẹnrẹn esiri rẹ Uvie na rọ diẹ iji rẹ Ọghẹnẹ vwọ kẹ avwanre. (Matiu 24:14; 28:19, 20) Avwanre vwo imuẹro nẹ Ọghẹnẹ yen vwẹ ukẹcha kẹ avwanre vwo ruiruo rẹ avwanre na, ọyen ji “nẹrhẹ ọ djẹ.”—1 Kọrẹnt 3:6, 7.