Artur rọ dia oniruo okinriariẹ vwẹ Armenia kin ukoko rẹ Iseri ri Jihova ọvo. Ọ da mrẹvughe nẹ iniọvo rehẹ ukoko na ji rhi vwobọ vwẹ aghwoghwo rẹ azagba ra vwẹ imikpekpa vwo ruẹ dẹvo-o. O se vwo jiri oka rẹ aghwoghwo nana vwọ kẹ ukoko na, Artur vẹ aye rọyen Anna kugbe Oseri ri Jihova ọfa re se Jirayr de mu imikpekpa re ghorie kpo orere ọvo. Ayen de muo phiyọ ekogho ọvo rẹ ihwo wan mamọ.

 Ugege rẹ ayen ghwe vwo muo phiyọ, ihwo re wanvrẹ de dje omavwerhovwẹn phia, kẹ ayen reyọ ẹbe. O rhe kri-i ihwo re vwọsua de rhi vwo oniso rẹ imikpekpa na. Irherẹn ivẹ de bru ayen rhe, ọvo usun rayen da vwẹ owọ fa imikpekpa na she. Ọ da je ghwiẹ Artur ọhwa, ugana ẹro rọyen de she teyen otọ. Artur, Anna, kugbe Jirayr davwẹngba vwọ ta ota kẹ ayen, ẹkẹvuọvo ayen rhọnvwe kerhọ-ọ. Irherẹn na de chiyin imikpekpa na je hra ẹbe rehẹ evun rọyen nene asan eje. Irherẹn na vwọ hanrhe ayen gangan ji djuguegue mu ayen nu, ayen da yanran.

 Artur, Anna, vẹ Jirayr de kpo ogba rẹ elọkpa ra niyẹnrẹn rẹ obo re phiare. Ayen vwo ru ọtiọyen nu, ayen da ta ota nẹ Baibol na kẹ elọkpa evo kugbe ihwo efa re wian vwẹ etiyin. Elọkpa na de mu Iseri ri Jihova erha na kpo ọfisi rẹ ọga rayen. Ẹsosuọ, ọga na de guọnọ riẹn kpahen obo re phiare. Jẹ, o ghwe vwo nyo nẹ Artur rọ dia ọshare vẹ uriẹn kpọ obọ ọke ra vwọ ghwiẹ-ẹ, ọ rha rhọnvwe nọ enọ kpahen obo re phiare na ọfa-a. Ukperẹ ọtiọyen, kọ nọ kpahen esegbuyota rẹ Iseri ri Jihova. Ayen da ghwọrọ inọke ẹne vwọ ta ota! Oborẹ ọga rẹ elokpa na nyori gbere unu mamọ, ọ da ta: “A mrẹ vwo dje ẹga rẹ ovwan na-a! Me guọnọ vwomaba ovwan!”

 Vwẹ ẹdẹ rọ vwọ kpahọn, Artur vwọ rhoma ton aghwoghwo ra vwẹ imikpekpa vwo ruẹ na phiyọ, ọshare ọvo rọ mrẹ obo re phiare odẹ rọ wanre na de bru Artur rhe. O de jiro mamọ ro se vwo sun ophu rọyen ukperẹ ọ vwọ họnre. Ọ da je tanẹ ọghọ rẹ ọyen muẹ kẹ irherẹn na shekpotọ enẹna re.

 Ovwọnvwọn rẹ ẹdẹ yena, ọga rẹ elọkpa na de durhie Artur rhe ogba rẹ elọkpa na. Jẹ, ukperẹ ọ vwọ ta ota kpahen obo re phiare na, ọ da nọ enọ efa ri shekpahen Baibol na. Elọkpa ivẹ da vwomaba ayen.

 Ẹdẹ rọ vwọ kpahọn, Artur da rhoma rhivwin bru ọga na ra, o de dje ividio rẹ avwanre evo kẹ. Ọga na de se elọkpa efa nẹ ayen rhi nẹ ividio na.

 Orharhe uruemu rẹ irherẹn na djephia nẹrhẹ e se soseri ro fiotọ kẹ elọkpa buebun vwẹ obọrẹsosuo. Ọnana da nẹrhẹ ayen wene ẹro rẹ ayen vwo nẹ Iseri ri Jihova jovwo.